ស្រ្តីអូស្ត្រាលី ចេញធ្វើបាតុកម្ម ប្រឆាំងនឹងអំពើហិង្សាផ្លូវភេទ
ស្ត្រីអូស្តា្រលីរាប់ពាន់នាក់ បាននាំគ្នាចុះធ្វើបាតុកម្ម នៅថ្ងៃចន្ទទី ១៥មីនា ២០២១នេះ តាមទីក្រុងធំៗជាច្រើន ដូចជា ស៊ីននី កង់បេរ៉ា មែលប៊ន ... ដើម្បីតវ៉ាប្រឆាំងនឹងអំពើហិង្សាផ្លូវភេទលើស្ត្រី និងដើម្បីទាមទារឱ្យមានសមភាពស្ត្រីនិងបុរស។ យុទ្ធនាការប្រឆាំងនឹងអំពើហិង្សាផ្លូវភេទលើស្ត្រី បានប្រព្រឹត្តទៅ ខណៈដែលសមាជិករដ្ឋាភិបាលកំពុងរួមរឹតដោយការចោទប្រកាន់រំលោភផ្លូវភេទជាបន្តបន្ទាប់។
ចុះផ្សាយនៅថ្ងៃ៖
ស្តាប់ - ០២:៤៥
បាតុកម្មប្រឆាំងនឹងអំពើហិង្សាផ្លូវភេទ #March4Justice ដើម្បីយុត្តិធម៌មានរៀបចំឡើងនៅជាច្រើនកន្លែង ស៊ីននី មែលប៊ន កង់បេរ៉ា និងតាំងពីថ្ងៃអាទិត្យម្សិលមិញ នៅទីក្រុងភាគខាងត្បូងបំផុត Perth។ ជាការប្រមូលផ្តុំដែលមានស្ត្រីចូលរួមយ៉ាងច្រើន ខ្លះដល់ចំនួនម៉ឺននាក់ និងខ្លះធ្វើដំណើរមកក្រុងឆ្ងាយៗផង ប៉ុន្តែ ការប្រមូលផ្តុំជានិម្មិត្តរូបបំផុត ប្រព្រឹត្តទៅនៅទីក្រុង កង់បេរ៉ា ក្បែរស្ថាប័នរដ្ឋសភាសហព័ន្ធ ដែលមានសមាជិកទើបរងការចោទប្រកាន់រំលោភបំពានផ្លូវភេទថ្មីៗ។
ជាយុទ្ធនាការនៃការប្រយុទ្ធប្រឆាំងនឹងអំពើហិង្សាផ្លូវភេទលើស្ត្រី និងការរើសអើងស្ត្រីភេទ អ្នករៀបចំបាតុកម្មបានបដិសេធមិនចូលចរចាជាមួយនាយករដ្ឋមន្ត្រីតាមសំណើទេ ដោយអះអាងថា ជំនួបដោយបិទទ្វារ ជាទង្វើមិនគោរពជនរងគ្រោះ។ “ប្រសិនបើគោរពនិងគិតគូរដល់ស្ត្រី លោកនាយករដ្ឋមន្ត្រីScott Morrison ត្រូវបើកទ្វារ ដើរចេញឆ្លងទីធ្លា មកស្តាប់សម្រែកទាមទាររបស់ស្ត្រី”។ នេះបើតាមអះអាងរបស់តំណាងបាតុករម្នាក់ តាមកញ្ចក់ទូរទស្សន៍ABC។ យុទ្ធនាការដើម្បីយុត្តិធម៌ #March4Justice ទាមទារច្រើនចំណុច ៖ បង្កើនថវិកាសាធារណៈសម្រាប់ការពារប្រឆាំងនឹងអំពើហិង្សាផ្លូវភេទលើស្រ្តី ដាក់ឱ្យដំណើរការអនុសាសន៍កាលពី ឆ្នាំ២០០០ របស់គណៈកម្មការអង្កេតជាតិស្តីពីអំពើហិង្សាផ្លូវភេទលើស្ត្រី នៅកន្លែងធ្វើការ។
សូមបញ្ជាក់ថា សំឡេងស្ត្រីងើបឡើងប្រឆាំង និងបរិហារប្រពៃណីប្រើអំពើហិង្សាផ្លូវភេទ បំពារបំពាន និងការរើសអើងម៉ាក់ងាយស្ត្រី ក្នុងរង្វង់អ្នកនយោបាយអូស្ត្រាលី តាំងពីយូរយារមក បានលាន់ឮកាន់តែខ្លាំងឡើងៗ នារយៈពេលប៉ុន្មានខែចុងក្រោយនេះ ជាពិសេសក្រោយធ្លាយរឿងអាស្រូវមានរដ្ឋមន្ត្រីក្នុងរដ្ឋាភិបាលអូស្ត្រាលីពីររូបរងការចោទប្រកាន់រំលោភផ្លូវភេទលើស្ត្រី។ មានបុគ្គលិកស្ត្រី ម្នាក់ត្រូវបានអ្នករួមការងារចាប់រំលោភ កាលពីឆ្នាំ២០១៩ នៅក្នុងការិយាល័យសភារបស់លោកស្រី លីនដា រ៉េណុល Linda Reynolds ដែល រដ្ឋមន្ត្រីក្រសួងឧស្សាហកម្មការពារជាតិ។ បច្ចុប្បន្នជារដ្ឋមន្ត្រីក្រសួងការពារជាតិ លោកស្រីរដ្ឋមន្ត្រីបានរិះគន់ដោយផ្ទាល់មាត់ចំពោះការទទួលបណ្តឹងរបស់ស្ត្រីរងគ្រោះនៅក្នុងរង្វង់ការិយាល័យនាសម័យនោះ។ កាលពីដើមខែមីនា ទូរទស្សន៍ABCបានទម្លាយថា រដ្ឋមន្ត្រីមន្ត្រីក្នុងការិយាល័យទីប្រឹក្សាច្បាប់របស់រដ្ឋាភិបាលលោកChristian Porter ជាប់ចោទពីបទរំលោភក្មេងស្រីជំទង់អាយុ១៦ឆ្នាំ កាលពីឆ្នាំ១៩៨៨។ ក្មេងស្រីរងគ្រោះទើបបានស្លាប់កាលពីឆ្នាំទៅ។ នៅថ្ងៃចន្ទនេះលោក Porter បានបដិសេធ និងបានដាក់ពាក្យបណ្តឹងតបវិញពីបទមួលបង្កាច់ព័ត៌មានវិញ បើទោះបីទូរទស្សន៍មិនបានបញ្ចេញអត្តសញ្ញាណរដ្ឋមន្ត្រីនោះក៏ដោយ។ យ៉ាងណាក៏ដោយ ក៏រឿងអាស្រូវពីរនេះបានធ្វើរដ្ឋាភិបាលអូស្ត្រាលីរង្គោះរង្គើជំហរមិនតិចទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ