សហភាពអឺរ៉ុបដាក់ទណ្ឌកម្មទៅលើចិន ចំពោះការរំលោភសិទ្ធិមនុស្ស ធ្វើទៅលើជនជាតិអ៊ុយហ្គួ
ប្រទេសសមាជិកសហភាពអឺរ៉ុប បានត្រូវរ៉ូវគ្នា ថានឹងដាក់ទណ្ឌកម្មទៅលើចិន ក្រោមហេតុផលថា ចិនបានរំលោភសិទ្ធិមនុសធ្ងន់ធ្ងរ ធ្វើទៅលើសហគមប្រជាជនអ៊ុយហ្គួ ដែលកាន់សាសនាអ៊ីស្លាម រស់នៅក្នុងខេត្តស៊ីនជាំង។ នេះបើផ្អែកតាមប្រភពពីមន្ត្រីទូត ប្រចាំនៅសហភាពអឺរ៉ុប។ តំណាងអង្គទូតចិនប្រចាំសហភាពអឺរ៉ុប បានលើកឡើងថា វាមិនជារឿងចំណេញសម្រាប់អឺរ៉ុបទេ បើអឺរ៉ុបជ្រើសយកការប្រឈមមុខជាមួយនឹងចិន។
ចុះផ្សាយនៅថ្ងៃ៖
ស្តាប់ - ០២:២០
យ៉ាងហោចណាស់ មានមនុស្ស៤នាក់ និងស្ថាប័នរបស់ចិនមួយ ដែលត្រូវជាប់ក្នុងបញ្ជីទណ្ឌកម្ម របស់សហភាពអឺរ៉ុប។ ប្រភពពីមន្ត្រីទូតនៅក្រុងព្រុចសែល បានអះអាងថា តំណាងអង្គទូតនៃ ប្រទេសសមាជិកសហភាពអឺរ៉ុបទាំង២៧ បានស្រុះស្រួលគ្នារួចហើយ ថានឹងបញ្ជូនបញ្ជីនេះ ទៅឲ្យកិច្ចប្រជុំរដ្ឋមន្ត្រីការបរទេសអឺរ៉ុប ជាអ្នកសំរេច នៅថ្ងៃចន្ទ ដើមសប្តាហ៍ក្រោយ។ ឈ្មោះមនុស្សទាំង៤នាក់ និងឈ្មោះស្ថាប័នចិននេះ នឹងត្រូវទំលាយជាសាធារណៈនាពេលនោះ។
លោកZhang Ming ឯកអគ្គរដ្ឋទូតចិន ប្រចាំនៅសហភាពអឺរ៉ុប បានបោះសំដីគំរាមសហភាពអឺរ៉ុប ថាប្រសិនបើអឺរ៉ុប សម្រេចទណ្ឌកម្មមកលើចិន ដោយសារតែបញ្ហាជនជាតិអ៊ុយហ្គួនៅខេត្តស៊ីនជាំងមែននោះ នោះអឺរ៉ុប និងចិន ច្បាស់ជាត្រូវប្រឈមមុខដាក់គ្នាហើយ។
សូមបញ្ជាក់ថា អស់រយៈពេលជាច្រើនសប្តាហ៍មកហើយ ដែលសហភាពអឺរ៉ុប បានលើកឡើងថា អំពី បំណងចង់ដាក់ចុះនូវទណ្ឌកម្ម ពិន័យទៅលើចិន ទាក់ទិននឹងការរំលោភសិទ្ធិមនុស្សធ្ងន់ធ្ងរ នៅខេត្តស៊ីនជាំង។ យោងតាមប្រភពពីអង្គារសិទ្ធិមនុស្សជាច្រើន បានរាយការណ៍ថា យ៉ាងហោចណាស់មានជនជាតិអ៊ុយហ្គួ ប្រមាណ១លាននាក់ ដែលត្រូវបានអាជ្ញាធរចិន ចាប់បង្ឃាំងដាក់ក្នុងមណ្ឌលកែប្រែ លាងខួរក្បាល ធ្វើទារុណកម្ម និង ក្រៀវកុំឲ្យអាចបន្តពូជបាន។ យ៉ាងណាមិញ រដ្ឋាភិបាលកាណាដា និង សហរដ្ឋអាមេរិក បានចាត់ទុកថា ចិនកំពុងតែធ្វើអំពើប្រល័យពូជសាសន៍។
រដ្ឋាភិបាលចិន តែងតែប្រកែក បដិសេធមិនទទួលពាក្យចោទទាំងអស់នេះទេ។ កាលពីឆ្នាំ២០១៩ ចិន ធ្លាប់បានសន្យាថានឹងអញ្ជើញមន្ត្រីទូតបរទេស ព្រមទាំងតំណាងក្រុមប្រឹក្សាសិទ្ធិមនុស្សនៃអង្គការសហប្រជាជាតិ ឲ្យទៅពិនិត្យដោយផ្ទាល់នៅខេត្តស៊ីនជាំង។ តែយ៉ាងណារហូតមកទល់ពេលនេះ មិនទាន់មានការអនុញ្ញាតណាមួយ ឲ្យអ្នកជំនាញអន្តរជាតិចូលទៅដល់ខេត្តស៊ីនជាំងទេ។
ដោយឡែក កាលពីថ្ងៃទី១៧មីនា ប្រភពពីមន្ត្រីទូតអឺរ៉ុបបានឲ្យដឹងថា គំរោងធ្វើដំណើរទៅខេត្តស៊ីនជាំង របស់តំណាងអង្គទូតសហភាពអឺរ៉ុប ត្រូវបានបិទខ្ទប់វិញដោយអាជ្ញាធរចិន បន្ទាប់ពីភាគីអឺរ៉ុប បានស្នើសុំជួបលោកសាស្ត្រាចារ្យជនជាតិអ៊ុយហ្គួ ឈ្មោះ Ilham Tohti ដែលតុលាការចិនបានកាត់ទោសឲ្យជាប់ពន្ធនាគារមួយជីវិត កាលពីឆ្នាំ២០១៤។ លោក Ilham Tohti ដែលបច្ចុប្បន្នមានអាយុ៥១ឆ្នាំ ត្រូវបានសភាអឺរ៉ុប ប្រគល់ពានរង្វាន់ សិទ្ធិមនុស្ស Sakharov នៅឆ្នាំ២០១៩។ លោក Zhang Ming ឯកអគ្គរដ្ឋទូតចិន ប្រចាំនៅសហភាពអឺរ៉ុប បានអះអាងថា ភាគីចិនបានរៀបចំបើកផ្លូវទទួលគណៈប្រតិភូអឺរ៉ុប ឲ្យចូលទៅខេត្តស៊ីនជាំងរួចអស់ហើយ តែការទាមទារចុងក្រោយរបស់គណៈប្រតិភូនេះ ដែលចង់ចូលទៅជួបជនឧក្រិដ្ឋ គឺជាការទាមទារហួសហេតុ ដែលភាគីចិនមិនអាចទទួលយល់ព្រមបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ