អ.ស.ប រិះគន់ចិននិងប្រទេសនៅអាស៊ីថាឆ្លៀតយកវិបត្តិកូវីដបង្កើនការបំបិទសេរីភាពក្នុងការបញ្ចេញមតិ
ប្រមុខសិទ្ធិមនុស្សអ.ស.ប លោកស្រី មីស្ហែល បាស្ហឺឡេ (Michelle Bachelet) នៅថ្ងៃពុធ ទី៣ មថុនា បានរិះគន់ប្រទេសចិន និងបណ្តាប្រទេសអាស៊ីដទៃទៀតដែលក្នុងនោះក៏មានផងដែរប្រទេសកម្ពុជា ពីការយកវិបត្តិកូវីដជាលេសបង្កើនការត្រួតត្រានិងបំបិទសិទ្ធិសេរីភាពក្នុងការបញ្ចេញមតិ។ លោកស្រី បាស្ហឺឡេ បានមានប្រសាសន៍ថា វិបត្តិកូវីដមិនគួរត្រូវបានគេយកទៅប្រើជាឧបករណ៍ ដើម្បីរឹតត្បិតសំឡេងប្រឆាំង ការចែកចាយព័ត៌មាន និងការជជែកវែកញែកដោយសេរីនោះទេ។
ចុះផ្សាយនៅថ្ងៃ៖
ស្តាប់ - ០២:៤១
នៅក្នុងសេចក្តីថ្លែងការណ៍មួយ ឧត្តមស្នងការអ.ស.ប ទទួលបន្ទុកសិទ្ធិមនុស្សលោកស្រី មីស្ហែល បាស្ហឺឡេ បានសម្តែងនូវក្តីព្រួយបារម្ភចំពោះការរឹតបន្តឹងសិទ្ធិសេរីភាពនៅក្នុងប្រទេសអាស៊ីជាច្រើន។
“មនុស្សជាច្រើននាក់ត្រូវបានចាប់ខ្លួននៅក្នុងប្រទេសចិន និងប្រទេសអាស៊ីដទៃទៀតមានជាអាទិ៍ប្រទេសឥណ្ឌា ឥណ្ឌូណេស៊ី ម៉ាឡេស៊ី ភូមា កម្ពុជា ថៃ និងវៀតណាម ក្រោមបទចោទប្រកាន់ថាបានផ្សព្វផ្សាយព័ត៌មានមិនពិតតាមរយៈបណ្តាញសារព័ត៌មាននានា និងបណ្តាញសង្គម ឬក៏សូម្បីតែពួកគេចែករំលែកនូវព័ត៌មានឬទស្សនៈផ្ទាល់ខ្លួនអំពីជំងឺកូវីដ១៩”។ នេះបើតាមសារដែលមាននៅក្នុងសេចក្តីថ្លែងការណ៍របស់ឧត្តមស្នងការអ.ស.ប ទទួលបន្ទុកសិទ្ធិមនុស្ស។
ប្រមុខសិទ្ធិមនុស្សអ.ស.ប បាននិយាយដោយទទួលស្គាល់អំពីតម្រូវការក្នុងការរឹតត្បិតការផ្សព្វផ្សាយព័ត៌មានដែលបង្កជាគ្រោះថ្នាក់ ដើម្បីការពារសុខភាពសាធារណៈឬការញុះញង់ឲ្យមានការស្អប់ខ្ពើមចំពោះក្រុមជនជាតិភាគតិច។ ក៏ប៉ុន្តែទន្ទឹមគ្នានេះ លោកស្រីក៏បានទទូចផងដែរថាគេមិនគួរយកវិបត្តិកូវីដនេះ ជាលេសដើម្បីបំបិទសិទ្ធិសេរីភាពក្នុងការបញ្ចេញមតិឡើយ។
លោកស្រី មីស្ហែល បាស្ហឺឡេ បានមានប្រសាសន៍ថា ខណៈពេលដែលរដ្ឋាភិបាលនៃប្រទេសមួយមានសិទ្ធិស្របច្បាប់ក្នុងការគ្រប់គ្រងការផ្សព្វផ្សាយព័ត៌មានមិនពិត គេក៏ត្រូវធ្វើវាឲ្យមានសមាមាត្រ និងត្រូវការពារផងដែរសេរីភាពនៃការបញ្ចេញមតិ។
ករណីនៅចិន ការិយាល័យសិទ្ធិមនុស្សរបស់អ.ស.ប បានទទួលព័ត៌មានថា មានអ្នកជំនាញវេជ្ជសាស្រ្ត សិស្សនិស្សិត និងប្រជាជនសាមញ្ញជាច្រើននាក់ ទំនងជាត្រូវបានគេចាប់ឃុំខ្លួន។ ក្នុងករណីខ្លះ មនុស្សមួយចំនួន ត្រូវគេឃុំខ្លួនក្រោមបទចោទប្រកាន់ ពីការផ្សព្វផ្សាយគំនិតឬព័ត៌មានមិនពិតផ្សេងទៀតពាក់ព័ន្ធជំងឺកូវីដ ឬក៏ការរិះគន់ចំណាត់ការរបស់រដ្ឋាភិបាលចិនក្នុងការឆ្លើយតបចំពោះវិបត្តិកូវីដ។
នៅឥណ្ឌា អ្នកកាសែតមួយចំនួននិងវេជ្ជបណ្ឌិតយ៉ាងហោចណាស់ម្នាក់ត្រូវបានចោទប្រកាន់ពីបទរិះគន់ជាសាធារណៈ ចំពោះការឆ្លើយតបរបស់អាជ្ញាធរឥណ្ឌាទៅនឹងវិបត្តិកូវីដ ។
ងារមកកម្ពុជាវិញ ការិយាល័យសិទ្ធិមនុស្សអ.ស.ប បានលើកឡើងថា មានមនុស្សចំនួន ៣០នាក់ត្រូវបានចាប់ខ្លួន ក្នុងនោះមានក្មេងស្រីអាយុ ១៤ ឆ្នាំក្នុងការដែលពួកគេ បញ្ចេញយោបល់ជាសាធារណៈ និងតាមបណ្តាញសង្គមទាក់ទងនឹងជំងឺកូវីដ១៩។
ចំណែកនៅវៀតណាមឯណោះវិញ អាជ្ញាធរបានរាយការណ៍ថា អ្នកប្រើប្រាស់បណ្តាញសង្គមហ្វេសប៊ុកជាង ៦០០ នាក់ ត្រូវបានកោះហៅទៅសាកសួរទាក់ទងនឹងការបង្ហោះសារអំពីមេរោគកូវីដ១៩នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ