ច្បាប់ប្រឆាំងភេរវកម្មហ្វ៊ីលីពីន ធ្វើឲ្យអ្នកនយោបាយប្រឆាំង និងសកម្មជនសិទ្ធិមនុស្សព្រួយបារម្ភ
នៅថ្ងៃសុក្រ ទី៣កក្កដា លោកឌូទែរតេ ប្រធានាធិបតីហ្វ៊ីលីពីន បានខុះហត្ថលេខា ប្រកាសចូលជាធរមាននូវច្បាប់ថ្មី ដែលសំដៅប្រយុទ្ធប្រឆាំងនឹងសកម្មភាពភេរវកម្ម ។ ក៏ប៉ុន្តែអ្នកនយោបាយប្រឆាំង និងសកម្មជានសិទ្ធិមនុស្សនៅហ្វីលីពីន បានសម្តែងការព្រួយបារម្ភជាខ្លាំង ដោយគេបានលើកឡើងថា និយមន័យនៃពាក្យភេរវកម្មដែលមិនច្បាស់លាស់ នៅក្នុងច្បាប់នោះ នឹងបើកដៃឲ្យរដ្ឋាភិបាលប្រើវាជាឧបករណ៍ ដើម្បីរំលោភបំពានសិទ្ធិសេរីភាព នៅហ្វ៊ីលីពីន។
ចុះផ្សាយនៅថ្ងៃ៖
ស្តាប់ - ០២:៤១
ច្បាប់ប្រឆាំងភេរវកម្ម ត្រូវបានសភាហ្វ៊ីលីពីន អនុម័តកាលពីដើមខែមិថុនា ហើយទើបតែត្រូវបានលោកប្រធានាធិបតី ឌូទែរតេ ចុះហត្ថលេខាជាផ្លូវការនៅថ្ងៃសុក្រ ទី៣កក្កដា។ អ្នកនាំពាក្យខុទ្ទការល័យលោកឌូទែរតេ បាននិយាយថា ច្បាប់ថ្មីនេះ បានបង្ហាញអំពីឆន្ទះច្បាល់លាស់ របស់រដ្ឋាភិបាល ក្នុងការការពារសុខសន្តិភាពជូនប្រជាជនហ្វ៊ីលីពីន និងបោសសំអាតសកម្មភាពភេរវកម្ម ដែលបានធ្វើបាបប្រជាជនជាយូរឆ្នាំមកហើយ។
ដោយឡែក ក្រុមអ្នកប្រឆាំងនឹងច្បាប់នេះ បានលើកឡើងថា វាគឺជាឧបករណ៍សម្រាប់ឲ្យរដ្ឋាភិបាលដឹកនាំលោកឌូទែរតេ ចាប់ប្រមូលអ្នកប្រឆាំង និងអ្នករិះគន់ ដោយហេតុថា និយមន័យនៃពាក្យ ភេរវកម្ម ដែលមានចែងក្នុងច្បាប់នេះ មានភាពទូលាយជ្រុល ដែលគេអាចយកទៅបកស្រាយតាមចិត្តចង់។ ពាក្យថា « អំពើភេរវកម្ម » ត្រូវបានច្បាប់នេះពន្យល់ថា៖ គឺជា បំណង ឬសកម្មភាពទាំងឡាយណា ដែលបង្ករបួស ឬសម្លាប់ បំពានប៉ះពាល់ដល់រដ្ឋាភិបាល និងទ្រព្យសម្បត្តិឯកជន ឬការប្រើប្រាស់អាវុធជាតិផ្ទុះ ក្នុងចេតនាផ្សព្វផ្សាយសាបព្រួស ការភ័យខ្លាចក្នុងសង្គម និងគម្រាមទៅលើរដ្ឋាភិបាល។
តាមរយៈច្បាប់ថ្មីនេះ លោកឌូទែរតេ និងតែងតាំងក្រុមប្រឹក្សាពិសេសមួយ ដែលមានសិទ្ធិអំណាចបញ្ជាឲ្យធ្វើការចាប់ឃាត់ខ្លួនមនុស្សណា ដែលគេសង្ស័យថាបាន ឬប៉ុនប៉ង ធ្វើអំពើភេរវកម្ម ដោយមិនចាំបាច់ មានដីកាចាប់ខ្លួនពីតុលាការទេ។ អង្គភាពនេះ ក៏អាចសម្រេចឃុំខ្លួនមនុស្ស រយៈពេលដល់ទៅ២៤ថ្ងៃ ដោយមិនចាំបាច់មានការចោទប្រកាន់ជាផ្លូវការឡើយ។ អ្នករិះគន់បានលើកឡើងថា ប្រការនេះគឺវាផ្ទុយពីគោលការណ៍ចែងក្នុងរដ្ឋធម្មនុញ្ញ ដែលអាជ្ញាធរអាចមានសិទ្ធិ ឃុំខ្លូនមនុស្សតែ២ថ្ងៃប៉ុណ្ណោះ បើគ្មានការចោទប្រកាន់ជាផ្លូវការពីតុលាការ។
លោក Nicolas Bequelin ប្រធានប្រចាំតំបន់អាស៊ី របស់អង្គការ Amnesty International បានលើកឡើងថា ស្ថិតក្នុងអំណាចរបស់ប្រធានាធិបតីហ្វីលីពីនបច្ចុប្បន្ននេះ ការរិះគន់ទៅលើរដ្ឋាភិបាល ទោះបីជាការរិះគន់សាមញ្ញតូចតាចក៏ដោយ ក៏នឹងអាចក្លាយជាបទល្មើសភេរវកម្មដែរ។ ច្បាប់ថ្មីនេះ គឺជាឧបករណ៍តាមប្រមាញ់ មនុស្សប្រឆាំង ដែលគេចាត់ទុកថាជានសត្រូវឬជនក្បត់។
ដូចគ្នាដែរ លោក Phil Robertson អនុប្រធានប្រចាំតំបន់អាស៊ី នៃអង្គការ Human Rights Watch បានលើកឡើងថា ច្បាប់ភេរវកម្មរបស់ហ្វ៊ីលីពីននេះ នឹងធ្វើឲ្យស្ថានភាពសិទ្ធិមនុស្សនៅហ្វ៊ីលីពីន កាន់តែធ្លាក់ដុនដាបខ្លាំងឡើងថែមទៀត។ លោកសង្កត់ធ្ងន់ថា ស្ថានភាពរំលោភសិទ្ធិមនុស្ស នៅហ្វ៊ីលីពីន វាមានកម្រិតធ្ងន់ធ្ងរណាស់ទៅហើយ ក្រោយប្រតិបត្តិការបង្រ្កាបគ្រឿងញៀនប្រមាណ៤ឆ្នាំមកនេះ ដែលរហូតមកទល់ពេលនេះ ជីវិតមនុស្សប្រមាណ៨៦៦៣នាក់ដែលបានស្លាប់ គឺគ្មាននរណារកយុត្តិធម៌ឲ្យនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ