ហ្វីលីពីន ៖ ស្លាប់យ៉ាងហោច១៤នាក់ ក្នុងភេរវកម្មពីរផ្ទួនគ្នានៅJolo
មានស្លាប់យ៉ាងហោច១៤នាក់ និងរបួស៧៥នាក់ នៅក្នុងភេរវកម្មពីរផ្ទួនៗ នៅលើកោះហ្សូឡូប្រទេសហ្វីលីពីន ក្នុងថ្ងៃចន្ទទី ២៤សីហា ២០២០។ កោះហ្សូឡូ ដែលស្ថិតនៅភាគខាងត្បូងប្រទេស ជាជង្រុកអង្គការអ៊ីស្លាមជ្រុលនិយម ជីហាត អាប៊ូ សាយ៉ាហ្វ Abou Sayyaf។
ចុះផ្សាយនៅថ្ងៃ៖
ស្តាប់ - ០១:៥១
ជាសរុប យោធា៧នាក់ ប៉ូលិសម្នាក់ និងជនស៊ីវិល៦ បានស្លាប់ និងជនស៊ីវិល៤៨នាក់ ទាហាន២១នាក់ និងប៉ូលិស៦នាក់រងរបួស នៅក្នុងគ្រោះភេរវកម្មបំផ្ទុះគ្រាប់បែកច្នៃពីរ កន្លែងក្នុងផ្លូវតែមួយ នៃក្រុងហ្សូឡូ។ នេះបើតាមការលម្អិតរបស់ឧត្តមសេនីយ៍Corleto Vinluan។
បំផ្ទុះទីមួយ កើតឡើងនៅជិតផ្សារ ដោយការបង្កៃគ្រាប់បែកជាប់នឹងម៉ូតូ។ យោធាម្នាក់បានឃើញម្ចាស់ម៉ូតូជិះចូលមកចតហាងលក់គ្រឿងទេស ដែលមានមនុស្សម្នា ជាពិសេសកងកម្លាំងយោធានៅជុំគ្នាច្រើន។ គ្រាន់តែចតរួចភ្លាម គ្រាប់បែកក៏បានផ្ទុះឡើង។ ហើយនៅពេលប៉ូលិសរត់មកសំដៅធ្វើអន្តរាគមន៍ កន្លែងកើតហេតុទីមួយ ក្នុងផ្លូវដដែលនោះ ភេរវជនអត្តឃាតស្រីម្នាក់ ក៏ចុចបំផ្ទុះខ្សែក្រវ៉ាត់ភ្លាម ពេលទាហានចង់ឃាត់ឆែកឆេរ។ នេះបើតាមការរៀបរាប់របស់អ្នកទទួលខុសត្រូវយោធាហ្វីលីពីន។
ភេរវកម្មនេះ ទំនងជាស្នាដៃរបស់ក្រុមអាប៊ូសាយ៉ាហ្វនេះ។ មានទម្លាប់និងជំនាញខាងចាប់ជំរិត ក្រុមអាប៊ូសាយ៉ាហ្វ ទំនងជាចង់សងសឹកនឹងអាជ្ញាធរហ្វីលីពីន ដែលទើបចាប់ខ្លួន អាប់ឌុលជីហាដ ស៊ូស៊ូកាន ជាមេក្លោង នៅកោះមីនដាណាវ កាលពីប៉ុន្មានសប្តាហ៍មុន។ ស៊ូស៊ូកាន ជាប់ចោទពីបទធ្វើឃាតចំនួន២៣ករណី ពីបទចាប់ជំរិត៥ករណី និងប៉ុនប៉ងធ្វើមនុស្សឃាត ៦ករណី។
អ្នកនាំពាក្យប្រធានាធិបតី បានចេញមុខថ្កោលទោសទង្វើភេរវកម្មនេះភ្លាម និងបានអំពាវនាវឱ្យប្រជាពលរដ្ឋកោះហ្សូឡូ ប្រុងប្រយ័ត្ន និងប្រាប់កងកម្លាំងសន្តិសុខភាពនៅពេលឃើញមានសកម្មភាពជនណាគួរឱ្យសង្ស័យ។
សូមបញ្ជាក់ថាកោះហ្សូឡូ ដែលមានប្រជាជនភាគច្រើនជាអ្នកកាន់សាសនាអ៊ីស្លាម គឺជាជង្រុករបស់ក្រុមអ៊ីស្លាមជ្រុលនិយមអាប៊ូសាយ៉ាហ្វ។ សហរដ្ឋអាមេរិកបានចាត់ទុកក្រុមជ្រុលនិយមនេះជាអង្គការភេរវនិយម ដែលមានបំបែកជាក្រុមតូចៗច្រើនផ្សេងទៀត ដោយខ្លះបានភ្ជាប់ខ្លួនទៅនឹងអង្គការរដ្ឋអ៊ីស្លាមផង។
ម្យ៉ាងវិញទៀត ក្រៅពីក្រុមភេរវនិយមអ៊ីស្លាម នៅមានចលនាឧទ្ទាមច្រើនផ្សេងទៀត។ ប្រជាពលរដ្ឋអ៊ីស្លាមហ្វីលីពីន ធ្លាប់ងើបឡើងកាន់អាវុធ ទាមទារស្វ័យភាព និងឯករាជ្យតំបន់ភាគខាងត្បូង ពីអំណាចកណ្តាលដែលភាគច្រើនជាអ្នកកាន់សាសនាគ្រឹស្ត និងជាម្ចាស់ទឹកដី។ ការប៉ះបោរបានផ្តាច់ជីវិតមនុស្សអស់១៥ម៉ឺននាក់។ ក្រុមឧទ្ទាមអ៊ីស្លាមធំជាងគេ ទើបបានចុះកិច្ចព្រមព្រៀងសន្តិភាពជាមួយរដ្ឋាភិបាលក្រុងម៉ានីលនៅឆ្នាំ២០១៤ ជាថ្នូរនឹងការផ្តល់ស្វ័យភាពដល់ពលរដ្ឋកាន់សាសនាអ៊ីស្លាម នៅកោះមីដាណាវ និងកោះភាគខាងនិរតីបំផុតនៃប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ