ប្រជុំរដ្ឋមន្ត្រីការបរទេសអាស៊ាន ក្នុងបរិបទវិវាទកាន់តែធំ រវាងអាមេរិកនិងចិន
នៅថ្ងៃពុធ ទី៩កញ្ញានេះ កិច្ចប្រជុំកំពូល ថ្នាក់រដ្ឋមន្ត្រីការបរទេសអាស៊ាន ត្រូវចាប់ផ្តើម នៅទីក្រុងហាណូយ តាមរយៈប្រព័ន្ធវីស្យូខុនហ្វឺរិនស៍។ កិច្ចប្រជុំកំពូលរយៈពេល៤ថ្ងៃនេះ ក៏នឹងមានវត្តមានចូលរួម ពីប្រមុខការទូតសហរដ្ឋអាមេរិក និងចិនផងដែរ។ ចិន និងសហរដ្ឋអាេមរិក មានរឿងមិនចុះសម្រុងនឹងគ្នា ជាច្រើនចំណុច ជាពិសេសទាក់ទិននឹងស្ថិរភាពតំបន់អាស៊ីប៉ាស៊ីហ្វិកនេះតែម្តង។ វាគឺជាកាលៈទេសៈដ៏លំបាក សម្រាប់ប្រទេសអាស៊ាន ដែលត្រូវស្ថិតនៅចំកណ្តាល នៃភាពប្រទាញប្រទង់ វិវាទតានតឹង រវាងមហាអំណាចទាំង២នេះ។
ចុះផ្សាយនៅថ្ងៃ៖
ចាប់ផ្តើមពីថ្ងៃទី៩ ដល់ថ្ងៃទី១២កញ្ញា កិច្ចប្រជុំកំពូលថ្នាក់រដ្ឋមន្ត្រីការបរទេសអាស៊ាន ស្ថិតចំ កាលៈទេសៈមួយដ៏លំបាក ព្រោះថា ចិន និងសហរដ្ឋអាេមរិក ដែលជាដៃគូ មិនអាចខ្វះបានរបស់អាស៊ាន កំពុងតែមានវិវាទតានតឹងនឹងគ្នា យ៉ាងខ្លាំងបំផុត។ លោក វ៉ាង យី ប្រមុខការទូតចិន និងលោក ម៉ៃ ប៉ុមប៉េអូ នឹងមានវត្តមានថ្លែងការណ៍ម្តងម្នាក់ តាមប្រព័ន្ធវីស្យូខុនហ្វឺរិនស៍ ជាមួយនឹងរដ្ឋមន្ត្រីការបរទេសអាស៊ានទាំង១០ប្រទេស។
សំណុំរឿងជម្លោះ ក្នុងសមុទ្រចិនខាងត្បូង ត្រូវគេជឿថា ពិតជាស្នូលនៃការជជែកគ្នាមិនខាន។ សំណុំរឿងនេះ ក៏ជាប្រភពនៃការបែកបាក់ផ្ទៃក្នុងផងដែរ របស់ប្រទេសសមាជិកអាស៊ាន។ ជាច្រើនខែមកហើយ ដែលចិន បានបន្តធ្វើការសាងសង់មូលដ្ឋានទ័ព និងធ្វើសមយុទ្ធយោធាក្នុងតំបន់នេះ។ ប្រការនេះ បានធ្វើឲ្យរំខានយ៉ាងខ្លាំងដល់ ស្ថិរភាពនិងសន្តិសុខ របស់ចរាចរណ៍នាវាទំនិញអន្តរជាតិ។
គួរបញ្ជាក់ថា រហូតមកទល់ពេលនេះ នៅពុំទាន់មានដំណោះស្រាយណាមួយ នៅឡើយទេ ទាក់ទិននឹងវិវាទសមុទ្រចិនខាងត្បូងនេះ។ ប្រទេសអាស៊ាន មានដូចជា វៀតណាម ម៉ាឡេស៊ី ហ្វ៊ីលីពីន ប្រ៊ុយណេ ឥណ្ឌូណេស៊ីជាដើម សុទ្ធតែជាអ្នកមានវិវាទ អធិបតេយ្យភាពដែនសមុទ្រជាមួយចិន។ សហរដ្ឋអាេមរិក ដែលចាត់ទុកថាចិនកំពុងធ្វើសកម្មភាពវាទទី ក្នុងសមុទ្រចិនខាងត្បូង បានចេញវិធានការ កាលពីខែសីហាកន្លងទៅ ដោយបាន ដាក់ទណ្ឌកម្មលើមនុស្ស ឬក្រុមហ៊ុនចិនទាំងអស់ ដែលចូលរួម នៅក្នុងសកម្មភាព សាងសង់មូលដ្ឋានទ័ព ក្នុងដែនសមុទ្រចិនខាងត្បូង។
នៅមុនពេលកិច្ចប្រជុំអាស៊ាននេះបានចាប់ផ្តើម លោកប្រមុខការទូតអាេមរិក ដែលនរណាក៏ដឹងថា ស្អប់ចិនខ្លាំងនោះ បាននិយាយថា « គណបក្សកុម្មនុយនីស្តចិន កំពុងដើរលើគំនូសមួយយ៉ាងច្បាស់ និងកាន់តែខ្លាំងឡើងៗ តាមរយៈគំរាម សំឡុតប្រទេសជិតខាង »។ នយោបាយការបរទេសអាមេរិក ក្រោមការដឹកនាំរបស់លោក ម៉ៃ ប៉ុមប៉េអូ គឺអាេមរិក បានយកចិន ធ្វើជាចំណុចស្នូល ប្រភពនៃបញ្ហាទាំងអស់។
ក្រៅពីសំណុំរឿងសមុទ្រចិនខាងត្បូងនេះ គេរំពឹងថា ប្រទេសអាស៊ានក៏អាចនឹងលើកឡើងផងដែរអំពីបញ្ហាឧបទ្វីបកូរ៉េ ការរំសាយនុយក្លេអ៊ែររបស់កូរ៉េខាងជើង ដែលស្ថិតនៅទ្រឹងមិនទៅមុខ ព្រមទាំងបញ្ហាសេដ្ឋកិច្ចតំបន់ផង ដែលបច្ចុប្បន្ន កំពុងតែជួបការលំបាកខ្លាំង ដោយសារវិបត្តិកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ