ចិនចាប់ប្រើម៉ាស៊ីនប្រតិករនុយក្លេអ៊ែរ ដែលចិនទើបផលិតបានជាលើកទី១ ដោយខ្លួនឯង
ប្រទេសចិនបានបោះមួយជំហានទៀត ដើម្បី ងាកចេញពីការពឹងអាស្រ័យលើបច្ចេកវិទ្យារបស់ប្រទេសលោកខាងលិច។ នៅថ្ងៃសុក្រនេះ ប្រទេសចិនបានចាប់ប្រើ ម៉ាស៊ីនប្រតិករនុយក្លេអ៊ែរ ក្នុងស្រុក ដែលចិនទើបផលិតបាន ដោយខ្លួនឯង។ តាមសេចក្តីប្រកាសរបស់ក្រុមហ៊ុននុយក្លេអ៊ែរចិន CNNC ម៉ាស៊ីនប្រតិករឈ្មោះ Hualong One នឹងអាចផលិតបាន អគ្គិសនី ១០ពាន់លានគីឡូវ៉ាត់ម៉ោង ក្នុងមួយឆ្នាំៗ និងជួយឲ្យចិន អាចកាត់បន្ថយការបញ្ចេញឧស្ម័នកាបូនិក បានប្រមាណ ៨លានតោន។
ចុះផ្សាយនៅថ្ងៃ៖
ស្តាប់ - ០២:២៧
“ចិនបានបំបែក លែងឲ្យមានបច្ចេកវិទ្យាផ្តាច់មុខរបស់បរទេស នៅក្នុងវិស័យនុយក្លេអ៊ែរ” នេះជាការអះអាងរបស់ក្រុមហ៊ុននុយក្លេអ៊ែរជាតិចិន CNNC នៅថ្ងៃសុក្រនេះ ថ្ងៃដែលម៉ាស៊ីនប្រតិករ ផលិតក្នុងស្រុក ជាលើកដំបូង របស់ចិន ត្រូវបានដាក់ សាកល្បង ឲ្យប្រើប្រាស់ ជាផ្លូវការ។
ម៉ាស៊ីនប្រតិករ នុយក្លេអ៊ែរ Hualong One កើតចេញពីឆន្ទៈរបស់ចិន ដែលចង់ដកខ្លួន លែងពឹងផ្អែកលើបរទេសសម្រាប់វិស័យគន្លឹះ ដូចជា សន្តិសុខថាមពល និងបច្ចេកវិទ្យា។ កាត់បន្ថយការពឹងផ្អែក លើបច្ចេកវិទ្យារបស់ប្រទេសលោកខាងលិច នៅក្នុងវិស័យនុយក្លេអ៊ែរ គឺជាមហិច្ឆតា គោលដៅស្នូលនៃយុទ្ធសាស្រ្ត របស់ចិន ដែលមានផែនការចង់បានកេរ្តិ៍ឈ្មោះ “ផលិតផលដែលផលិតឡើងនៅ ប្រទេស ចិន នៅ ឆ្នាំ ២០២៥”
ដើម្បី សម្រេចគោលដៅ រដ្ឋាភិបាលចិនបានផ្តល់ជំនួយរាប់ពាន់លានដុល្លារ សម្រាប់ក្រុមហ៊ុនរដ្ឋចិន ដែលជាហេតុធ្វើឲ្យប្រទេសដៃគូជាច្រើនមិនសប្បាយចិត្ត និងបានបង្កឲ្យមានសង្គ្រាម ពាណិជ្ជកម្មជាមួយអាមេរិក។
នៅបន្ទាប់ពី ម៉ាស៊ីនប្រតិករ Hualong One ដែលចាប់សាងសង់ឡើងតាំងពីឆ្នាំ ២០១៥ ចិន កំពុងសាងសង់ម៉ាស៊ីនប្រតិករ ចំនួន៦ផ្សេងទៀត នៅស្រុកចិន ហើយនិងនៅទឹកដីបរទេស។ តាមសេចក្តីប្រកាសរបស់ក្រុមហ៊ុនចិន ម៉ាស៊ីនប្រតិករ Hualong Oneដែលបានតភ្ជាប់ ទៅ បណ្តាញអគ្គិសនីជាតិ ចិន នៅ ថ្ងៃសុក្រនេះ មានសមត្ថភាពផលិត អគ្គិសនី ១០ពាន់លានគីឡូវ៉ាត់ម៉ោង ក្នុងមួយឆ្នាំ។
ប្រទេសចិនមានរោងចក្រអគ្គិសនីរ ដើរដោយថាមពលនុយក្លេអ៊ែរ ចំនួន ៤៧ ដែលធ្វើឲ្យចិនស្ថិតនៅចំណាត់ថ្នាក់ទី ៣ បន្ទាប់ពីអាមេរិក និងប្រទេសបារាំង។ តាមរដ្ឋបាលជាតិផ្នែកថាមពល រោងចក្រនុយក្លេអ៊ែររបស់ចិន មានសមត្ថភាពផ្គត់ផ្គង់ភ្លើង អគ្គិសនី ប្រមាណ ៤៨ លានគីឡូវ៉ាត់ ស្មើនឹង៥%នៃតម្រូវការសរុបក្នុងស្រុកចិន។ អាជ្ញាធរចិនសង្ឃឹម បង្កើនបរិមាណអគ្គិសនីបានមកពី រោងចក្រនុយក្លេអ៊ែរ នៅ ប៉ុន្មានឆ្នាំខាងមុខ ដើម្បីអាចសម្រេចគោលដៅ កាត់បន្ថយ ការបញ្ចេញឧស្ម័នកាបូនិក ឬ គ្រប់គ្រងអព្យាក្រិតកាបោន នៅឆ្នាំ ២០៦០។
ដើម្បី កាត់បន្ថយ ការបញ្ចេញឧស្ម័នកាបូនិក ប្រទេសចិនបានកាត់បន្ថយរោងចក្រផលិតអគ្គិសនី ដើរដោយថាមពលធ្យូងថ្ម និងបានវិនិយោគរាប់ពាន់លានដុល្លារ សម្រាប់ វិស័យនុយក្លេអ៊ែរ។ សព្វថ្ងៃនេះ ចិនកំពុងសាងសង់ រោងចក្រនុយក្លេអ៊ែរ ចំនួន ១៣បន្ថែមទៀត ដោយមិនខ្វល់ពី បញ្ហាបរិស្ថាន និងសុវត្ថិភាព។ នៅឆ្នាំ ២០១៦ អាជ្ញាធរចិន បានបង្ខំចិត្ត បិទរោងចក្រ កែច្នៃ សំរាមនុយក្លេអ៊ែរ មួយកន្លែងនៅខេត្តJiangsu បន្ទាប់ពី មានបាតុកម្មតវ៉ាប្រឆាំងខ្លាំង របស់ប្រជាជនចិនរាប់ពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ