កូវីដ១៩៖ អ្នកប្រកបរបរជាង ១ពាន់លាននាក់ប្រឈមនឹងការបាត់បង់ចំណូល សម្រាប់ចិញ្ចឹមជីវិត
នៅក្នុងការសិក្សាថ្មីមួយខ្លួនចេញផ្សាយ កាលពីថ្ងៃពុធ ម្សិលមិញ អង្គការពលកម្មអន្តរជាតិបានព្រមានថា វិធានការបិទទីក្រុង ដើម្បីទប់ស្កាត់ជំងឺកូវីដ១៩ នឹងធ្វើឲ្យអ្នកប្រកបការងារ នៅក្នុងសេដ្ឋកិច្ចក្រៅប្រព័ន្ធ ប្រមាណ ១ពាន់ ៦លាននាក់ ដែលស្មើនឹងពាក់កណ្តាលនៃចំនួនអ្នកធ្វើការក្នុងពិភពលោក ប្រឈមនឹងការបាត់បង់មធ្យោបាយ ដើម្បី ចិញ្ចឹមជីវិត។ តាមការសិក្សារបស់អង្គការពលកម្មអន្តរជាតិ វិបត្តិកូវីដ១៩ បានកាត់បន្ថយសកម្មភាពសេដ្ឋកិច្ច និងម៉ោងធ្វើការ ក្នុងចំនួនដ៏ច្រើន មិនធ្លាប់មាន ពីមុនមក។
ចុះផ្សាយនៅថ្ងៃ៖
ស្តាប់ - ០២:០០
មានជីវភាពលំបាករួចទៅហើយ អ្នកប្រកបមុខរបរ នៅក្នុងវិស័យសេដ្ឋកិច្ចក្រៅប្រព័ន្ធ ត្រូវមកប្រឈមនឹងការបាត់បង់មធ្យោបាយទាំងស្រុង ដើម្បី ចិញ្ចឹមជីវិត។ តាមរបាយការណ៍របស់អង្គការពលកម្មអន្តរជាតិ វិធានការបិទទីក្រុង បិទក្រុមហ៊ុន និងដាក់ក្រុងមនុស្សឲ្យនៅក្នុងផ្ទះ ដើម្បីទប់ស្កាត់ការឆ្លងរីករាលដាលជំងឺកូវីដ ១៩ បានកាត់បន្ថយម៉ោងធ្វើការក្នុងពិភពលោក ប្រមាណ ៤,៥%ស្មើនឹងការងារពេញម៉ោង ចំនួន ១៣០លានការងារ នៅក្នុងត្រីមាសទី១។ គេវាយតម្លៃថា ម៉ោងធ្វើការនឹងថយ ចុះ ដល់ ១០% នៅត្រីមាសទី២ នៅពេលវិធានការ បិទទីក្រុង ត្រូវអូសបន្លាយពេល ឬត្រូវ ពង្រីកបន្ថែម ទៅលើតំបន់ផ្សេងទៀត ដើម្បីទប់ស្កាត់ការចម្លងមេរោគកូវីដ១៩។
អាមេរិក និងអឺរ៉ុបបូកជាមួយអាស៊ី ជាតំបន់ដែលអាចប្រឈមនឹងបាត់បង់ម៉ោងធ្វើការ ច្រើនជាងគេ នៅត្រីមាស ទី២ ដោយសារតែតំបន់ខាងលើ ដែលរងគ្រោះខ្លាំងដោយសារជំងឺ កូវីដ ១៩ នៅបន្តអនុវត្តវិធានការបិទទីក្រុង បិទភោជនីយដ្ឋាន ដើម្បីទប់ស្កាត់ការចម្លងមេរោគកូរ៉ូណា។
អ្នកដែលរងប៉ះពាល់ធ្ងន់ធ្ងរជាងគេ ដោយសារវិធានការបិទខ្ទប់ទីក្រុង គឺអ្នកដែលប្រកបរបរនៅក្នុងវិស័យសេដ្ឋកិច្ចក្រៅប្រព័ន្ធ ដូចជាអ្នកលក់ដូរតាមផ្លូវ អ្នកបម្រើការនៅតាម ភោជនីយដ្ឋាន សណ្ឋាគារ ដែលគ្មានការគាំពារពីរដ្ឋាភិបាល។ ចំណែកក្រុមហ៊ុនតូចតាច ដែលមានរចនាសម្ព័ន្ធបុគ្គលិក តិចជាង ១០នាក់ គ្មានប្រាក់សន្សំ ឬទទួលឥណទានពីធនាគារ។ សម្រាប់ពួកគេទាំងនោះ គ្មានការងារ គ្មានមុខរបរ មានន័យថា គ្មានប្រាក់ចំណូល គ្មានប្រាក់ឈ្នួល គ្មានអាហារ គ្មានសុវត្ថិភាព និងគ្មានអនាគត។
សម្រាប់អង្គការពលកម្មអន្តរជាតិ នៅក្នុងកាលៈទេសៈដែលកំពុងកើតមានជំងឺរាតត្បាត កូវីដ ១៩ និងវិបត្តិសេដ្ឋកិច្ច អ្នកប្រកបរបរ នៅក្នុងសេដ្ឋកិច្ចក្រៅប្រព័ន្ធ និងក្រុមហ៊ុនតូចតាច ត្រូវការជំនួយបន្ទាន់ ជាងពេលណាទាំងអស់ ព្រោះថា “បើសិន យើងមិនជួយពួកគេទេ ពួកគេនឹងវិនាស បាត់មុខ មិនខាន”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ