ខួប៧០ឆ្នាំនៃសង្គ្រាមកូរ៉េ ៖ សហរដ្ឋអាមេរិកនិងកូរ៉េខាងត្បូងប្តេជ្ញាការពារសន្តិភាព
ថ្ងៃនេះជាខួប៧០ឆ្នាំគត់ នៃការផ្ទុះសង្គ្រាមនៅឧបទ្វីបកូរ៉េ។ ជាសង្គ្រាមដែលបានសម្លាប់ជីវិតមនុស្សអស់ជាច្រើនលាននាក់ ពោលជាសង្គ្រាមមរណៈដ៏ធ្ងន់ធ្ងរបំផុតបន្ទាប់ពីសង្គ្រាមលោក។ នៅក្នុងសេចក្តីថ្លែងការណ៍រួម នាឱកាសរំលឹកខួបនេះ សេអ៊ូលនិងវ៉ាស៊ីនតោន បានប្តេជ្ញាជាថ្មី ថានឹងការពារថែទាំសន្តិភាពដែលសម្ព័ន្ធមិត្តទាំងពីរដណ្តើមបានយ៉ាងលំបាកលំបិន មកប្រគល់ជូនឧបទ្វីប។ ឧបទ្វីបដែល បានបែងចែកជាពីរចម្រៀក (ប្រទេស) តាំងពីពេលនោះមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
នៅថ្ងៃទី ២៥មិថុនា ឆ្នាំ១៩៥០ ជាថ្ងៃផ្ទុះសង្គ្រាមនៅឧបទ្វីបកូរ៉េ តែក៏ជាថ្ងៃដែលកំណើតនៃសម្ព័ន្ធភាពយោធារវាងសហរដ្ឋអាមេរិកនិងកូរ៉េខាងត្បូង។ សម្ព័ន្ធភាពយោធាកើតឡើងដោយចាំបាច់ តែត្រូវបានពង្រឹងក្លាយសម្ព័ន្ធភាពរួមឈាម។ នេះបើតាមសេចក្តីថ្លែងការណ៍រួមរបស់រដ្ឋមន្ត្រីក្រសួងការពារជាតិអាមេរិក Mark Esper និងសមភាគីកូរ៉េខាងត្បូងJeong Kyeong-doo។ បើទោះបីជាមួយរយៈពេលចុងក្រោយនេះទំនាក់ទំនងសេអ៊ូលនិងវ៉ាស៊ីនតោនហាក់ល្អក់កករបន្តិច ក្រោយពីលោកដូណាល់ត្រាំគំរាម ទារលុយពីកូរ៉េខាងត្បូងថ្លៃរក្សាកងទ័ពអាមេរិកនៅឧបទ្វីបកូរ៉េក៏ដោយ ក៏សម្ព័ន្ធមិត្តយោធាអាមេរិកនិងកូរ៉េខាងត្បូង បានសន្យារក្សានិងការពារសន្តិភាពឱ្យឧបទ្វីប ជានិច្ច។ នេះបើតាមសេចក្តីថ្លែងការណ៍ដដែល។
សូមរំលឹកថា ក្រោយសង្គ្រាមលោកលើកទីពីរ កូរ៉េត្រូវស្ថិតក្រោមការគ្រប់គ្រង់ភាគខាងជើងដោយរុស្ស៊ី និងភាគខាងត្បូងដោយសហរដ្ឋអាមេរិក។ ហើយនៅថ្ងៃទី ២៥មិថុនា១៩៥០ កម្លាំងយោធាកូរ៉េខាងជើងបានវាយលុកចូលមកឈ្លានពានកូរ៉េខាងផ្នែកខាងត្បូង។ សង្គ្រាមបង្ហូរឈាមក៏បានផ្ទុះឡើង ស្លាប់ជីវិតអស់ជាងបីលាននាក់ ភាគច្រើនជាជនស៊ីវិល ក្នុងអំឡុងពេលបីឆ្នាំ។ សង្គ្រាមប្រដាប់អាវុធប្រយុទ្ធតតាំងគ្នា បានបិទបញ្ចប់នៅថ្ងៃទី ២៧កក្កដា ១៩៥៣ តាមរយៈការចុះកិច្ចព្រមព្រៀងឈប់បាញ់ ប៉ុន្តែមិនបានចុះសន្ធិសញ្ញាសន្តិភាពទេ បានន័យថាតាមបែបបច្ចេកទេស កូរ៉េខាងជើងនិងខាងត្បូងដែលខ័ណ្ឌចែកដោយតំបន់គ្មានកងទ័ព នៅមានសង្គ្រាមនឹងគ្នា។
៧០ឆ្នាំក្រោយ និងក្នុងបរិបទបច្ចុប្បន្ន ទំនាក់ទំនងរវាងបងប្អូនបង្កើតជាគូសត្រូវគ្នា កាន់តែដុនដាបខ្លាំង។ ពីរឆ្នាំក្រោយជំនួបជាប្រវត្តិសាស្ត្រ រវាងលោកដូណាល់ ត្រាំនិងលោក គីមជុងអ៊ុន និងជំនួបទ្វេភាគីជាច្រើនលើករវាងលោក គីម ជុងអ៊ុន និងប្រធានាធិបតីកូរ៉េខាងត្បូង មូន ចែអ៊ីន នៅសប្តាហ៍មុន កូរ៉េខាងជើងបានបង្កើនសកម្មភាពផ្គើនបង្កហេតុជាច្រើន បាញ់បំផ្លាញការិយាល័យទំនាក់ទំនងអន្តរកូរ៉េនៅព្រំប្រទល់ បង្កើនវត្តមានយោធានៅតំបន់គ្មានកងទ័ព ... តែលោកគីម ជុងអ៊ុនទើបបានសម្រេចព្យួរសកម្មភាពយោធាវិញ កាលពីថ្ងៃពុធទី ២៤មិថុនា២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ