កូរ៉េខាងត្បូងចេញវិធានការថ្មី ខ្លាចមានការរាតត្បាតទ្រង់ទ្រាយធំផ្ទុះឡើងវិញ
អាជ្ញាធរក្រុងសេអ៊ូល បានចេញបទបញ្ជាឱ្យបិទបាររង្គសាលទាំងអស់នៅក្នុងរដ្ឋធានី និងខេត្តជាប់រដ្ឋធានី បន្ទាប់ពីសង្កេតឃើញមានផ្ទុះករណីឆ្លងថ្មី ក្នុងសង្កាត់ដ៏ល្បីមួយរបស់ក្រុង។ កូរ៉េខាងត្បូងដែលល្បីខាងមានចំណាត់ល្អក្នុងការទប់ស្កាត់ជំងឺកូវីដ១៩ កំពុងព្រួយបារម្ភខ្លាចមានការឆ្លងរីករាលដាលក្នុងទ្រង់ទ្រាយធំផ្ទុះឡើងវិញ។ ជាងនេះទៅទៀត នៅថ្ងៃអាទិត្យទី ៩ ឧសភាម្សិលមិញ កូរ៉េខាងត្បូង រកឃើញករណីឆ្លងថ្មីបន្ថែម ដល់ទៅ ៣៤នាក់។ ជាចំនួនឆ្លងដ៏ច្រើនបំផុត គិតចាប់តាំងពីថ្ងៃទី៩មេសាមក។
ចុះផ្សាយនៅថ្ងៃ៖
ស្តាប់ - ០២:១៦
កូរ៉េខាងត្បូង ចាប់ផ្តើមវិលមកប្រកាន់ជីវភាពរស់នៅស្ទើរដូចធម្មតា និងទើបសម្រេចបន្ធូរបន្ថយវិធានការរក្សាគម្លាតសុវត្ថិភាព កាលពីថ្ងៃពុធសោះ ស្រាប់តែចំនួនអ្នកឆ្លងកូវីដថ្មី ចាប់កម្រើកឡើងវិញ និងក្នុងបរិមាណដ៏ច្រើន ដល់ទៅ៣៤នាក់ ក្នុងរយៈពេលតែ២៤ម៉ោង។ តាំងពីថ្ងៃទី៩មេសាមក ចំនួនអ្នកឆ្លងថ្មីមានជាមធ្យម១០នាក់ប៉ុណ្ណោះ។
នៅក្នុងចំណោមអ្នកវិជ្ជមានថ្មីទាំង៣៤នាក់ ៨នាក់ជាករណីឆ្លងនាំចូលមកពីបរទេស និង២៤នាក់ មកពីប្រភពតែមួយ គឺ សង្កាត់ Itaewon ដែលមានបាររង្គសាលច្រើន ជាទីពេញនិយមរបស់យុវជននិងបរទេស។ អាជ្ញាធរសុខាភិបាលសង្ស័យថាចំនួនអ្នកឆ្លងថ្មីអាចនឹងកើនឡើងខ្លាំង ព្រោះអាជ្ញាធរបានរកឃើញមានករណីឆ្លងថ្មីជាង៥០នាក់ហើយ ឆ្លងមកពីបុរសតែម្នាក់អាយុ២៩ឆ្នាំ ដែលមានផ្ទុកមេរោគកូរ៉ូណា និងដែលបានដើរលេងចូលបាររង្គសាលចំនួន៥ នៅក្នុងសង្កាត់អ៊ីតៃវ៉ុន កាលពីចុងសប្តាហ៍មុន។ បើតាមការប៉ាន់ស្មាន រង្គសាលទាំង៥នោះ មានភ្ញៀវចូលកំសាន្តប្រមាណដល់ទៅ ៧២០០នាក់។
ប្រឈមនឹងស្ថានភាពបែបនេះ ចៅហ្វាយក្រុងសេអ៊ូល បានអំពាវនាវឱ្យជនគ្រប់រូបដែលបានចូលរង្គសាលទាំងនោះមកបង្ហាញខ្លួនដើម្បីធ្វើតេស្ត និងបានប្រកាសបិទទ្វាររង្គសាលទាំងអស់ក្នុងក្រុង ចាប់ពីថ្ងៃនេះរហូតដល់មានសេចក្តីសម្រេចថ្មី។ ដោយមិនធ្វេសប្រហែស ខេត្ត Gyeonggi ដែលនៅជាប់សេអ៊ូលនិងប្រជាជនរស់នៅសរុបជាង១២លាននាក់ ក៏បានចេញក្រិត្យភ្លាមបិទស្ថាប័នជាង៧៥០០កន្លែងរបស់ខ្លួន រយៈពេលពីរសប្តាហ៍ ចាប់ពីថ្ងៃអាទិត្យនេះទៅ។
ករណីឆ្លងថ្មីក្នុងសង្កាត់អ៊ីតៃវ៉ុន ជាការដាស់ស្មារតីពលរដ្ឋគ្រប់រូបឱ្យយល់ថាកូវីដ១៩អាចកើតឡើងបាន គ្រប់ពេលវេលា និងគ្រប់កន្លែង មិនថាប្រទេសស្ថិតក្នុងស្ថានភាពប្រសើរឡើងហើយទេ។ នេះជាប្រសាសន៍ របស់លោកប្រធានាធិបតី ម៉ូនចែអ៊ីន ដោយអំពាវនាវឱ្យប្រជាពលរដ្ឋបន្តប្រុងប្រយ័ត្នជានិច្ច ដរាបណាជំងឺរាតត្បាតមិនទាន់ត្រូវបានកម្ចាត់ទាំងស្រុងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ