ទោះមានការរិះគន់ ជប៉ុនមានះចូលរួមវិនិយោគ ក្នុងគម្រោងរោងចក្រថាមពលធ្យូងថ្ម នៅវៀតណាម
ធានាគារដ៏ធំរបស់ជប៉ុនមួយ បានចូលរួមនៅក្នុងគម្រោងវិនិយោគ កសាងរោងចក្រផលិតថាមពលដើរដោយធ្យូងថ្មនៅវៀតណាម ក្នុងតម្លៃជាង៦០០លានដុល្លារ។ ប្រការនេះបានធ្វើឲ្យ រដ្ឋាភិបាលជប៉ុន ត្រូវអង្គការបរិស្ថានជាច្រើនរិះគន់ ថាកំសាក ដែលមិនបានជួយហាមឃាត់ការវិនិយោគនេះ ខណៈដែលខ្លួនទើបតែបានប្រកាស អំពីអាទិភាពនៃការវិនិយោគ លើគម្រោងផលិតថាមពលស្អាតស្អំ មិនបញ្ចេញឧស្ម័នពុល
ចុះផ្សាយនៅថ្ងៃ៖
ស្តាប់ - ០២:២៩
រោងចក្រថាមពលអគ្គិសនី ដើរដោយធ្យូងថ្ម Vung Ang II ស្ថិតនៅភាគកណ្តាលប្រទេសវៀតណាម មានតម្លៃសាងសង់ប្រមាណជា១៨០០លានដុល្លារ។ ធនាគារសហប្រតិបត្តិការអន្តរជាតិរបស់ជប៉ុន JBIC បានសម្រេចចូលរួមវិនិយោគ ប្រមាណ៦៣៦លានដុល្លារ។ ក្រៅពីនេះ នៅមានចំណែកធំ របស់ធនាគារអាហរណនីហរណ របស់កូរ៉េខាងត្បូង KEXIM និងធនាគារឯកជនរបស់ជប៉ុនមួយចំនួនទៀត។ នេះបើផ្អែកតាមការចុះផ្សាយ របស់បណ្តាញព័ត៌មានជប៉ុន។
នៅពីក្រោយគម្រោងវិនិយោគ រោងចក្រអគ្គិសនីទំហំ១២០០មេហ្កាវ៉ាត់ ដើរដោយចំហេះធ្យូងថ្មនេះ គឺជាការសហការវិនិយោគរបស់ ក្រុមហ៊ុន Mitsubishi Corp និងក្រុមហ៊ុនកូរ៉េខាងត្បូង Korea Electric Power Corporation (Kepco)។
ទោះយ៉ាងណា ការចូលរួមវិនិយោគ របស់ធនាគារដ៏ធំរបស់ជប៉ុន នៅក្នុងគម្រោងនេះ ត្រូវបានគេរិះគន់ជាខ្លាំង ខណៈដែលរដ្ឋាភិបាលជប៉ុន ខ្លួនឯង ទើបតែបានប្រកាសប្តេជ្ញាថានឹង សម្រេចឲ្យបានកម្មវត្ថុអព្យាក្រិត្យកាបូន នៅរវាងឆ្នាំ២០៥០។ ផ្ទុយទៅវិញ ការដុតធ្យូងថ្ម គឺត្រូវបានគេដឹងថា គឺជាប្រភពនៃការបញ្ចេញឧស្ម័កកាបូនិក ដ៏ធំបំផុត។
កាលពីខែឧសភាកន្លងទៅ អង្គការការពារបរិស្ថានចំនួន១២៧ និងប្រទេសជាង៤០ បានចុះហត្ថលេខាលើញត្តិចំហរមួយ ដើម្បីអំពាវនាវឲ្យលុបចោលគម្រោងបំពុលបរិស្ថានដ៏នៅវៀតណាម ឈ្មោះ Vung Ang II នេះ។
លោកស្រី Eri Watanabe តំណាងអង្គការ 360° ប្រចាំប្រទេសជប៉ុន បានលើកឡើងថា ករណីនេះ បង្ហាញថា រដ្ឋាភិបាលជប៉ុន និយាយផ្សេងធ្វើផ្សេង នៅក្នុងរឿងបរិស្ថានអាកាសធាតុនេះ។ លោកស្រីបន្ថែមថា កាលពីខែកក្កដា រដ្ឋាភិបាលជប៉ុនបានប្រកាសថានឹងរិតបន្តឹង លក្ខខណ្ឌបញ្ចេញប្រាក់វិនិយោគ ក្នុងគម្រោងរោងចក្រធ្យូងថ្មនៅបរទេស។ តែធាតុពិត ការវិធានការរឹតបន្តឹងនេះ ពេញដោយការខ្វះចន្លោះ ដើម្បីបើកផ្លូវឲ្យក្រុមហ៊ុនធនគារ បន្តវិនិយោគ។
ដោយឡែក កាលពីខែតុលា មូលនិធិវិនិយោគអឺរ៉ុបខាងជើង បានរួមគ្នាសរសេរលិខិតមួយ ប្រាប់ទៅ ក្រុមហ៊ុនដែលមានគម្រោងវិនិយោគក្នុងគម្រោង Vung Ang II ថាត្រូវតែបោះបង់ចោល ព្រោះថាម្ចាស់ប្រាក់ មិនចង់យកប្រាក់ទៅវិនិយោគ ក្នុងគំរោងបំពុលបរិស្ថានបែបនេះទេ។ លោក Anders Schelde អគ្គនាយកមូលនិធិវិនិយោគដាណឺម៉ាក Akademiker Pension បានលើកឡើងថា លោក Yoshihide Suga នាយករដ្ឋមន្ត្រីជប៉ុន គួរណាតែអន្តរាគមន៍រារាំង ការវិនិយោគនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ