អូស្ត្រាលីទាមទារឲ្យមានការស៊ើបអង្កេតឯករាជ្យ ស្តីពីប្រភពកូវីដ១៩ ព្រមទាំងចំណាត់ការរបស់ចិន និងOMS
រដ្ឋមន្ត្រីក្រសួងការបរទេសអូស្ត្រាលី បានប្រកាសនៅថ្ងៃទី១៩មេសាថា រដ្ឋាភិបាលអូស្ត្រាលី នឹងទាមទារ ឲ្យមានការស៊ើបអង្កេត ដោយឯករាជ្យមួយ ស្តីពីប្រភពផ្ទុះឡើងនៃមេរោគកូវីដ១៩ នៅក្រុងវូហាន ព្រមទាំងអំពីតម្លាភាពរបស់អាជ្ញាធរចិន និងអង្គការសុខភាពពិភពលោក។ ការប្រកាសនេះ គឺធ្វើឡើងស្របពេលជាមួយសម្តីគម្រាមរបស់លោកដូណាល់ ត្រាំ ដែលលើកឡើងថា អាមេរិកនឹងមិនអត់ឱនទោស ឲ្យចិនជាដាច់ខាត បើសិនជាគេរកឃើញថា ចិនមានចេតនាអាក្រក់ណាមួយ នៅពីក្រោយការផ្ទុះការឆ្លងរាលដាលនូវមេរោគកូវីដ១៩។
ចុះផ្សាយនៅថ្ងៃ៖
ស្តាប់ - ០២:៣៣
ថ្លែងនៅតាមបណ្តាញព័ត៌មាន ABC លោកស្រី Marise Payne រដ្ឋមន្ត្រីក្រសួងការបរទេសអូស្រ្តាលី បានលើកឡើងថា អូស្ត្រាលីមានការបារម្ភ និងការយល់ឃើញ មិនខុសពីសហរដ្ឋអាមេរិកនោះទេ។ ពោលគឺអូស្ត្រាលី ត្រូវការចង់ដឹងការពិតឲ្យបានច្បាស់ ទាក់ទិននឹងប្រភពនៃមេរោគកូវីដ១៩ ដែលបានផ្ទុះចេញពីទីក្រុងវូហានប្រទេសចិន ហើយឆ្លងទៅកាន់បណ្តាប្រទេសសឹងតែទាំងអស់ ទូទាំងពិភពលោក។
លោកស្រីបន្តថា អូស្ត្រាលីត្រូវការស្វែងរកការពិតឲ្យបាន ទាក់ទិននឹងចំណាត់ការរបស់អាជ្ញាធរចិន និងព័ត៌មានទាំងឡាយណា ដែលចិនបានប្រកាស ថាតើវាមានតម្លាភាពកម្រិតណា ព្រមទាំងចំណាត់ការរបស់អង្គការសុខភាពពិភពលោក ចំពោះការប្រយុទ្ធប្រឆាំងនឹងការឆ្លងរាលដាល នូវមេរោគកូវីដ១៩នេះ។ លោកស្រីអះអាងថា ដើម្បីឆ្លើយទៅនឹងចំណោទទាំងអស់នេះបាន គឺត្រូវតែបង្កើតក្រុមការងារឯករាជ្យមួយ ដើម្បីធ្វើការស៊ើបអង្កេត ស្វែងរកការពិត។
ដូចគ្នាដែរ លោក Greg Hunt រដ្ឋមន្ត្រីក្រសួងសុខាភិបាលអូស្រ្តាលី ក៏បានគាំទ្រចំពោះការទាមទារ ឲ្យមានការស៊ើបអង្កេត ដោយឯករាជ្យនេះដែរ។ លោកបានបញ្ជាក់ថា អូស្ត្រាលី ជាប្រទេសមួយ ដែលបានទប់ស្កាត់ការឆ្លងរាលនូវមេរោគកូវីដ១៩ បានប្រសើរជាងគេ ហើយបានបញ្ចៀសមិនឲ្យមានអ្នកស្លាប់ច្រើន ក៏ដោយសារតែមួយផ្នែក គឺអូស្រ្តាលីបានសម្រេចធ្វើផ្ទុយពីអនុសាសន៍របស់អង្គការសុខភាពពិភពលោក ដោយបានបិទការធ្វើដំណើរ មកពីប្រទេសចិនតាំងតែពីថ្ងៃទី ១ខែកុម្ភៈ។
គួរបញ្ជាក់ថា ការប្រកាសរបស់អូស្រ្តាលី ទាមទារឲ្យមានការស៊ើបអង្កេតដោយឯករាជ្យនេះ គឺធ្វើឡើងស្របពេលដែលលោកដូណាល់ ត្រាំ បានដំឡើងសម្លេង ផ្តោតការសង្ស័យទៅលើរដ្ឋាភិបាលចិនកាន់តែខ្លាំង។ បន្ទាប់ពីបានចោទថាអង្គការសុខភាពពិភពលោក ស្ថិតក្រោមចំណុះរបស់ចិន លោកដូណាល់ ត្រាំ បានលើកឡើងថា លោកមិនទុកចិត្តចំពោះតួលេខអ្នកឆ្លង និងអ្នកស្លាប់នៅចិន ដែលអាជ្ញាធរចិនផ្សព្វផ្សាយនោះទេ។ នៅថ្ងៃសោរ៍ទី១៨មេសា លោកដូណាល់ ត្រាំ បាននិយាយគម្រាមថា បើសិនជាគេរកឃើញថា ចិនមានចេតនាអាក្រក់ណាមួយ នៅពីក្រោយការធ្វើឲ្យផ្ទុះការឆ្លងរាលដាលនូវមេរោគកូវីដ១៩នេះ នោះសហរដ្ឋអាមេរិក នឹងមិនអត់ឱនឲ្យចិនជាដាច់ខាត។
ដោយឡែក លោក Yuan Zhiming អគ្គនាយកវិទ្យាស្ថានស្រាវជ្រាវមេរោគក្រុងវូហាន បានចេញមុខ នៅតាមបណ្តាញទូរទស្សន៍CGTN នៅថ្ងៃអាទិត្យទី១៩មេសានេះ ដោយលោកបានបដិសេធ ច្រានចោលរាល់ការចោទប្រកាន់ ដែលថាមេរោគកូវីដ១៩ បានបែកធ្លាយចេញពីមន្ទីរពិសោធន៍របស់លោក។ លោកអះអាងថា សក្ខីកម្មជាក់ស្តែង គឺក្នុងចំណោមបុគ្គលិកធ្វើការនៅមន្ទីរពិសោធន៍នេះ គ្មាននរណាម្នាក់ឆ្លងមេរោគកូវីដ១៩ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ