អាហ្វហ្កានីស្ថាន មានការវាយប្រហារប្រដាប់អាវុធប្រឆាំងសកលវិទ្យាលនៅកណ្តាលរដ្ឋធានីកាប៊ូល
នៅថ្ងៃចន្ទទី ២ វិច្ឆិកា ២០២០ មានជនប្រដាប់អាវុធ បីនាក់ បានជ្រៀតចូលនិងធ្វើការវាយប្រហារប្រដាប់អាវុធ ក្នុងសកលវិទ្យាល័យក្រុងកាប៊ូល ដែលកំពុងរៀបចំពិពរណ៍សៀវភៅអ៊ីរ៉ង់។ មានស្លាប់យ៉ាងហោច២២នាក់ និងរបួសជាង២០នាក់។ នេះបើតាមសេចក្តីប្រកាសរបស់ក្រសួងមហាផ្ទៃ។ ក្រោយការវាយប្រហារប៉ុន្មានម៉ោង អង្គការរដ្ឋអ៊ីស្លាមបានចេញមុខប្រកាសថាជាស្នាដៃរបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
“សត្រូវរបស់អាហ្វហ្កានីស្ថាន សត្រូវរបស់វិស័យសិក្សាអប់រំបានធ្វើការវាយប្រហារសកលវិទ្យាល័យកាប៊ូល” នេះបើតាមសេចក្តីប្រកាសរបស់អ្នកនាំពាក្យក្រសួងមហាផ្ទៃនៅក្នុងសន្និសីទកាសែតបឋមដោយអះអាងថាបានពង្រាយកងកម្លាំងសន្តិសុខភ្លាមដើម្បីប្រយុទ្ធតតាំងនឹងក្រុមប្រដាប់អាវុធនោះ។
ជនប្រដាប់អាវុធមានគ្នាបីនាក់បានជ្រៀតចូលក្នុងទីលានសកលវិទ្យាល័យ និងបានបំផ្ទុះអាវុធដោយការបាញ់រះលើហ្វូងនិស្សិត នៅពេលអ្នកទទួលខុសត្រូវក្នុងរដ្ឋាភិបាលហៀបនឹងមកដល់ ដើម្បីសម្ពោធបើកកម្មវិធីពិព័រណ៍សៀវភៅអ៊ីរ៉ង់។ នៅពេលកងកម្លាំងរក្សាសន្តិសុខមកដល់ ទើបមានការប្រយុទ្ធតតាំងគ្នាដោយកាំភ្លើង។ ជនប្រដាប់អាវុធម្នាក់បានចុចបំផ្ទុះគ្រាប់ជាប់នឹងខ្លួន ហើយ ពីរនាក់ផ្សេងទៀតត្រូវបានកម្ចាត់ដោយកងកម្លាំងសន្តិសុខជាតិ។
ការប្រយុទ្ធគ្នានៅក្នុងសកលវិទ្យាល័យដ៏ធំជាងគេរបស់ប្រទេស មានរយៈពេលជាង៦ម៉ោង និងបានបញ្ចប់នៅពេលរសៀល ជាមួយតុល្យការដ៏ធ្ងន់ធ្ងរ។ មានស្លាប់និងរបួសជាច្រើននាក់ ភាគច្រើនជានិស្សិត។ សិស្សនិស្សិត ស្រីប្រុសផ្អើលឆោឡោ និងត្រូវជាប់កុនអស់ជាច្រើនម៉ោងទម្រាំមានការជម្លៀសនិងសង្គ្រោះបាន។
សូមបញ្ជាក់ថា នេះជាលើកទីពីរហើយក្នុងរយៈពេលតែមួយសប្តាហ៍ ដែលអាហ្វហ្កានីស្ថានបានរងការវាយប្រហារប្រឆាំងនឹងស្ថាប័នសិក្សា។ កាលពីប៉ុន្មានថ្ងៃមុន មជ្ឈមណ្ឌលអប់រំនៅភាគខាងលិចក្រុងកាប៊ូលបានរងភេរវកម្មអត្តឃាតរបស់អង្គការរដ្ឋអ៊ីស្លាម បណ្តាលឱ្យស្លាប់និស្សិត២៤នាក់។
នៅឆ្នាំ២០១៨ សកលវិទ្យាល័យកាប៊ូលនេះធ្លាប់រងភេរវកម្មអត្តឃាតម្តងដែរ ពីសំណាក់ពួកអង្គការរដ្ឋអ៊ីស្លាម។ ភេរវកម្មកាលណោះ បានសម្លាប់ជីវិតមនុស្សអស់ជាច្រើននាក់ ភាគច្រើនជាក្មេងជំទង់។ ហើយពីរឆ្នាំមុននេះទៀត មានការវាយប្រហារលើសកលវិទ្យាល័យអាមេរិកប្រចាំទីក្រុងកាប៊ូល បណ្តាលឱ្យស្លាប់មនុស្ស១៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ