ការវិនិយោគចិន នៅអូស្ត្រាលីធ្លាក់ចុះខ្លាំង ដោយសារជម្លោះរវាងប្រទេសទាំង២
យោងតាមតួលេខផ្លូវការអូស្ត្រាលី ការវិនិយោគរបស់ចិននៅអូស្ត្រាលី បានធ្លាក់ចុះសឹងតែពាក់កណ្តាល នៅក្នុងឆ្នាំ២០១៩កន្លងទៅ។ នេះជាឆ្នាំទី៣ជាប់គ្នាហើយ ដែលតួលេខវិនិយោគរបស់ចិន នៅអូស្ត្រាលី បានធ្លាក់ចុះជាបន្តបន្ទាប់។ គួរកត់សំគាល់ថា ប្រទេសទាំង២នេះ មានជម្លោះនឹងគ្នា ជាច្រើនសំណុំរឿង ទាំងវិស័យការទូត និងពាណិជ្ជកម្ម ដែលនេះអាចជាប្រភពដែលបង្កើត ជាបរិយាកាសអព្វ័អួរ ដល់ការវិនិយោគរកស៊ី របស់ចិននៅអូស្ត្រាលី។
ចុះផ្សាយនៅថ្ងៃ៖
ស្តាប់ - ០២:២៩
ការវិនិយោគរបស់ចិន នៅអូស្ត្រាលី ក្នុងឆ្នាំ២០១៩ មានចំនួន ២៥០០លានដុល្លារអូស្ត្រាលី។ ចំនួននេះបានថយចុះ ជិតពាក់កណ្តាល បើប្រៀបធៀបទៅឆ្នាំ២០១៨ ដែលមានចំនួន៤៨០០លានដុល្លារអូស្ត្រាលី។ លោក Peter Drysdale នាយកការសិក្សានេះ បានលើកឡើងថា ក្នុងឆ្នាំ២០១៩ គ្រាន់តែ ការទិញក្រុមហ៊ុនផលិតទឹកដោះគោអូស្ត្រាលីឈ្មោះ Bellamy’s ពីសំណាក់ក្រុមហ៊ុនចិន Mengniu ដែលមានតម្លៃប្រមាណ១៤៦០លានដុល្លារអូស្ត្រាលី គឺវាស្មើនឹងពាក់កណ្តាល នៃតម្លៃវិនិយោគសរុប របស់ចិននៅអូស្ត្រាលីទៅហើយ។
អ្នកជំនាញរូបនេះបញ្ជាក់ថា កាលពីឆ្នាំ២០១៦ ការវិនិយោគរបស់ចិននៅអូស្ត្រាលី មានតម្លៃប្រមាណ ១៥៨០០លានដុល្លារអូស្ត្រាលី។ ក៏ប៉ុន្តែ៣ឆ្នាំជាប់គ្នាបន្ទាប់ គឺបានធ្លាក់ចុះជាបន្តបន្ទាប់ និងយ៉ាងលឿនបំផុត។ បើប្រៀបធៀបទៅនឹងការធ្លាក់ចុះ នៃការវិនិយោគក្រៅប្រទេសរបស់ចិន ជាទូទៅក្នុងពិភពលោក គឺនៅអូស្ត្រាលី ដែលការធ្លាក់ចុះនេះ មានកម្រិតខ្លាំងបំផុត។
លោក Peter Drysdale បានពន្យល់ថា វាច្បាស់ណាស់ ដែលថា៣ឆ្នាំចុងក្រោយនេះ គឺអ្នកវិនិយោគចិន បានមើលឃើញថា បរិយាកាសធ្វើជំនួញនៅអូស្ត្រាលី អាចមានគ្រោះថ្នាក់សម្រាប់ពួកគេ ដែលតម្រូវឲ្យពួកគេមានការប្រុងប្រយ័ត្នខ្ពស់។
សូមរំលឹកថា រដ្ឋាភិបាលអូស្ត្រាលី បានដំឡើងសំឡេងដាក់ចិន ជាច្រើនរឿង ជាពិសេសទាក់ទិននឹងការចេតនា វាទទី ជះឥទ្ធិពលរបស់ចិន មកក្នុងរង្វង់មន្ត្រីរដ្ឋអូស្ត្រាលី និង សហគ្រាសអូស្ត្រាលី។ កាលពីខែមិថុនាកន្លងទៅ រដ្ឋាភិបាលអូស្ត្រាលីបានចេញវិធានការថ្មី ដើម្បីគ្រប់គ្រងការវិនិយោគមកពីបរទេស ដោយធ្វើយ៉ាងណា រារាំងការវិនិយោគណា ដែលអាចបង្កហានិភ័យ ដល់សន្តិសុខជាតិអូស្ត្រាលី។ ជាវិធានការថ្មី ដែលត្រូវគេមើលឃើញថា អូស្ត្រាលីសំដៅទៅលើការវិនិយោគមកពីចិន។ រដ្ឋាភិបាលអូស្ត្រាលី ក៏បានហាម មិនឲ្យក្រុមហ៊ុន Huawei ចូលរួមនៅក្នុងទីផ្សារដំឡើងប្រព័ន្ធបច្ចេកវិទ្យា 5G ទេ។ បញ្ហាកូវីដ១៩ ដែលផ្ទុះចេញពីទីក្រុងវូហាន ប្រទេសចិន ក៏បានបន្ថែមបញ្ហាផងដែរ ដោយលោក ស្កុត ម៉ូរីសុន នាយករដ្ឋមន្ត្រីអូស្ត្រាលី បាននិយាយបន្ទោស ទំលាក់កំហុសលើចិន។
ជាការសងសិក ចិនបានចាត់វិធានការមួយចំនួន តបវិញ ដូចជាបានព្យួរការនាំចូលសាច់គោ ពីក្រុមហ៊ុនអូស្ត្រាលីចំនួន៤ និងបានដំឡើងពន្ធដល់ទៅ៨០% លើស្រូវសាឡីអូស្ត្រាលី។ កាលពីខែមិថុនា ចិនបានក្រើនរំឮក មិនឲ្យប្រជាជនចិន មិនថាទេសចរណ៍ ឬនិស្សិត ទៅអូស្ត្រាលីទេ ដោយហេតុតែមានករណី ហិង្សា រើសអើងប្រកាន់ពូជសាសន៍។ ថ្មីៗនេះ ចិនក៏បានបើកការស៊ើបអង្កេត ដើម្បីអាចដំឡើងពន្ធនាំចូល លើស្រាទំពាំងបាយជូអូស្ត្រាលីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ