បក្សប្រជាធិបតេយ្យហុងកុងរៀបចំការបោះឆ្នោតបឋមមួយទោះមានការព្រមានពីរដ្ឋាភិបាល
បណ្តាគណបក្សគាំទ្រលទ្ធិប្រជាធិបតេយ្យនៅហុងកុង កាលពីថ្ងៃសៅរ៍ទី១១ កក្កដាម្សិលមិញ បានរៀបចំការបោះឆ្នោតជាបឋមមួយ ដើម្បីជ្រើសរើសតំណាងរបស់ខ្លួនសម្រាប់ចូលរួមក្នុងការបោះឆ្នោតសភានាខែកញ្ញាខាងមុខ។ ការបោះឆ្នោតនេះធ្វើឡើង បើទោះបីជាមានការព្រមានពីរដ្ឋអំណាចហុងកុងថាវាអាចនឹងរំលោភលើច្បាប់សន្តិសុខជាតិថ្មីដែលកណត់ដោយចិនយ៉ាងណាក៏ដោយ។
ចុះផ្សាយនៅថ្ងៃ៖
ស្តាប់ - ០២:០៦
ដើម្បីជ្រើសរើសតំណាងរបស់ខ្លួន សម្រាប់ការបោះឆ្នោតជ្រើសរើសសមាជិកក្រុមប្រឹក្សានីតិបញ្ញត្តិនាពេលខាងមុខ ក្រុមអ្នកគាំទ្រលទ្ធិប្រជាធិបតេយ្យជាច្រើនពាន់នាក់ បានខំឈរតម្រង់ជួរទាំងក្រោមកម្តៅថ្ងៃក្តៅហែងនៅតាមមុខមណ្ឌលបោះឆ្នោតនានានៅទូទាំងក្រុងហុងកុងទាំងមូល។
បើតាមការឲ្យដឹងពីក្រុមអ្នករៀបចំការបោះឆ្នោត មានមនុស្សជិត ៦ ម៉ឺននាក់ បានបោះឆ្នោតរួចរាល់ក្នុងរយៈពេលតែបីម៉ោងប៉ុណ្ណោះ នៅតាមមណ្ឌលបោះឆ្នោតក្រៅផ្លូវការសរុបទាំងអស់ប្រមាណ ២៥០ មណ្ឌល។
សកម្មជនលទ្ធិប្រជាធិបតេយ្យលោកប៊ែនី តៃ (Benny Tai) ជាអ្នកជំនាញខាងច្បាប់ និងជាអ្នកសហការរៀបចំការបោះឆ្នោតបឋមខាងលើ បាននិយាយថា ទទួលរងនូវការបង្ក្រាបកាន់តែច្រើន ប្រជាជនហុងកុងកាន់តែរឹងមាំឡើង។
គួរកត់សម្គាល់ថា សកម្មជនលទ្ធិប្រជាធិបតេយ្យ បានរៀបចំការបោះឆ្នោតជ្រើសតំណាងរបស់ខ្លួន ដើម្បីចូលរួមក្នុងការបោះឆ្នោតសភាហុងកុង បើទោះបីជាមានការព្រមានពីមន្ត្រីរដ្ឋាភិបាលហុងកុងយ៉ាងណាក្តី។
ជាក់ស្តែង កាលពីថ្ងៃទី៩ កក្កដា មន្ត្រីរដ្ឋាភិបាលហុងកុងលោកអ៊ែរីក ឆាង (Erick Tsang) បាននិយាយប្រាប់បណ្តាកាសែតដែលមាននិន្នាការគាំទ្រក្រុងប៉េកាំងថា ការរៀបចំនិងចូលរួមការបោះឆ្នោតបឋមរបស់បក្សប្រជាធិបតេយ្យ អាចចាត់ចូលជាទង្វើបះបោរ ការធ្វើវិទ្ធង្សនានិងការឃុបឃិតជាមួយកម្លាំងបរទេស។
យ៉ាងណាក៏ដោយ លោកអ៊ូ ណុកហ៊ីន ជាអតីតសមាជិកសភាហុងកុងម្នាក់ដែលគាំទ្រលទ្ធិប្រជាធិបតេយ្យនិងជាអ្នកសហការរៀបចំការបោះឆ្នោតជាមួយសកម្មជនប្រជាធិបតេយ្យ បានអះអាងថា ការលើកឡើងរបស់មន្ត្រីរដ្ឋាភិបាលហុងកុងគ្មានមូលដ្ឋានគ្រឹះច្បាស់លាស់និងគ្មានហេតុផលត្រឹមត្រូវតាមច្បាប់ឡើយ។
លោកអ៊ូ បានមានប្រសាសន៍ដែរថា ប្រសិនណាបើសូម្បីតែការបោះឆ្នោតជ្រើសរើសតំណាងរបស់អ្នកប្រជាធិបតេយ្យក៏ត្រូវគេបង្ក្រាបដែរហើយនោះ វាមានន័យថា រដ្ឋាភិបាលហុងកុងគ្មានការអត់អោនឡើយចំពោះក្រុមអ្នកប្រឆាំង ហើយរដ្ឋាភិបាលហុងកុងក៏គ្មានភាពអត់ធ្មត់ដែរក្នុងការទទួលយករបបសង្គមមួយដែលមានភាពចម្រុះនិងសិទ្ធិបោះឆ្នោតរបស់ពលរដ្ឋហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ