Crisis Group៖ ជារឿងគួរឲ្យភ្ញាក់ផ្អើលដែលរបបសឹកភូមាទើបបិទខ្ទប់ហ្វេសបុកនៅ ៣ថ្ងៃក្រោយរដ្ឋប្រហារ
នៅក្នុងប្រទេសភូមា ៣ថ្ងៃក្រោយរដ្ឋប្រហារទម្លាក់រដ្ឋាភិបាលជាប់ឆ្នោតរបស់លោកស្រីអ៊ុង សានស៊ូជី របបសឹកបានបញ្ជាឲ្យក្រុមហ៊ុនបម្រើសេវាអ៊ីនធ័រនែតបិទខ្ទប់បណ្តាញសង្គមហ្វេសបុករហូតដល់ថ្ងៃទី៧ កុម្ភៈ។ ការប្លុកហ្វេសបុកនេះត្រូវបានរបបសឹកលើកហេតុផលទៅពន្យល់ថា ដើម្បីរក្សាស្ថិរភាពនៅក្នុងសង្គម។ ទន្ទឹមគ្នានេះ សេវា Instagram និង WhatsApp ក៏មានភាពរអាក់រអួល។ នៅភូមា មានប្រជាជនជាងពាក់កណ្តាលបានប្រើបណ្តាញសង្គមហ្វេសបុកជាមធ្យោបាយដើម្បីទាក់ទងគ្នា។ ហ្វេសបុកនេះត្រូវបានពលរដ្ឋភូមាប្រើដើម្បីបង្កើតឲ្យមានចលនាតវ៉ារបស់ប្រជាជនប្រឆាំងនឹងរបបសឹក។ លោក Pierre Prakash នាយករងនៃអង្គការ Crisis Group ទទួលបន្ទុកនៅតំបន់អាស៊ីបានមានប្រតិកម្មថា លោកមានការភ្ញាក់ផ្អើលដែលក្រុមឧត្តមសេនីយភូមាទើបបានសម្រេចចិត្តបិទបណ្តាញសង្គមហ្វេសបុកនៅ ៣ថ្ងៃក្រោយរដ្ឋប្រហារ។
ចុះផ្សាយនៅថ្ងៃ៖
ស្តាប់ - ០១:៣៣
« វាពិតជារឿងគួរឲ្យភ្ញាក់ផ្អើលដែលក្រុមឧត្តមសេនីយភូមាមិនប្លុកបណ្តាញសង្គមតាំងពីថ្ងៃទី១ នៃការធ្វើរដ្ឋប្រហារ។ ព្រោះចូរកុំភ្លេចថាតាមរយៈបណ្តាញសង្គម គេទទួលបានព័ត៌មានថ្មីៗ និងយ៉ាងឆាប់រហ័ស។ ប្រសិនបើគេបិទខ្ទប់បណ្តាញសង្គមភ្លាមៗក្រោមហេតុផលសន្តិសុខដោយសារតែមនុស្សអាចបញ្ចេញមតិយោបល់នៅលើបណ្តាញសង្គមបាននោះ ជំហានបន្ទាប់គឺការចុះផ្លូវដើម្បីតវ៉ា ព្រោះប្រជាជនលែងអាចសម្តែងមតិយោបល់លើបណ្តាញសង្គមបានទៀតឡើយ។
នេះហើយជាអ្វីដែលយើងមានការបារម្ភខ្លាំង។ គួរកត់សម្គាល់ថា សិទ្ធិសេរីភាពក្នុងការបញ្ចេញមតិតាមបណ្តាញសង្គមពេលនេះជាសិទ្ធិសេរីភាពមួយដែលប្រជាជនភូមាទើបមាននារយៈពេល ១០ឆ្នាំចុងក្រោយនេះប៉ុណ្ណោះ។ ដូច្នេះខ្ញុំគិតថា ប្រជាជនភូមាហាក់មិនសូវខ្លាចចុះផ្លូវសម្តែងកំហឹង និងធ្វើបាតុកម្មតវ៉ាប្រឆាំងនឹងរបបសឹកដូចដែលគេបានឃើញនៅលើបណ្តាញសង្គម។ អ៊ីចឹងគេអាចនិយាយបានថា កំហឹង និងការតវ៉ារបស់ប្រជាជនភូមានៅតាមផ្លូវអាចនឹងមានទ្រង់ទ្រាយធំ។
ចំណែកហានិភ័យនោះគឺថា វានឹងអាចមានអន្តរាគមន៍របស់កងទ័ពវាយបង្រ្កាបលើក្បួនបាតុកម្មជាយថាហេតុដែលប្រឆាំងនឹងរបបសឹក និងទាមទារឲ្យមានរដ្ឋាភិបាលស៊ីវិលឡើងវិញ រួមទាំងទាមទារឲ្យមានការដោះលែងឥស្សរជននយោបាយដែលបានចាប់ខ្លួនដោយចាប់ផ្តើមពីការដោះលែងលោកស្រីអ៊ុងសានស៊ូជី »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ