IMF៖កំណើនសេដ្ឋកិច្ចចិនសម្រាប់ឆ្នាំ ២០២១ អាចមានត្រឹម ៧,៩%
នៅថ្ងៃសុក្រ ទី៨ មករា អង្គការមូលនិធិរូបិយវត្ថុអន្តរជាតិហៅកាត់ជាភាសាអង់គ្លេស IMF បានទម្លាក់ការព្យាករណ៍លើកំណើនសេដ្ឋកិច្ចរបស់ប្រទេសចិនចំនួន ០,៣% សម្រាប់ឆ្នាំ ២០២១។ តាម IMF ចិនអាចស្គាល់អត្រាកំណើនសេដ្ឋកិច្ច ៧,៩% ក្នុងឆ្នាំ ២០២១។ គួររម្លឹកថា ចិនដែលជាប្រភពនៃការផ្ទុះកូវីដ១៩នាចុងឆ្នាំ ២០១៩ ក៏ជាប្រទេសដែលទទួលជោគជ័យក្នុងការកំចាត់កូវីដ១៩បានសឹងតែទាំងស្រុងនានិទាឃរដូវកន្លងទៅ។ ម្យ៉ាងទៀត ចិនក៏អាចជាប្រទេសមហាសេដ្ឋកិច្ចតែមួយគត់ដែលមានកំណើនសេដ្ឋកិច្ចវិជ្ជមានក្នុងឆ្នាំ ២០២០។
ចុះផ្សាយនៅថ្ងៃ៖
ស្តាប់ - ០២:១០
តាមការព្យាករណ៍របស់អង្គការមូលនិធិរូបិយវត្ថុអន្តរជាតិ ចិនអាចមានកំណើនសេដ្ឋកិច្ចចំនួន ១,៩% ក្នុងឆ្នាំ ២០២០។ នេះជាអត្រាមួយតិចតួចបំផុតដែលចិនមិនធា្លប់ស្គាល់ទេ គិតតាំងពីឆ្នាំ ១៩៧៦ ពោលនៅមុនពេលចាប់ផ្តើមយុគសម័យនៃកំណែទម្រង់សេដ្ឋកិច្ច។ តែទោះជាយ៉ាងក្តី និងក្នុងពេលដែលពិភពលោកបានញំញីដោយវិបត្តិកូវីដ១៩ ពេញមួយឆ្នាំ ២០២០ ចិនជាប្រទេសមហាអំណាចសេដ្ឋកិច្ចតែមួយគត់ដែលមានកំណើនសេដ្ឋកិច្ចវិជ្ជមានក្នុងឆ្នាំ ២០២០។ ចំណែកប្រទេសមហាអំណាចសេដ្ឋកិច្ចផ្សេងទៀតបានស្គាល់កំណើនសេដ្ឋកិច្ចអវិជ្ជមាន។
IMF បានកត់សម្គាល់ឃើញថា ការដែលចិនអាចបន្តមានកំណើនសេដ្ឋកិច្ចវិជ្ជមានក្នុងឆ្នាំ ២០២០ ក៏ដោយសារតែមហាយក្សអាស៊ីមួយនេះបានប្រឹងប្រែងកំចាត់កូវីដ១៩ ដោយមិនបន្ធូរដៃ និងបានចាត់វិធានការនយោបាយយ៉ាងឆាប់រហ័សដើម្បីកាត់បន្ថយផលវិបាកដែលកើតចេញពីវិបត្តិកូវីដ១៩។ វិធានការទប់ស្កាត់នេះបានធ្វើឲ្យឱនភាពថវិកាចិនកើនពី ១២,៦% ក្នុងឆ្នាំ ២០១៩ ដល់ ១៨,២% ក្នុងឆ្នាំ ២០២០។ តាម IMF ពាណិជ្ជកម្មតាមអនឡាញ និងតម្រូវការពីបរទេសនូវផលិតផលសម្រាប់ទប់ស្កាត់ការឆ្លងកូវីដ១៩ ពិសេសម៉ាស និងសម្ភារៈបរិក្ខារពេទ្យជាវិស័យដែលបានធ្វើឲ្យចិនមានកំណើនសេដ្ឋកិច្ចវិជ្ជមានក្នុងសម័យកូវីដ១៩។
តែទន្ទឹមគ្នានេះ នៅមានវិស័យមួយចំនួនទៀតកំពុងបន្តរអាក់រអួលនៅឡើយ ពិសេសផ្នែកសណ្ធាគារ ភោជនីយដ្ឋាន និងការកំសាន្តនានា។ គួររម្លឹកថានៅត្រីមាសទី១ ឆ្នាំ ២០២០ ផលិតផលសរុបក្នុងស្រុករបស់ចិនបានដាំក្បាលចុះដល់ទៅ ៦,៨% មុននឹងមានឡើងវិញចំនួន ៣,២% នៅត្រីមាសទី២ និង ៤,៩% នៅត្រីមាសទី៣។ ចិនកំពុងរង់ចាំតួលេខសម្រាប់ត្រីមាសទី៤ មុននឹងប្រកាសតួលេខផ្លូវការពេញមួយឆ្នាំ ២០២០ នៅថ្ងៃទី១៨ មករាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ