សេដ្ឋកិច្ចកូរ៉េខាងត្បូង ដើរថយក្រោយ ដោយសារតែកូវីដ១៩
នៅត្រីមាសទី២ ក្នុងឆ្នាំ២០២០នេះ សេដ្ឋកិច្ចកូរ៉េខាងត្បូង បានដើរថយក្រោយ ដល់ទៅ២,៩% បើប្រៀបធៀបទៅរយៈពេលដដែល នៅឆ្នាំមុន។ នេះគឺជាកម្រិតធ្លាក់ចុះខ្លាំងបំផុត សម្រាប់ប្រទេសមហាអំណាចសេដ្ឋកិច្ចអាស៊ីមួយនេះ បើគិតចាប់ពីឆ្នាំ១៩៩៨មក។ ការឆ្លងរាលដាលជំងឺកូវីដ១៩ បានធ្វើឲ្យវិស័យផលិតកម្ម និង ការនាំចេញរបស់កូរ៉េខាងត្បូង ធ្លាក់ចុះជាខ្លាំង នៅក្នុង២ត្រីមាសឆ្នាំ២០២០នេះ។
ចុះផ្សាយនៅថ្ងៃ៖
ស្តាប់ - ០២:១៧
ធនាគារជាតិកូរ៉េខាងត្បូង បានបង្ហាញតួលេខ បញ្ជាក់ថា សេដ្ឋកិច្ចកូរ៉េខាងត្បូង បានដើរថយក្រោយ ចំនួន២,៩% នៅក្នុងត្រីមាសទី២ឆ្នាំ២០២០ បើប្រៀបធៀបទៅឆ្នាំមុន។ ហើយនៅរវាង ត្រីមាសទី១ និងត្រីមាសទី២ឆ្នាំនេះ សេដ្ឋកិច្ចកូរ៉េខាងត្បូង បានដើរថយក្រោយ ដល់ទៅ៣,៣% ដែលនេះគឺជាកម្រិតធ្លាក់ចុះ ខ្លាំងបំផុត បើគិតចាប់ពីវិបត្តិសេដ្ឋកិច្ច នៅឆ្នាំ១៩៩៨។
គួរបញ្ជាក់ថា កូរ៉េខាងត្បូង គឺជាប្រទេសដំបូងគេបន្ទាប់ពីចិន ដែលបានទទួលរងនូវការឆ្លងរាលដាលជំងឺកូវីដ១៩។ ទាក់ទិននឹងបញ្ហានេះ រដ្ឋាភិបាលកូរ៉េខាងត្បូង បានចាត់វិធានការ យ៉ាងស្វាហាប់ មានប្រសិទ្ធិភាព ដោយបានគ្រប់គ្រងការឆ្លងរាលដាលបាន។ ទោះជាយ៉ាងនេះក្តី កូរ៉េខាងត្បូង នៅតែមិនអាចគេចផុត ពីវិបត្តិសេដ្ឋកិច្ចបានទេ ដោយសារតែការរាំងស្ទះជាទូទៅ ក្នុងសេដ្ឋកិច្ចសកលលោក។
កូរ៉េខាងត្បូង ប្រទេសសេដ្ឋកិច្ចនាំមុខ លំដាប់ទី៤នៅអាស៊ី និងលំដាប់ទី១២ទូទាំងពិភពលោក។ សេដ្ឋកិច្ចកូរ៉េខាងត្បូងរំពឹងយ៉ាងខ្លាំង ទៅលើវិស័យនាំចេញ ដែលមានតម្លៃប្រមាណ៤០% នៃចំណូលដុលរបស់ប្រទេសនេះ។ ដោយសារវិបត្តិកូវីដ១៩ វិស័យនាំចេញរបស់កូរ៉េខាងត្បូង បានដើរថយក្រោយ ដល់ទៅ១៣,៦% នៅត្រីមាសទី២។ ធនាគារជាតិកូរ៉េខាងត្បូង បានលើកឡើងថា បញ្ហានេះ គឺបណ្តាលមកពីការធ្លាក់ចុះ នៃការនាំចេញទំនិញសំខាន់ៗ មួយចំនួន មានដូចជា រថយន្ត ផលិតផលធ្យូងថ្ម និងប្រេងឥន្ទនៈ។
គួររំលឹកថា ធនាគារជាតិកូរ៉េខាងត្បូង ធ្លាប់បានព្យាករថា ចំណូលដុលក្នុងស្រុក របស់កូរ៉េខាងត្បូង អាចនឹងដើរថយក្រោយ ប្រមាណជា០,២% ក្នុងឆ្នាំ២០២០នេះ។ តែកាលពីសប្តាហ៍មុន លោក Lee Ju-Yeol ទេសាភិបាលធនាគារជាតិកូរ៉េខាងត្បូង បានលើកឡើងថា ដោយយោងលើភាពធ្ងន់ធ្ងរនៃវិបត្តិ ការធ្លាក់ចុះនៃចំណូលដុល អាចនឹងមានខ្លាំងជាងនេះ។
សូមបញ្ជាក់ថា យោងតាមការព្យាកររបស់មូលនិធិរូបិយវត្ថុអន្តរជាតិ សេដ្ឋកិច្ចកូរ៉េខាងត្បូង អាចនឹងដើរថយក្រោយ ប្រមាណ២,១% ។ តែយ៉ាងណា លោក Hong Nam-Ki រដ្ឋមន្ត្រីសេដ្ឋកិច្ច និងហិរញ្ញវត្ថុ បានអះអាងថា អ្នកជំនាញសង្ឃឹមថា សេដ្ឋកិច្ចកូរ៉េខាងត្បូង អាចនឹងស្ទុះឡើងវិញ នៅរវាងត្រីមាសទី៣ឆ្នាំនេះ ខណៈដែលការឆ្លងរាលកូវីដ១៩នឹងថយចុះ ឯសកម្មភាពសេដ្ឋកិច្ចពិភពលោក នឹងចាប់ផ្តើមដំណើរការឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ