កូរ៉េខាងជើងប្រកាសរកឃើញករណីសង្ស័យកូវីដ១៩ ម្នាក់ដំបូង នាំមកពីកូរ៉េខាងត្បូង
នៅថ្ងៃអាទិត្យទី ២៦ កក្កដា ២០២០នេះ លោក គីម ជុងអ៊ុន ប្រមុខដឹកនាំប្រទេសកូរ៉េខាងជើងបានប្រកាសដាក់ក្រុង កែសុង ដែលស្ថិតនៅជាប់ព្រំដែនជាមួយប្រទេសកូរ៉េខាងត្បូង ក្នុងភាពអាសន្ន ខ្ពស់បំផុត និងបានបញ្ជាឱ្យបិទខ្ទប់ក្រុងនេះ ក្រោយពីរកឃើញមានករណីសង្ស័យឆ្លងកូវីដ១៩ម្នាក់។ ជនសង្ស័យកូវីដ១៩នោះទំនងជាបានលួចឆ្លងចូលក្នុងទឹកដីកូរ៉េខាងជើងដោយខុសច្បាប់កាលពីថ្ងៃទី ១៩ កក្កដា ២០២០។ នេះបើតាមភ្នាក់ងារសារព័ត៌មានផ្លូវការកូរ៉េខាងជើង KCNA។
ចុះផ្សាយនៅថ្ងៃ៖
ស្តាប់ - ០២:០៩
ភ្នាក់ងារព័ត៌មានផ្លូវការកូរ៉េខាងជើង មិនបានបញ្ជាក់អំពីការធ្វើតេស្តកូវីដ១៩ លើរូបជនសង្ស័យនោះទេ តែបានធ្វើការវិភាគរោគវិនិច្ឆ័យ ទើបសម្រេចបញ្ជូនជនសង្ស័យនោះទៅដាក់ឱ្យនៅដាច់ដោយឡែកពីគេ និងសួរចម្លើយ ដើម្បីដឹងថាមានជួបទាក់ទងមនុស្សណាខ្លះ។ អ្នកដែលបានជួបជនសង្ស័យក្នុងអំឡុងពេល៥ថ្ងៃមកនេះ នឹងត្រូវស្ថិតនៅក្រោមការតាមដានអង្កេតយ៉ាងស៊ីជម្រៅ។
កូរ៉េខាងជើងមិនបានបញ្ជាក់ ថាតើជនសង្ស័យកូវីដ១៩នោះ អាចលួចឆ្លងព្រំដែនពីកូរ៉េខាងត្បូងមកកូរ៉េខាងជើង បានយ៉ាងដូចម្តេចឡើយ។ តែបើតាមភ្នាក់ងារ ជនសង្ស័យផ្ទុកកូវីដ១៩ ទំនងជាជនល្មើសដែលបានរត់គេចទៅចុះចូលនឹងកូរ៉េខាងត្បូង កាលពីបីឆ្នាំមុន ដែលអាជ្ញាធររកឃើញនៅក្រុងកែសុង។ ក្រុងកែសុង ដែលពេលនេះត្រូវបិទខ្ទប់ និងដាក់ក្នុងភាពអាសន្នខ្ពស់បំផុត ដើម្បីទប់ស្កាត់ការរាតត្បាត ក្រោយជំនួបប្រជុំបន្ទាន់ ដឹកនាំដោយប្រមុខលោក គីមជុងអុន នៅល្ងាចថ្ងៃសៅរ៍ទី ២៥កក្កដា២០២០។
ប៉ុន្តែប្រភពមកពីកូរ៉េខាងត្បូងបានបដិសេធថាគ្មានទទួលដំណឹងអ្វីទាក់ទងនឹងការប៉ុនប៉ងលួចឆ្លងព្រំដែនដោយខុសច្បាប់ ក្នុងតំបន់នេះទេ។ តំបន់ព្រំដែន ឬតំបន់គ្មានកងទ័ពដែលមានការការពារយ៉ាងតឹងតែងនិងបំពាក់អាវុធ រាយមីនយ៉ាងសន្ធឹកសន្ធាប់បំផុតជាងគេនៅលើលោក។
ប្រសិនបើជនសង្ស័យនេះពិតជាមានកូវីដ១៩មែន នេះជាករណីដំបូងបំផុតសម្រាប់កូរ៉េខាងជើងហើយ។ បើទោះបីជាមានព្រំដែនប្រវែង១៤០០គីឡូម៉ែត្រជាមួយចិន ដែលរងគ្រោះកូវីដ១៩ច្រើនក៏ដោយ ក៏ព្យុងយ៉ាងតែងអះអាងរហូតមកថាពុំមានករណីក្នុងប្រទេសរបស់ខ្លួនឡើយ។ ប៉ុន្តែអ្នកវិភាគយល់ថា កូរ៉េខាងជើងទំនងជាមានករណីនាំចូលកូវីដ១៩មកពីចិនតាមរយៈប្រជាពលរដ្ឋដែលតែងលួចឆ្លងទៅរកទំនិញជារៀងរាល់ថ្ងៃ មុនការបិទព្រំដែនទៅទៀត។
តាំងពីកូវីដ១៩ផ្ទុះឡើង ព្យុងយ៉ាងបានទទួលជំនួយជាកញ្ចប់ធ្វើតេស្តរាប់ពាន់គ្រឿងពីរុស្ស៊ី និងប្រទេសមួយចំនួនទៀត។ មនុស្សរាប់ម៉ឺននាក់ត្រូវជាប់បង្ឃាំងជាកិច្ចការពារ ហើយកូរ៉េខាងជើងក៏ទើបចាប់ផ្តើមលើកបម្រាមវិញនាពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ