Huawei ដណ្តើមតំណែងពីSamsung ក្នុងនាមជាក្រុមហ៊ុនលក់ទូរស័ព្ទដៃច្រើនជាងគេក្នុងលោក
ក្រុមហ៊ុនបច្ចេកវិទ្យាចិន Huawei បានយកឈ្នះ ក្រុមហ៊ុន Samsung របស់កូរ៉េខាងត្បូង ក្នុងនាមជាក្រុមហ៊ុនដែលបានលក់ទូរស័ព្ទដៃច្រើនជាងគេក្នុងពិភពលោក។ តាមក្រុមហ៊ុនស្រាវជ្រាវ និងវិភាគផ្នែកបច្ចេកវិទ្យា និងទូរស័ព្ទ Canalys បើទោះជាកំពុងជួបឧបសគ្គ នៅទីផ្សារបរទេស ដោយសារការដាក់ទណ្ឌកម្ម របស់អាមេរិក ប៉ុន្តែ ក្រុមហ៊ុនHuawei អាចលក់ទូរស័ព្ទបានដល់ទៅជាង ៥៥លានគ្រឿង នៅត្រីមាសទី២ ពោល គឺវ៉ាដាច់ ក្រុមហ៊ុនSamsung ដែលធ្លាប់ជាក្រុមហ៊ុន លក់ទូរស័ព្ទបានច្រើនជាងគេក្នុងលោក។
ចុះផ្សាយនៅថ្ងៃ៖
ស្តាប់ - ០២:១០
នៅក្នុងរយៈពេល ៩ឆ្នាំចុងក្រោយនេះ វាជាលើកទី១ ដែលក្រុមហ៊ុនផ្សេង ក្រៅពី Samsung និងក្រុមហ៊ុនApple អាចឈានមុខគេ ក្នុងទីផ្សារលក់ទូរស័ព្ទដៃ។ តាមក្រុមហ៊ុនវិភាគតាមដានបច្ចេកវទ្យា និងទូរស័ព្ទដៃ Canalys ក្រុមហ៊ុនHuawei បានវ៉ាដាច់ ជាលើកទី១ ក្រុមហ៊ុនSamsung ដែលធ្លាប់ជាក្រុមហ៊ុន លក់ទូរស័ព្ទដៃបានច្រើនជាងគេក្នុងពិភពលោក។ នៅត្រីមាសទី២នេះ ក្រុមហ៊ុនSamsungលក់ទូរស័ព្ទដៃបានតែ ៥៣.៧លានគ្រឿងប៉ុណ្ណោះ ចំណែក Huawei វិញលក់បានទូរស័ព្ទ ដៃ ជាង ៥៥.៨លានគ្រឿង។
តាមCanalys ៧០ភាគរយនៃទូរស័ព្ទរបស់ Huawei ត្រូវគេទិញ នៅក្នុងទីផ្សារក្នុងស្រុក ជាទីដែលក្រុមហ៊ុនកូរ៉េខាងត្បូង Samsung មានចំណែកលក់តិចបំផុត។
ផ្ទុយទៅវិញ ការលក់ទូរស័ព្ទរបស់ក្រុមហ៊ុន Huawei នៅទីផ្សារបរទេសបានធ្លាក់ថយចុះ អស់១ភាគ៣ នៅត្រីមាសទី២។ ទណ្ឌកម្មរបស់អាមេរិក បានធ្វើឲ្យ Huaweiពិបាកនឹងលក់ទូរស័ព្ទ របស់ខ្លួន នៅទីផ្សារបរទេស។
សម្រាប់អ្នកវិភាគរបស់Canalys បុកគ្រឹះខ្លាំងក្នុងទីផ្សារក្នុងស្រុកចិនតែមួយ មិនគ្រប់គ្រាន់នោះទេ ជាពិសេស នៅពេលសេដ្ឋកិច្ចសកលចាប់ងើបដើរឡើងវិញ។ ដៃគូសំខាន់របស់ក្រុមហ៊ុនចិន Huawei គឺអឺរ៉ុប ប៉ុន្តែ អរិភាព និងការដាក់សម្ពាធពីអាមេរិក បានធ្វើឲ្យរដ្ឋាភិបាលអឺរ៉ុបជាច្រើន ផ្លាស់ប្តូរ លែងប្រើផលិតផលរបស់ក្រុមហ៊ុន Huawei និងត្រូវបង្ខំចិត្ត ជ្រើសរើសផលិតផលរបស់ក្រុមហ៊ុនផ្សេងមកជំនួសវិញ។
Huaweiជាក្រុមហ៊ុនផលិតឧបករណ៍ បណ្តាញទូរគមនាគមន៍ធំជាងគេក្នុងពិភពលោក។ ប៉ុន្តែ Huaweiបានស្ថិតក្នុងបញ្ជីខ្មៅរបស់អាមេរិក ដែល ចោទក្រុមហ៊ុនឯកជនរបស់ចិនមួយនេះថា ធ្វើការលួចយកការណ៍ សម្ងាត់ឲ្យកងទ័ពចិន។ អាមេរិកបានហាមមិនឲ្យ Huaweiចូលក្នុងទីផ្សាររបស់ខ្លួន និងបានគំរាមប្រទេសដទៃ មិនឲ្យស្វាគម ប្រើផលិតផលរបស់ Huawei។
នៅដើមខែនេះ អង់គ្លេស សុខចិត្តធ្វើតាមអាមេរិក ដោយយល់ព្រមដកប្រព័ន្ធ 5G របស់ក្រុមហ៊ុន Huaweiពីអង់គ្លេស យ៉ាងយូរ បំផុត នៅឆ្នាំ ២០២៧។ នៅថ្ងៃពុធ កន្លងទៅអាមេរិកនៅបានគំរាមរដ្ឋាភិបាលប្រេស៊ីល ពីផលវិបាក នានា ប្រសិនបើប្រេស៊ីល ជ្រើសរើស Huaweiសម្រាប់គម្រោងអភិវិឌ្ឍបច្ចេកវិទ្យាទូរទគមនាគមនជំនាន់ថ្មី នៅក្នុងទឹកដីរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ