ចិន និងអាមេរិកបានដាក់ទណ្ឌកម្មគ្នាទៅវិញ ទៅមកនៅក្នុងសំណុំរឿងជនជាតិភាគតិចអ៊ុយហ្គួរ
ប្រទេសចិន និងសហរដ្ឋអាមេរិកបានដំឡើងសរសៃ ក ដាក់គ្នានៅក្នុងសំណុំរឿងជនជាតិភាគតិចអ៊ុយហ្គួរក្នុងខេត្តស៊ីនជាំង ប្រទេសចិន។ នៅថ្ងៃសុក្រ ទី១០ កក្កដា រដ្ឋាភិបាលក្រុងប៉េកាំងបានប្រកាសដាក់ទណ្ឌកម្មលើថ្នាក់ដឹកនាំអាមេរិកមួយចំនួនដោយមិនបានប្រាប់អត្តសញ្ញាណទេ។ ចំណាត់ការរបស់ក្រុងប៉េកាំងយ៉ាងដូចនេះជាការសងសឹកនឹងរដ្ឋបាលក្រុងវ៉ាស៊ីនតោនដែលបានប្រកាសដាក់ទណ្ឌកម្មលើថ្នាក់ដឹកនាំចិនចំនួន ៣រូបនាថ្ងៃព្រហស្បតិ៍ ទី៩ កក្កដា។ គួរបញ្ជាក់ថា រដ្ឋបាលអាមេរិកបានចោទថ្នាក់ដឹកនាំចិនទាំង ៤ រូបពីបទបង្រ្កាប និងធ្វើទុក្ខបុកម្នេញលើពួកអ៊ុយហ្គួរ អ្នកកាន់សាសនាអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:៣៥
ចិនមិនបានប្រាប់ឈ្មោះ និងតួនាទីរបស់ថា្នក់ដឹកនាំអាមេរិកដែលខ្លួនបានដាក់ទណ្ឌកម្មទេ តែគ្រាន់បញ្ជាក់ពីចំនួនស្មើនឹងចំនួនថ្នាក់ដឹកនាំចិនដែលអាមេរិកបានដាក់ទណ្ឌកម្ម។ វិធានការរបៀបនេះគេហៅជាវិធានការម៉ាំងទៅ ម៉ាំងមក។ អ្នកនាំពាក្យក្រសួងការបរទេសចិនលោកហ្សាវ លីជាំងបានបញ្ចេញប្រតិកម្មតាមរយៈសន្និសីទកាសែតក្នុងថ្ងៃសុក្រ ទី១០ កក្កដាថា ថ្នាក់ដឹកនាំអាមេរិកដែលត្រូវទណ្ឌកម្មចិនសុទ្ធសឹងជាអ្នកមានអាកប្បកិរិយាមិនល្អទាក់ទងនឹងបញ្ហានៅខេត្តស៊ីនជាំង។ តាមលោកលីជាំង ការឈឺឆ្អាលរបស់អាមេរិកនៅស៊ីនជាំងជាការជ្រៀតជ្រែកចូលកិច្ចការផ្ទៃក្នុងរបស់ចិន និងធ្វើឲ្យប៉ះពាល់ធ្ងន់ធ្ងរដល់ទំនាក់ទំនងចិន អាមេរិក។
គេមិនអាច ឬមិនទាន់ស្គាល់ឈ្មោះថ្នាក់ដឹកនាំអាមេរិកដែលរងទណ្ឌកម្មចិនទេ តែអាមេរិកបានប្រាប់ឈ្មោះថ្នាក់ដឹកនាំចិនចំនួន ៤ នាក់ដែលខ្លួនបានដាក់ទណ្ឌកម្ម។ អ្នកទាំង ៤ ជាអ្នកទទួលខុសត្រូវ និងជាអតីតអ្នកទទួលខុសត្រូវនៅក្នុងខេត្តស៊ីនជាំងទាំងអស់ គឺលោកចេន គ័ងហ្គ៊ូ លោកវ៉ាង មីនឆាន លោកហ៊ូ លីវជុន និងលោកហ៊្សូ ហៃលុន។ លោកវ៉ាង មីនឆានជាអ្នកទទួលខុសត្រូវសន្តិសុខសាធារណៈ លោកហ៊្សូ ហៃលុនជាអតីតអ្នកទទួលខុសត្រូវ និងលោកហ៊ូ លីវជុនជាអតីតអ្នកទទួលខុសត្រូវសន្តិសុខសាធារណៈ។ ចំណែកលោកចេន គ័ងហ្គ៊ូជាអ្នកទទួលខុសត្រូវដ៏សំខាន់នៃគណបក្សកុម្មុយនិស្តចិនក្នុងខេត្តស៊ីនជាំង និងត្រូវបានគេចាត់ទុកជាអ្នករៀបចំនយោបាយសន្តិសុខសម្រាប់ខេត្តស៊ីនជាំង។
រដ្ឋាភិបាលក្រុងប៉េកាំងធ្លាប់បានសរសើរថា តាំងពីការគ្រប់គ្រងរបស់លោកចេន គ័ងហ៊្គូតាមរយៈការបង្កើតប្រព័ន្ធឃ្លាំមើល និងការត្រួតពិនិត្យជាច្រើន ដូចយ៉ាងដាក់ទ្វារសន្តិសុខចាប់គ្រឿងផ្ទុះនៅតាមច្រកចេញ ចូលអាគារសាធារណៈ កាំមេរ៉ាទទួលស្គាល់ផ្ទៃមុខ ឬព្រងឹងការត្រួតពិនិត្យអត្តសញ្ញាណមក ខេត្តស៊ីនជាំងមិនដែលកើតមានអំពើភេរវកម្មទេ។ រដ្ឋបាលក្រុងវ៉ាស៊ីនតោនបានចោទអ្នកទទួលខុសត្រូវ និងជាអតីតអ្នកទទួលខុសត្រូវខេត្តស៊ីនជាំងទាំង ៤នាក់ពីបទបង្រ្កាប និងធ្វើទារុណកម្មលើជនជាតិភាគតិចអ៊ុយហ្គួរ អ្នកកាន់សាសនាអ៊ីស្លាម។ ក្រុមអ្នកជំនាញ និងអង្គការសិទ្ធិមនុស្សបានចោទចិនពីបទឃុំពួកអ៊ុយហ្គួររហូតដល់ ១លាននាក់នៅក្នុងជំរំក្រោមផ្លាកយុទ្ធនាការប្រឆាំងភេរវនិយម។
តែចិនតែងចេញមុខជំទាស់នឹងតួលេខនេះ និងថា ជំរំនោះជាមជ្ឈមណ្ឌលអប់រំវិជ្ជាជីវៈ ហើយពួកអ៊ុយហ្គួរត្រូវបានបញ្ជូនទៅឲ្យរៀនសូត្រនៅទីនោះដើម្បីជួយពួកគេឲ្យស្រួលរកការងារធ្វើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ