ប្រទេសប៉ាឡាវស្នើសហរដ្ឋអាមេរិកឲ្យសាងសង់មូលដ្ឋានយោធាអចិន្ត្រៃយ៍លើទឹកដីខ្លួន
នៅថ្ងៃសុក្រ ទី៤ កញ្ញា ប្រទេសប៉ាឡាវដែលស្ថិតនៅតំបន់ប៉ាស៊ីហ្វិកបានទាមទារឲ្យសហរដ្ឋអាមេរិកសាងសង់មូលដ្ឋានទ័ពអាមេរិកជាអចិន្ត្រៃយ៍នៅលើទឹកដីរបស់ខ្លួន។ ជាប្រជុំកោះតូចមួយមានប្រជាជនរស់នៅចំនួន ២២ ០០០នាក់ ប៉ាឡាវជាប្រទេសស្ថិតនៅចំកណ្តាលតំបន់មួយដែលទីក្រុងវ៉ាស៊ីនតោនកំពុងព្យាយាមអះអាងពីវត្តមានរបស់ខ្លួននៅចំពោះមុខការពង្រីកឥទ្ធិពលរបស់ចិន។ គួររម្លឹកថា ក្រៅពីមានទំនាក់ទំនងស្អិតរមួតជាមួយសហរដ្ឋអាមេរិក ប៉ាឡាវគឺជាប្រទេសមួយនៃ ៤ប្រទេសចុងក្រោយនៅប៉ាស៊ីហ្វិកដែលកំពុងបន្តទទួលស្គាល់កោះតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:១៨
គឺនាដំណើរទស្សនកិច្ចរបស់រដ្ឋមន្រ្តីក្រសួងការពារជាតិអាមេរិកលោក Mark Esper កាលពីសប្តាហ៍កន្លងទៅដែលប្រទេសប៉ាឡាវបានស្នើឲ្យសហរដ្ឋអាមេរិកកសាងមូលដ្ឋានទ័ពជាអចិន្ត្រៃយ៍លើទឹកដីខ្លួន។ ប្រធានាធិបតីប៉ាឡាវលោក Tommy Remengesau បានសារភាពថា លោកពិតជាបាននិយាយរឿងនេះជាមួយលោក Esper។ ចំណែកខុទ្ទកាល័យរបស់លោក Esper បានផ្សព្វផ្សាយក្នុងសប្តាហ៍នេះនូវលិខិតមួយដែលលោក Tommy ផ្ញើឲ្យលោក Esper។ សំណើរបស់លោក Tommy នៅក្នុងលិខិតនោះ គឺសុំឲ្យអាមេរិកសាងសង់មូលដ្ឋានទ័ពលើដី សាងសង់កំពុងផែ និងសាងសង់ផ្លូវយន្តហោះ។
ទន្ទឹមគ្នានេះ លោក Tommy ក៏បានស្នើឲ្យមានផងដែរនូវវត្តមាននាវាឆ្មាំសមុទ្រអាមេរិកនៅក្នុងដែនសមុទ្រដើម្បីជួយការពារ ឃ្លាំមើលតំបន់សមុទ្រដ៏ធំល្វឹងល្វើយរបស់ប៉ាឡាវដែលមានទំហំប៉ុនប្រទេសអេស្ប៉ាញ។ សូមជម្រាបថា ប៉ាឡាវដែលស្ថិតនៅចម្ងាយប្រមាណ ១ ៥០០គីឡូម៉ែត្រពីប្រទេសហ្វីលីពីនជារដ្ឋឯករាជ្យមួយ។ តែកូនរដ្ឋតូចមួយនេះគ្មានកម្លាំងទ័ព និងត្រូវបានការពារដោយសហរដ្ឋអាមេរិកដោយផ្អែកលើសន្ធិសញ្ញានៃសមាគមសេរី។ គឺដោយយោងលើសន្ធិសញ្ញាមួយនេះឯងដែលលោក Tommy ចង់ប្រើដើម្បីសាងសង់មូលដ្ឋានទ័ពអាមេរិកជាអចិន្ត្រៃយ៍នៅប៉ាឡាវ។
ដោយមិននិយាយចំឈ្មោះប្រទេសចិន លោក Tommy បាននិយាយបញ្ចិតបញ្ចៀងប្រាប់លោក Esper ថា មានប្រទេសអ្នកបង្កអស្ថិរភាពមួយចំនួនបានបោះជំហានចូលដើម្បីឆ្លៀតទាញប្រយោជន៍ពីវិបត្តិកូវីដ -១៩ ដែលកំពុងវាយប្រហារខ្លាំងក្លាលើសេដ្ឋកិច្ចនៃក្រុមប្រទេសតូចៗនៅក្នុងតំបន់ប៉ាស៊ីហ្វិកដែលពឹងលើទេសចរណ៍។ តាមលោក Tommy ចិនបានផ្តល់ប្រាក់កម្ចីក្នុងអាត្រាការប្រាក់ទាបឲ្យក្រុមប្រទេសតូចៗទាំងនោះដើម្បីទិញសេចក្តីស្មោះត្រង់ពីពួកគេ។ សេចក្តីស្មោះស្រង់ដែលលោក Tommy ចង់និយាយនេះ គឺការដែលចិនបានអូសទាញប្រទេសខ្លះឲ្យឈប់ទទួលស្គាល់តៃវ៉ាន់ និងត្រឡប់ទៅទទួលស្គាល់ខ្លួនវិញ។ ជាក់ស្តែងក្នុងឆ្នាំ ២០១៩ ចិនទាញបានប្រទេសនៅប៉ាស៊ីហ្វិកចំនួន ២ គឺគីរីបាទី និងកោះសាឡូម៉ុង។ ចំណែកប៉ាឡាវកំពុងបន្តទទួលស្គាល់តៃវ៉ាន់ដែលជាជម្រើសមួយនេះបានធ្វើឲ្យអ្នកទេសចរណ៍ចិនឈប់ទៅលេងប្រទេសប៉ាឡាវតាំងពីឆ្នាំ ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ