អូស្ត្រាលីរួមជាមួយ អាមេរិក ដើម្បីប្រឆាំងការទាមទាររបស់ចិន នៅសមុទ្រចិនខាងត្បូង
អូស្ត្រាលីបានចេញមុខជាផ្លូវការប្រឆាំងនឹងការទាមទារគ្រប់គ្រងរបស់ចិន នៅសមុទ្រចិនភាគខាងត្បូង។ នៅក្នុងលិខិតផ្លូវការទៅកាន់អង្គការសហប្រជាជាតិ កាលពីថ្ងៃព្រហស្បតិ៍ រដ្ឋាភិបាលអូស្ត្រាលី បានចាត់ទុក ការទាមទារសិទ្ធិគ្រប់គ្រងរបស់ចិន នៅសមុទ្រចិនខាងត្បូងថា ធ្វើឡើងដោយគ្មានមូលដ្ឋានច្បាប់ត្រឹមត្រូវ។
ចុះផ្សាយនៅថ្ងៃ៖
ស្តាប់ - ០២:១៣
ទីក្រុងប៉េកាំងទាមទារសិទ្ធិគ្រប់គ្រងសមុទ្រចិនខាងត្បូង ដោយផ្អែកទៅលើសិទ្ធិជាប្រវត្តិសាស្រ្ត នៅសមុទ្រចិនខាងត្បូង ដែលចិនបានរកឃើញ និងដែលបានធ្វើអាជីវកម្ម ជាច្រើនសតវត្សរ៍មកហើយ។ ប៉ុន្តែ ទីក្រុងកង់បេរ៉ាបដិសេធមិនទទួលស្គាល់ ការទាមទាររបស់ចិន ដែលយោងទៅលើសិទ្ធិជាប្រវត្តិសាស្រ្ត ឬក៏ផលប្រយោជន៍ដែលចិនធ្លាប់មានតាំងពីអតីតកាលនោះទេ។
សម្រាប់កង់បេរ៉ា គ្មានច្បាប់ណាមួយ ដែលអនុញ្ញាតឲ្យចិនគូស កំណត់ខ្សែបន្ទាត់ព្រំដែន ដើម្បី ទាមទារគ្រប់គ្រង ប្រជុំកោះ ដែនទឹក នៅសមុទ្រចិនខាងត្បូងនោះទេ។ រដ្ឋាភិបាលចិនបានទាមទារគ្រប់គ្រងសមុទ្រចិនខាងត្បូង ទាំងមូល ដោយផ្អែកទៅលើខ្សែបន្ទាត់ nine-dash-line នៅលើផែនដីដែនទឹក របស់ចិន កាលពីឆ្នាំ ១៩៤០។ ការទាមទារអធិបតេយ្យភាពរបស់ចិន ទៅលើសមុទ្រចិន ខាងត្បូង ដែលស្ថិតនៅចម្ងាយជាង២ពាន់គីឡូម៉ែត្រពីឆ្នេរសមុទ្រចិន បានទៅក្តោបក្រសោបតំបន់ប្រជុំកោះ Spratly និងParacel ដែលប្រទេសវៀតណាម ហ្វីលីពីន ម៉ាឡេស៊ី ព្រុយណេ និងតៃវ៉ាន់ ទាមទារជាម្ចាស់កម្មសិទ្ធិ។
នៅក្នុងលិខិតប្រឆាំងជាផ្លូវការទៅកាន់អង្គការសហប្រជាជាតិ អូស្ត្រាលី បានចាត់ទុកផងដែរ ថា ការសាងសង់កោះសិប្បនិម្មិត នៅលើថ្មប៉ប្រះទឹក នៅសមុទ្រចិនខាងត្បូង ធ្វើឡើងដោយគ្មានមូលដ្ឋានច្បាប់ត្រឹមត្រូវ។ នៅឆ្នាំ ២០១៦ តុលាការ អចិន្រ្តៃយ៍នៃអាជ្ញាកណ្តាល ដែលជាស្ថាប័នរបស់អង្គការសហប្រជាជាតិ មានទីតាំងនៅទីក្រុងឡាអេ ធ្លាប់បានសម្រេច ថា ការទាមទាររបស់ចិន នៅសមុទ្រចិនខាងត្បូង បានធ្វើឡើងដោយមិនបានពឹងផ្អែកលើមូលដ្ឋានច្បាប់។ ប៉ុន្តែ ចិនវិញមិនបានស្តាប់ គោរពតាមការសម្រេចរបស់តុលាការអន្តរជាតិនោះទេ។
តាមអ្នកជំនាញ សេចក្តីប្រកាសផ្លូវការរបស់អូស្ត្រាលី ដើម្បីប្រឆាំងនឹងអធិបតេយ្យភាពរបស់ចិន នៅសមុទ្រចិនខាងត្បូងនៅពេលនេះ បានស្តែងឲ្យឃើញពីការងាករេ របស់អូស្ត្រាលី ដែលធ្លាប់តែអំពាវនាវឲ្យភាគីជម្លោះនៅសមុទ្រចិនខាងត្បូង ដោះស្រាយបញ្ហា ដោយផ្អែកទៅលើច្បាប់អន្តរជាតិ។ ការប្រកាន់ជំហរប្រឆាំង ការទាមទារអធិបតេយ្យរបស់ចិន នៅសមុទ្រចិនខាងត្បូងធ្វើឡើង នៅមុនជំនួបប្រចាំឆ្នាំ អូស្ត្រាលី អាមេរិក ដែលត្រូវប្រព្រឹត្តទៅ នៅថ្ងៃអង្គារសប្តាហ៍ក្រោយ នៅទីក្រុងវ៉ាស៊ីនតោន។
ដោយបដិសេធមិនទទួលស្គាល់ការទាមទារអធិបតេយ្យភាពរបស់ចិន នៅសមុទ្រចិនខាងត្បូង អូស្រ្តាលីកំពុងចូលរួមកៀកស្មាជាមួយអាមេរិក ដែលទើបចោទប្រកាន់ទីក្រុងប៉េកាំងថា កំពុងវាតទីចង់បានទឹកដី និងប្រភពធនធានធម្មជាតិ ដោយខុសច្បាប់ នៅសមុទ្រចិនខាងត្បូង។ នៅដើមខែកក្កដានេះ ប្រមុខការបរទេសអាមេរិក ធ្លាប់បាននិយាយចាត់ទុក នយោបាយវាតទីរបស់ចិន ដើម្បី គ្រប់គ្រង ទឹកដី និងប្រភពធនធានធម្មជាតិនៅសមុទ្រចិនខាងត្បូង ថា ជារឿងខុសច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ