ចារកិច្ចចិន១០នាក់ ដែលស៊ើបរឿងជនអ៊ុយហ្គួអ៊ីស្លាមជ្រុលនិយម ត្រូវអាហ្វហ្កានីស្ថានចាប់ខ្លួន
យ៉ាងហោចណាស់ មានជនជាតិចិន ចំនួន១០នាក់ ត្រូវបានចាប់ខ្លួនដោយអាជ្ញាធរអាហ្វហ្កានីស្ថាន នៅទីក្រុងកាប៊ូល។ យោងតាមភ្នាក់ងារស៊ើបការសំងាត់អាហ្វហ្កានីស្ថាន ជនជាតិចិនទាំងនេះ គឺជាគិញចារកិច្ច ដែលរដ្ឋាភិបាលចិន បានបញ្ជូនមក ដើម្បីឲ្យស៊ើបអង្កេត តាមដានរឿងជនជាតិអ៊ុយហ្គួ ដែលបានមកចូលរួមជាមួយក្រុមជីហាតឥស្លាមជ្រុលនិយម នៅអាហ្វហ្កានីស្ថាន។
ចុះផ្សាយនៅថ្ងៃ៖
ស្តាប់ - ០៣:០២
ប្រតិបត្តិការបំបែកសំបុក របស់ចារកិច្ចចិន នៅទីក្រុងកាប៊ូល ត្រូវបានធ្វើតាំងតែងពីថ្ងៃទី១០ធ្នូម្លេះ តែទើបតែត្រូវបាន ភ្នាក់ងារស៊ើបការណ៍សំងាត់អាហ្វហ្កានីស្ថាន ប្រកាសឲ្យដឹង កាលពីថ្ងៃទី២៦ធ្នូ។ ក្នុងចំណោមជនជាតិចិន ដែលគេឃាត់ខ្លួនទាំង១០នាក់ គឺមានម្នាក់ជាមេបេសកកម្ម ឈ្មោះ Ly Yangyang ដែលបានធ្វើដំណើរមកដល់ ទីក្រុងកាប៊ូល នៅរវាងត្រីមាសទី៣ឆ្នាំ២០២០នេះ។ ប្រភពដដែលអះអាងថា នៅទីតាំងស្នាក់នៅ របស់មេក្រុមចារកិច្ចចិននេះ គឺគេបានរឹបអូសបាន អាវុធ និងគ្រាប់ផ្ទុះមួយចំនួនធំ។
យោងតាមភ្នាក់ងារស៊ើបការណ៍សំងាត់អាហ្វហ្កានីស្ថាន ក្រុមចារកិច្ចចិននេះ បានមកធ្វើសកម្មភាពឈ្លបយកការណ៍ នៅក្នុងទឹកដីអាហ្វហ្កានីស្ថាន ស្តីអំពីជនជាតិអ៊ុយហ្គួ ដែលបានមកចូលរួមក្នុងចលនាអ៊ីស្លាមជ្រុលនិយម អាល់កៃដា ដែលមានទីតាំងនៅតំបន់ភាគខាងកើតអាហ្វហ្កានីស្ថាន។ ប្រភពដដែលនេះ បញ្ជាក់ថា ចារកិច្ចចិន បានព្យាយាមទាក់ទងជាមួយបណ្តាញ Haqqani ដែលជាក្រុមប្រដាប់អាវុធមួយផ្នែក របស់ក្រុមតាលីបង់។
គួរបញ្ជាក់ថា ខេត្តស៊ីនជាំងរបស់ចិន ដែលមានប្រជាជនរស់នៅភាគច្រើនជាជនជាតិអ៊ុយហ្គួ កាន់សាសនាអ៊ីស្លាមនោះ មានព្រំដែនស្ថិតនៅមិនឆ្ងាយប៉ុន្មានពីភាគខាងកើត និងខាងជើងអាហ្វហ្កានីស្ថាន ដែលជាទីតាំងជង្រុករបស់ក្រុមអាល់កៃដា។ ប៉ុន្មានឆ្នាំចុងក្រោយក្រោយនេះ ដោយសារតែសកម្មភាពរំលោភសិទ្ធិសេរីភាព បង្កឡើងដោយអាជ្ញាធរកុម្មុយនីស្តចិន នៅខេត្តស៊ីនជាំង បានបណ្តាលឲ្យជនអ៊ុយហ្គួជាច្រើននាក់ បានស្ម័គ្រចិត្តចូលបំរើក្រុមអ៊ីស្លាមជ្រុលនិយម ដូចជាក្រុមអាល់កៃដា និងក្រុមជីហាតអង្គការរដ្ឋអ៊ីស្លាមជាដើម។
ក្រុមអ៊ុយហ្គួជ្រុលនិយម បានបង្កើតបណ្តាញភេរវកម្មមួយ ឈ្មោះថា ចលនាអ៊ីស្លាមរំដោះដែនដីតួកេស្ថានខាងកើត ហៅកាត់ថា ETIM។ ក្រុមនេះ ធ្លាប់បានប្រកាស ធ្វើសង្រ្គាម ទល់នឹងចិន ដើម្បីរំដោះខេត្តស៊ីនជាំង ពីកណ្តាប់ដៃរបស់អំណាចកុម្មុយនីស្តចិន។
គួរបញ្ជាក់ថា សំណុំរឿងប្រយុទ្ធប្រឆាំងនឹងចលនាភេរវកម្ម របស់ក្រុមអ៊ីស្លាមជ្រុលនិយម នៅខេត្តស៊ីនជាំងនេះ ត្រូវបានរដ្ឋាភិបាលចិន យកចិត្តទុកដាក់ជាខ្លាំង និងបានចាត់វិធានការ យ៉ាងតឹងណែនបំផុត។ យ៉ាងណាមិញ ជាច្រើនខែមកនេះ រដ្ឋអំណាចចិន ត្រូវបានអង្គការសិទ្ធិមនុស្សជាច្រើន ចោទប្រកាន់ដោយមានភស្តុតាងអមបញ្ជាក់ ថាចិនបានចាប់ជនជាតិអ៊ុយហ្គួ យ៉ាងហោច១លាននាក់ ដាក់ក្នុងមន្ទីរកែប្រែ ធ្វើទារុណកម្ម និងលាងខួរក្បាល។
គួររលឹកដែរថា កាលពីចុងឆ្នាំ២០១៧ ចិនបានចុះហត្ថលេខា កិច្ចព្រមព្រៀងត្រីភាគី ជាមួយ អាហ្វហ្កានីស្ថាន និងប៉ាគីស្ថាន ដើម្បីកសាងសហប្រតិបត្តិការសេដ្ឋកិច្ច និងប្រយុទ្ធនឹងក្រុមភេរវកម្ម។ ខេត្តស៊ីនជាំង ត្រូវបានចិនយកធ្វើជានុយសេដ្ឋកិច្ច ដើម្បីទាក់ទាញអាហ្វហ្កានីស្ថាន និងប៉ាគីស្ថាន ឲ្យចូលរួមសហការ ជួយបោសសំអាតចលនាភេរវកម្មអ៊ីស្លាមជ្រុលនិយម។ យ៉ាងណាក៏ដោយ ដំណឹងនៃការចាប់ចារកិច្ចចិន ដែលធ្វើសកម្មភាពដោយសំងាត់ ក្នុងទឹកដីអាហ្វហ្កានីស្ថាន ដោយគ្មានការអនុញ្ញាតបែបនេះ អាចនឹងធ្វើឲ្យទំនាក់ទំនង រវាងចិន អាហ្វហ្កានីស្ថាន ជួបភាពល្អក់កករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ