លោកប៉ុមប៉េអូ ចោទថាចិន កំពុងធ្វើអំពើប្រល័យពូជសាសន៍ កំទេចជនជាតិអ៊ុយហ្គួ
លោកម៉ៃឃ៍ ប៉ុមប៉េអូ អតីតប្រមុខការទូតអាមេរិក កាលពីថ្ងៃអង្គារទី១៩មករា បាននិយាយចោទថា រដ្ឋាភិបាលចិន កំពុងតែធ្វើសកម្មភាពប្រល័យពូជសាសន៍ ទៅលើជនជាតិអ៊ីស្លាមអ៊ុយហ្គួ នៅខេត្តស៊ីនជាំង។ ការចោទប្រកាន់នេះ ត្រូវបានក្រសួងការបរទេសចិន ឆ្លើយតបទៅវិញ ថាជាពាក្យកុហកប្រឌិត ហើយថាសម្តីរបស់លោកអតីតប្រមុខការទូតអាមេរិលរូបនេះ គ្មានតម្លៃអ្វីឲ្យគេចាប់អារម្មណ៍នោះទេ។
ចុះផ្សាយនៅថ្ងៃ៖
ស្តាប់ - ០២:៤២
មួយថ្ងៃមុននឹងបិទបញ្ចប់មុខនាទីការងារជារដ្ឋមន្ត្រីការបរទេស លោកម៉ៃឃ៍ ប៉ុមប៉េអូ បាននិយាយលើកឡើងថា៖ រដ្ឋាភិបាលចិនបាននិងកំពុង ធ្វើអំពើប្រល័យពូជសាសន៍ កំទេចប្រជាជនអ៊ុយហ្គួ។ លោកបានបន្ថែមថា៖ បើប្រជាជនរបស់ប្រទេសខ្លួន ចិនហ៊ានធ្វើអំពើនេះទៅហើយ នោះទៅថ្ងៃមុខ ពិភពលោកសេរី នឹងរងគ្រោះយ៉ាងណាទៅ ដោយសារស្នាដៃចិន!។
ក្រោយសម្តីចោទប្រកាន់នេះ លោកស្រី Hua Chunying អ្នកនាំពាក្យក្រសួងការបរទេសចិន បានលើកឡើងនៅថ្ងៃពុធទី២០មករាថា៖ ប៉ុន្មានឆ្នាំមកនេះ លោកម៉ៃឃ៍ ប៉ុមប៉េអូ បានប្រឌិតរឿង និងប្រើពាក្យកុហកសព្វបែបយ៉ាង ដើម្បីបង្កាច់បង្ខូចកិត្តយសរបស់ចិន។ អ្នកនាំពាក្យរូបនេះ បន្ថែមថា៖ សម្តីចោទប្រកាន់នេះ គឺគ្មានតម្លៃអ្វីឲ្យចិនចាប់អារម្មណ៍ទេ។ លោកស្រីបានអំពាវនាវ ឲ្យរដ្ឋាភិបាលថ្មី ដឹកនាំដោយលោកចូ បៃដិន ត្រូវសម្លឹងមើលចិនក្នុងក្រសែភ្នែកអព្យាក្រិត្យ ត្រឹមត្រូវមានហេតុផល និងប្រកបដោយការផ្សះផ្សារគ្នា។
គួរកត់សំគាល់ទាក់ទិននឹងគោលជំហររបស់រដ្ឋាភិបាលអាេមរិកថ្មី ទល់ជាមួយនឹងចិន គឺប្រហែលជាមិនមានអ្វីប្រែប្រួលច្រើនទេ បើប្រៀបធៀបទៅរដ្ឋាភិបាលមុន។ លោក Antony Blinken ប្រមុខការបរទេសអាមេរិកថ្មី បានថ្លែងកាលពីថ្ងៃអង្គារថា៖ សហរដ្ឋអាមេរិក ត្រូវតែមានគោលជំហររឹងមាំ ទប់ជាមួយចិនឲ្យជាប់។ លោកបានទទួលស្គាល់ថា៖ រដ្ឋបាលលោកដូណាល់ត្រាំ កន្លងមក បានធ្វើត្រឹមត្រូវហើយ ដែលហ៊ានតតាំងជាមួយចិន ព្រោះចិនជាគឺជាគ្រោះថ្នាក់ធំមួយសម្រាប់សហរដ្ឋអាមេរិក។ ប្រមុខការទូតអាមេរិកថ្មីរូបនេះ បានទាំងអះអាងថា លោកក៏យល់ដូចលោកប៉ុមប៉េអូដែរ គឺចិនកំពុងតែធ្វើសកម្មភាពប្រល័យពូជសាសន៍ ទៅលើប្រជាជនអ៊ុយហ្គួ។
សូមបញ្ជាក់ថា អង្គការសិទ្ធិមនុស្សជាច្រើន បានព្យាយាមអំពាវនាវឲ្យសហគមអន្តរជាតិ ថ្កោលទោសទៅលើរដ្ឋាភិបាលចិន ដែលកំពុងធ្វើសកម្មភាពចាប់បង្ឃាំង ធ្វើទារុណកម្ម ធ្វើទុកបុកម្នេញ លើប្រជាជនអ៊ុយហ្គួក្នុងខេត្តស៊ីនជាំង។ យោងតាមការស្រាវជ្រាវ របស់វិទ្យាស្ថានអាមេរិកជាច្រើន បានអះអាងថា ដោយផ្អែកលើឯកសារផ្លូវការចិន និងសាក្សីផ្ទាល់ផង គឺចិន បានចាប់ប្រជាជនអ៊ុយហ្គួដាក់ក្នុងមណ្ឌលកែប្រែ ធ្វើទារុណកម្មលាងខួរក្បាល និងបានក្រៀវកុំឲ្យពួកគេអាចមានកូនតពូជពង្សបានទៀត។ ដូចគ្នាដែរ វិទ្យាស្ថានសិក្សាយុទ្ធសាស្ត្រ ចំណុះឲ្យរដ្ឋាភិបាលអូស្ត្រាលី បានអះអាងថាដោយវិភាគលើរូបភាពផ្កាយរណប អាជ្ញាធរចិនបានកំទេចទីតាំងវិហារអ៊ីស្លាមជាច្រើនកន្លែង នៅក្នុងខេត្តស៊ីនជាំង។
មានអ្នកកាសែតឯករាជ្យ តិចបំផុតដែលអាចធ្វើដំណើរទៅខេត្តស៊ីនជាំងបាន ហើយត្រូវអាជ្ញាធរចិនតាមដាន រារាំងជាប់ជាប្រចាំ។ ប្រការនេះ មិនអាចធ្វើឲ្យគេអាចអះអាងដោយជាក់ច្បាស់ ថាការពិតយ៉ាងណាទេ។ តែការលាក់លៀម រារាំងពីសំណាក់អាជ្ញាធរចិន វាបានចូលរួមធ្វើឲ្យគ្រប់គ្នាមិនទុកចិត្តចំពោះភាពស្មោះត្រងរបស់រដ្ឋាភិបាលចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ