សហគមន៍អន្តរជាតិព្រួយបារម្ភពីលទ្ធភាពធ្វើរដ្ឋប្រហារនៅ ប្រទេសភូមា
អ្នកតំណាងទូតជាង១០ ដែលមានអាមេរិក និងគណៈប្រតិភូសហភាពអឺរ៉ុបបានចេញសេចក្តីថ្លែងការណ៍រួម នៅថ្ងៃសុក្រ ដោយបានអំពាវនាវឲ្យកងទ័ពភូមាគោរព គោលការណ៍ប្រជាធិបតេយ្យ ក្នុងពេលដែលអង្គការសហប្រជាជាតិ កំពុងបារម្ភពីការផ្ទុះរដ្ឋប្រហារដណ្តើមអំណាចសាជាថ្មី នៅប្រទេសភូមា។ នៅក្នុងសន្និសីទកាសែត កាលពី ថ្ងៃអង្គារកន្លងទៅ អ្នកនាំពាក្យរបស់កងទ័ពភូមា បានអះអាងថា កងទ័ពនឹងអាចចូលដឹកនាំ ប្រទេស នៅក្នុងកាលៈទេសៈដែលកំពុងកើតមានវិបត្តិនយោបាយ។
ចុះផ្សាយនៅថ្ងៃ៖
ស្តាប់ - ០២:៥៤
ប៉ុន្មានសប្តាហ៍មកហើយ កងទ័ពភូមាបានបរិហាររិះគន់ថា មានភាពមិនប្រក្រតី នៅក្នុងការបោះឆ្នោតសភា កាលពីខែវិច្ឆិកាឆ្នាំមុន ដែលបានផ្តល់ជ័យជំនះដ៏ធំធេងទៅឲ្យគណបក្សកាន់អំណាចរបស់លោកស្រី អ៊ុងសាន ស៊ូជី។
តាមកងទ័ពភូមា នៅក្នុងហេតុផល ជំងឺឆ្លងរាតត្បាតកូវីដ ការបោះឆ្នោតមិនបានធ្វើឡើង ដោយ សេរី និងយុត្តិធម៌។ កងទ័ពបានរកឃើញមានភាពមិនប្រក្រតី ការក្លែងបន្លំសន្លឹកឆ្នោត ដល់ទៅ ជាង ៨លានករណី នៅទូទាំងប្រទេស។
នៅក្នុងសន្និសីទកាសែត កាលពីថ្ងៃអង្គារ អ្នកនាំពាក្យរបស់កងទ័ពភូមា លោក ហ្ស មីនទុន Zaw Min Tun បានពន្លយឲ្យដឹងពីលទ្ធភាពធ្វើរដ្ឋប្រហារដណ្តើមអំណាច ប្រសិនបើរដ្ឋាភិបាលបដិសេធ មិនព្រមឲ្យកងទ័ព ចូលពិនិត្យ ឆែកមើល បញ្ជីឈ្មោះអ្នកបោះឆ្នោត។
ពាក្យល្ហិចល្ហៀងថា កងទ័ពអាចធ្វើរដ្ឋប្រហារ ត្រូវបានបញ្ជាក់កាន់តែច្បាស់ បន្ថែមទៀត ដោយមេទ័ពដ៏មានអំណាច របស់ភូមា លោកមីន អ៊ុងលាំង Min Aung Hlaing ដែលបានព្រមាន កាលពី ថ្ងៃពុធថា នៅក្នុងកាលៈទេសៈណាមួយ កងទ័ពអាចលុបចោល រដ្ឋធម្មនុញ្ញ។ រដ្ឋធម្មនុញ្ញ ភូមាត្រូវបានគេលុបចោលពីរដងហើយ គឺនៅ ឆ្នាំ ១៩៦២ និងឆ្នាំ ១៩៨៨ ដែលទាំងពីរលើក កងទ័ពបានធ្វើរដ្ឋប្រហារ ដណ្តើមអំណាច និងបង្កើតរបបសឹកគ្រប់គ្រងប្រទេស។
គណបក្សរបស់លោកស្រី អ៊ុងសាន ស៊ូជី ដែលបានឈ្នះឆ្នោត ទទួលបានអាសនៈ ចំនួន ៣៩៦ ក្នុងចំណោមអាសនៈសរុប៤៧៦ នៅរដ្ឋសភា បានបដិសេធមិនកោះប្រជុំសម័យប្រជុំសភា ពិសេស ដើម្បីពិភាក្សាលើការចោទប្រកាន់របស់កងទ័ព។ នៅថ្ងៃព្រហស្បតិ៍ គណៈកម្មការបោះឆ្នោតបានចេញ សេចក្តីថ្លែងការណ៍ បដិសេធថា គ្មានការក្លែងបន្លំ នៅក្នុងការបោះឆ្នោតសភានោះទេ។ ប៉ុន្តែ គណៈកម្មការទទួលស្គាល់ថា មានបញ្ហាចំណុចខ្សោយមួយចំនួន ក្នុងបញ្ជីឈ្មោះអ្នកបោះឆ្នោត និងថា គណៈកម្មការកំពុងធ្វើការស៊ើបអង្កេត។
ពាក្យព្រមានរបស់កងទ័ពថា អាចកើតមាន រដ្ឋប្រហារ ធ្វើឡើង នៅតែប៉ុន្មានថ្ងៃមុនដែលសមាជិកសភា ថ្មី ត្រូវស្បថចូលកាន់តំណែង នៅថ្ងៃទីចន្ទ ទី ១កុម្ភៈសប្តាហ៍ក្រោយនេះ។ បន្ទាប់ពី អង្គការសហប្រជាជាតិសំដែងក្តីបារម្ភពីការផ្ទុះឡើងរដ្ឋប្រហារយោធា នៅភូមា អ្នកតំណាងស្ថានទូតបរទេស ជាង ១០ ដែលរួមអាមេរិកផងដែរ បានចេញសេចក្តីថ្លែងការណ៍ នៅថ្ងៃសុក្រនេះ អំពាវនាវឲ្យភូមាគោរព គោលការណ៍ប្រជាធិបតេយ្យ។
នៅក្រោយការដឹកនាំរបស់របបសឹកអស់៥ទសវត្សរ៍ ភូមា បានរៀបចំការបោះឆ្នោត ប្រជាធិបតេយ្យ នៅឆ្នាំ ២០១១។ នៅ ឆ្នាំ ២០១៥ គណបក្សរបស់លោកស្រី អ៊ុងសាន ស៊ូជី បានទទួលជ័យជំនះ ដឹកនាំរដ្ឋាភិបាល ប៉ុន្តែ ក្រសួងសំខាន់ៗ ដូចជា ការពារជាតិ ក្រសួងមហាផ្ទៃ និងព្រំដែន ត្រូវស្ថិតក្រោមការកាន់កាប់របស់កងទ័ពភូមា។ សម្រាប់អ្នកជំនាញនយោបាយភូមា ដោយព្រមាន លុបចោលរដ្ឋធម្មនុញ្ញ និងចូលកាន់អំណាច តាមរយៈរដ្ឋប្រហារ កងទ័ពភូមា ចង់ក្រើនរំលឹកដល់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី ថា កងទ័ពភូមា នៅតែដើរតួនាទីសំខាន់ ក្នុងការដឹកនាំប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ