ចិននិងអូស្ត្រាលីដំឡើងសម្ពាធដាក់គ្នាកាន់តែខ្លាំងជុំវិញរឿងហុងកុង
មួយសប្តាហ៍ក្រោយការអនុម័តច្បាប់សន្តិសុខជាតិហុងកុង នាយករដ្ឋមន្ត្រីអូស្ត្រាលីលោក Scott Morrison បានប្រកាសនៅថ្ងៃព្រហស្បតិ៍ទី ៩ កក្កដា ២០២០ ព្យួរសន្ធិសញ្ញាធ្វើបត្យាប័ន និងពន្យារទិដ្ឋាការឱ្យពលរដ្ឋហុងកុងជាច្រើនពាន់នាក់ ដែលកំពុងស្នាក់នៅក្នុងទឹកដីអូស្ត្រាលី។ ដោយគ្មានបង្អង់ ប៉េកាំងបានបញ្ចេញប្រតិកម្មតបវិញយ៉ាងទាន់ហន់ ចាត់ទុកវិធានការរបស់អូស្ត្រាលីថាជាការជ្រៀតជ្រែកកិច្ចការផ្ទៃក្នុងរបស់ចិននិងហុងកុង។
ចុះផ្សាយនៅថ្ងៃ៖
ស្តាប់ - ០២:០៣
“ចិនប្រឆាំងដាច់ខាតនឹងការចោទប្រកាន់ និងវិធានការគ្មានមូលដ្ឋានរបស់រដ្ឋាភិបាលអូស្ត្រាលី ពាក់ព័ន្ធនឹងហុងកុង”។ នេះជាសេចក្តីប្រកាសរបស់អ្នកនាំពាក្យស្ថានទូតចិនប្រចាំទីក្រុងកង់បេរ៉ា តែប៉ុន្មានម៉ោងក្រោយពីសេចក្តីសម្រេចរបស់រដ្ឋាភិបាលអូស្ត្រាលី ពន្យារទិដ្ឋាការឱ្យពលរដ្ឋហុងកុង និងព្យួរសន្ធិសញ្ញាធ្វើបត្យាប័នជាមួយហុងកុង។
នាយករដ្ឋមន្ត្រីអូស្ត្រាលីបានប្រកាសនៅថ្ងៃព្រហស្បតិ៍នេះ ពន្យារទិដ្ឋាការ ៥ឆ្នាំ ដល់ពលរដ្ឋហុងកុងប្រមាណ១ម៉ឺននាក់ដែលកំពុងស្នាក់នៅលើទឹកដីអូស្ត្រាលី និងដែលភាគច្រើនជានិស្សិត ដោយក្រោយមកទៀតពួកគេអាចមានលទ្ធភាពឱ្យសុំសិទ្ធិជ្រកកោនជាអចិន្ត្រៃយ៍តែម្តងផង។ ប្រមុខរដ្ឋាភិបាលអូស្ត្រាលី បានថែមទាំងសម្រេចព្យួរសន្ធិសញ្ញាធ្វើបត្យាប័នជាមួយហុងកុង ក្រោមហេតុផលថា ច្បាប់សន្តិសុខជាតិថ្មីនៅហុងកុង ដាក់បង្ខំដោយចិន គឺជាការប្តូរផ្លាស់មូលដ្ឋានគ្រឹះនៅហុងកុង។ ច្បាប់សន្តិសុខជាតិថ្មី ដែលទំនងជានឹងមកបំបិទសេរីភាពនិងស្វ័យភាពហុងកុង អតីតដែនដីក្រោមអាណានិគមអង់គ្លេស ត្រលប់មកជារបស់ចិននៅថ្ងៃទី ១កក្កដា ១៩៩៧វិញ ក្រោមគោលការណ៍ដែនដីស្វ័យត មានប្រព័ន្ធដឹកនាំដាច់ដោយឡែកពីចិនដីគោក។
ពីរបីនាទីមុនសុន្ទរកថារបស់នាយករដ្ឋមន្ត្រី ក្រសួងការបរទេសអូស្ត្រាលី បានណែនាំឱ្យពលរដ្ឋខ្លួនទាំងអស់ដែលគ្រោងធ្វើដំណើរទៅហុងកុងឱ្យពិចារណាឡើងវិញ។ អាជ្ញាធរកង់បេរ៉ា យល់ថាពលរដ្ឋអូស្ត្រាលីអាចប្រឈមខ្លាំងនឹងហានិភ័យនៃការចាប់ខ្លួន នៅពេលស្នាក់នៅលើទឹកដីហុងកុង ក្រោមហេតុផលមិនច្បាស់លាស់ តែដោយមានច្បាប់សន្តិសុខជាតិថ្មីដ៏ស្រពិចស្រពិលជាសំអាង។
ហុងកុងជាដៃគូពាណិជ្ជកម្មដ៏សំខាន់មួយរបស់អូស្ត្រាលី។ កាលពីខែមករា២០២០ ហុងកុងបានចុះសន្ធិសញ្ញាផ្តោះប្តូរពាណិជ្ជកម្មសេរីនឹងគ្នាផង។ ចិនក៏ជាដៃគូពាណិជ្ជកម្មដ៏ចំបងរបស់អូស្ត្រាលីដែរ តែទំនាក់ទំនងទ្វេភាគីបានធ្លាក់ចុះជាលំដាប់ ភាពតានតឹងបានកើនឡើងឥតដាច់តាំងពីប៉ុន្មានខែកន្លងមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ