សេដ្ឋកិច្ចអូស្រ្តាលី កំពុងដើរឆ្ពោះទៅរកវិបត្តិដែលមិនធ្លាប់មានក្នុងរយៈពេល៣ទសវត្សរ៍កន្លងមក
ប្រទេសអូស្រ្តាលី កំពុងដើរឆ្ពោះទៅរកវិបត្តិសេដ្ឋកិច្ចដែលមិនធ្លាប់ពីមុនមកនោះទេក្នុងរយៈពេល ៣ ទសវត្សរ៍កន្លងមកនេះ។ កំណើនសេដ្ឋកិច្ចអូស្ត្រាលី បានធ្លាក់ចុះយ៉ាងខ្លាំងនៅរវាងខែមករា-មីនា ឆ្នាំ២០២០ ហើយបើតាមការព្យារករណ៍ សេដ្ឋកិច្ចអូស្ត្រាលីនឹងរងវិបត្តិកាន់តែធ្ងន់ធ្ងរជាងនេះទៅទៀតក្នុងរយៈពេល ៣ខែខាងមុខ ដោយសារតែរងឥទ្ធិពលពីជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:១៣
កំណើនសេដ្ឋកិច្ចអូស្ត្រាលីនៅឆ្នាំ ២០២០ នេះ បានធ្លាក់ចុះ ០,៣ % ដែលជាការធ្លាក់ចុះប្រចាំត្រីមាសដំបូងមិនធ្លាប់មានពីមុនមកនោះទេ ចាប់តាំងពីឆ្នាំ ២០០៩ ក្នុងកំឡុងពេលនៃវិបត្តិហិរញ្ញវត្ថុពិភពលោក។ សេដ្ឋកិច្ចអូស្ត្រាលី មានសញ្ញាដើរថយក្រោយបែបនេះ ដោយសារតែវិធានការរាំងខ្ទប់ប្រជាជនឲ្យនៅតែក្នុងផ្ទះក្នុងរដូវកាលកូវីដ រួមផ្សំជាមួយនឹងការរងផលប៉ះពាល់បង្កឡើងដោយគ្រោះរាំងស្ងួត និងគ្រោះភ្លើងឆេះព្រៃ។
បើតាមក្រុមអ្នកជំនាញ សេដ្ឋកិច្ចអូស្ត្រាលីនឹងមិនឈប់ធ្លាក់ចុះត្រឹមនេះនោះទេ។ ក៏ប៉ុន្តែ វានឹងបន្តធ្លាក់ចុះកាន់តែខ្លាំងជាងនេះទៀតក្នុងត្រីមាសទី ២ នៃឆ្នាំ ២០២០ ដោយសារតែវិបត្តិកូវីដ១៩។
វិបត្តិកូវីដ១៩ នេះហើយ ដែលនៅម្ខាងបង្ខំឲ្យអាជីវកម្មជាច្រើននៅអូស្ត្រាលីត្រូវបិទទ្វារ និងនៅម្ខាងទៀតបង្ខំឲ្យអាជ្ញាធរអូស្ត្រាលីបិទព្រំដែនអន្តរជាតិរបស់ខ្លួនដើម្បីទប់ស្កាត់កុំឲ្យវីរុសនេះបន្តឆ្លងរីករាលដាលទៀត។
អូស្ត្រាលី នៅទីបំផុតទៅ ទទួលជោគជ័យក្នុងការគ្រប់គ្រងមេរោគកូវីដ។ ក៏ប៉ុន្តែ វិធានការរបស់អូស្ត្រាលីក្នុងការប្រយុទ្ធប្រឆាំងទៅនឹងជំងឺកូវីដ១៩ ខាងលើនេះ បានធ្វើឲ្យអូស្ត្រាលីខាតបង់ថវិការាប់ពាន់លានដុល្លារ និងត្រូវធ្លាក់ខ្លួនផុងក្នុងវិបត្តិសេដ្ឋកិច្ច។ ប្រជាជនអូស្រ្តាលីចំនួនរាប់លាននាក់បានបាត់បង់ការងារធ្វើ ឬធ្លាក់ចុះប្រាក់ចំណូលរបស់ពួកគេ។
អ្នកជំនាញសេដ្ឋកិច្ចរបស់ធនាគារជាតិអូស្ត្រាលីលោកស្រី Kaixin Owyong បាននិយាយថាសេដ្ឋកិច្ចអូស្ត្រាលី អាចនឹងធ្លាក់ចុះចំនួន ៨,៤ % ក្នុងរយៈពេល ៣ ខែបន្ទាប់ ពោលនៅក្នុងខែមិថុនា។ ប៉ុន្តែ លោកស្រីក៏បានលើកឡើងដែរថា ការដកចេញនូវវិធានការរាំងខ្ទប់ប្រជាជនឲ្យនៅតែក្នុងផ្ទះ នឹងជួយឲ្យសេដ្ឋកិច្ចអូស្ត្រាលីចាប់ងើបក្បាលមកវិញនៅត្រីមាសទី ៣ នៃឆ្នាំ ២០២០នេះ។
គួររំឭកជូនថា រហូតមកទល់នឹងពេលនេះ ករណីឆ្លងជំងឺកូវីដ១៩ នៅក្នុងប្រទេសអូស្ត្រាលីចំនួនប្រមាណ ៧ ពាន់ ២ រយករណី និងមានស្លាប់ ១០២ នាក់។ បច្ចុប្បន្ននេះ តំបន់ជាច្រើននៅក្នុងប្រទេសអូស្ត្រាលីនៅតែរាយការណ៍នូវករណីឆ្លងកូវីដថ្មីជារៀងរាល់ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ