ចិន-កូវីដ១៩៖ស្រុកចាស៊ីងក្នុងខេត្តជឺជាំងបានស្នើឲ្យពលរដ្ឋមួយចំនួនចាក់វ៉ាក់សាំងបង្ការជំងឺកូវីដ១៩
នៅក្នុងប្រទេសចិន ស្រុកចាស៊ីងស្ថិតក្នុងខេត្តជឺជាំងស្ថិតប៉ែកខាងកើតប្រទេសចិនបានស្នើឲ្យពលរដ្ឋមួយចំនួនចាក់វ៉ាក់សាំងបង្ការកូវីដ១៩។ ព័ត៌មាននេះត្រូវបានបញ្ជាក់ដោយមជ្ឈមណ្ឌលគ្រប់គ្រងជំងឺឆ្លងក្នុងស្រុកចាស៊ីង។ គឺជាវ៉ាក់សាំងដែលផលិតដោយក្រុមហ៊ុនឱសថឯកជនចិនឈ្មោះ Sinovac។ តែវ៉ាក់សាំងនេះនៅមិនទាន់ទទួលបានការអនុញ្ញាតឲ្យដាក់លក់ជាសាធារណៈនៅឡើយទេ។ បើយោងតាមអង្គការសុខភាពពិភពលោក មានវ៉ាក់សាំងរបស់ចិនសម្រាប់បង្ការកូវីដ១៩ ប្រមាណជា ១០ប្រភេទកំពុងធ្វើតេស្តិ៍លើមនុស្ស ក្នុងនោះ មាន ៤ប្រភេទបានឈានដល់ដំណាក់ការតេស្តិ៍ទី៣ ចុងក្រោយ ពោលការធ្វើតេស្តិ៍លើមនុស្សជាច្រើនរយពាន់នាក់។
ចុះផ្សាយនៅថ្ងៃ៖
ស្តាប់ - ០២:១០
តាមមជ្ឈមណ្ឌលគ្រប់គ្រងជំងឺឆ្លងក្នុងស្រុកចាស៊ីង សំណើឲ្យចាក់វ៉ាក់សាំងបង្ការកូវីដ១៩ ផលិតដោយក្រុមហ៊ុនឱសថឯកជនចិន Sinovac មិនមែនសម្រាប់ពលរដ្ឋរស់ក្នុងស្រុកចាស៊ីងទាំងអស់ទេ។ តែសម្រាប់ក្រុមមនុស្សអាទិភាពដែលប្រឈមនឹងកូវីដ១៩ ដូចជាក្រុមបុគ្គលិកពេទ្យ ក្រុមមនុស្សដែលធ្វើការងារទាក់ទងជាមួយសាធារណៈ ក្រុមមន្រ្តីគយ ឬក្រុមអ្នកដំណើរដែលត្រូវធ្វើដំណើរទៅកាន់ប្រទេសដែលមានហាន័យឆ្លងកូវីដ១៩ ខ្ពស់។ ក្រុមមនុស្សអាទិភាពទាំងនេះដែលមានអាយុចន្លោះពី ១៨ឆ្នាំទៅ ៥៩ឆ្នាំអាចទៅពិគ្រោះ យោបល់ដើម្បីអាចចាក់វ៉ាក់សាំងបង្ការជំងឺកូវីដ១៩ដែលផលិតដោយក្រុមហ៊ុនឱសថឯកជនចិន Sinovac។
មានវ៉ាក់សាំងចំនួន ២ដូសដែលត្រូវចាក់ដោយការចាក់លើកទី១ និងលើកទី២ ត្រូវមានគម្លាតរយៈពេលពី ១៤ ទៅ ២៨ថ្ងៃ ហើយតម្លៃសរុបរបស់វ៉ាក់សាំងគឺ ៤០០យ័ន។ តើការចាក់វាំក់សាំងនេះបានដំណើរការហើយឬនៅ?។ រដ្ឋអំណាចស្រុកចាស៊ីងមិនបានបញ្ជាក់ទេ។ គួរបញ្ជាក់ថានៅចិន និងបើតាមអង្គការសុខភាពពិភពលោក មានវ៉ាក់សាំងបង្ការកូវីដ១៩ ប្រមាណជា ១០ប្រភេទត្រូវបានធ្វើតេស្តិ៍លើមនុស្ស ក្នុងនោះ មាន ៤ប្រភេទបានឈានដល់ដំណាក់ការធ្វើតេស្តិ៍ទី៣ ចុងក្រោយ ពោលជាការធ្វើតេស្តិ៍លើមនុស្សជាច្រើនរយពាន់នាក់។
តែមកដល់ពេលនេះ នៅមិនទាន់មានវ៉ាក់សាំងណាមួយទទួលបានការអនុញ្ញាតឲ្យចេញលក់ជាសាធារណៈឡើយ។ មានវ៉ាក់សាំងមួយចំនួនត្រូវបានរដ្ឋអំណាចចិនផ្តល់ភ្លើងខៀវឲ្យប្រើក្នុងដំណាក់ការសាកល្បងសម្រាប់តែករណីបន្ទាន់។ គួរបញ្ជាក់ថា ចិនក៏ជាប្រទេសមួយដែលកំពុងប្រកួតប្រជែងរកវ៉ាក់សាំងឲ្យបានមុនគេ។ ក្រុមអ្នកទទួលខុសត្រូវសុខាភិបាលចិនបានប្រកាសក្នុងខែកញ្ញាកន្លងទៅថា ពីពេលនេះទៅដំណាច់ឆ្នាំ ២០២០ ចិនមានសមត្ថភាពផលិតវ៉ាក់សាំងចំនួន ៦១០លានដូសក្នុងមួយឆ្នាំ ហើយប្រធានាធិបតីចិនលោកស៊ី ជីនពីងបានសន្យាថា វ៉ាក់សាំងចិនជាទ្រព្យសម្រាប់ពិភពលោក។ នៅដើមខែតុលានេះ ចិនក៏បានភ្ជាប់ខ្លួនទៅនឹងយន្តការណ៍« Covax » ដែលជាយន្តការណ៍នៃការទទួលបានវ៉ាក់សាំងបង្ការកូវីដ១៩ ផ្តួចផ្តើមឡើងដោយអង្គការសុខភាពពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ