អូស្ត្រាលីជម្លៀសប្រជាជនរាប់ពាន់នាក់ពីគ្រោះទឹកជំនន់ដ៏អាក្រក់មិនធ្លាប់
មនុស្សចំនួនរាប់ពាន់នាក់ ត្រូវបានជម្លៀសចេញពីគ្រោះទឹកជំនន់ដ៏ធំ នៅទូទាំងរដ្ឋ New South Wales (NSW) ក្នុងប្រទេសអូស្ត្រាលី។ ចំណាត់ការនេះ ធ្វើឡើងបន្ទាប់ពីភ្លៀងនៅតែបន្តធ្លាក់យ៉ាងខ្លាំងនៅឯតំបន់ឆ្នេរសមុទ្រភាគខាងកើតអូស្ត្រាលី នាថ្ងៃចន្ទ ២២ មីនា ២០២១ រហូតបណ្តាលឲ្យមានទឹកជំនន់ដ៏អាក្រក់បំផុតពុំធ្លាប់ ក្នុងរយៈពេលប្រមាណជាបីទសវត្សរ៍កន្លងមកនេះ។
ចុះផ្សាយនៅថ្ងៃ៖
យោងតាមព័ត៌មានផ្លូវការចុងក្រោយ មានប្រជាជនប្រមាណ ១៨ ០០០ នាក់ ត្រូវបានជន្លៀសចេញពីផ្ទះសម្បែងរបស់ពួកគេនៅNew South Wales (NSW) ដែលជារដ្ឋសម្បូរប្រជាជនរស់នៅច្រើនបំផុតមួយរបស់អូស្ត្រាលី។ នាខណៈពេលនេះ អាជ្ញាធរអូស្ត្រាលី បានប្រកាសព្រមានពីស្ថានភាពអាកាសធាតុដ៏អាក្រក់ នៅតាមឆ្នេរសមុទ្រទាំងអស់ ស្ថិតនៅក្នុងរដ្ឋNew South Wales។
ក្រៅពីទឹកជន់នៅ New South Wales ភ្លៀងធ្លាក់ខ្លាំងជាច្រើនថ្ងៃបន្តបន្ទាប់គ្នា ក៏បានធ្វើឲ្យទឹកទន្លេ និងទំនប់ហូរហៀរចេញដល់ពាសពេញជុំវិញទីក្រុងស៊ីដនីនិងនៅភាគអាគ្នេយ៍នៃរដ្ឋឃ្វីនឡែនផងដែរ។
កងកម្លាំងយោធាកំពុងត្រូវគេបានដាក់ពង្រាយដើម្បីស្វែងរក ក៏ដូចជាជួយសង្គ្រោះក្នុងអំឡុងពេលនៃគ្រោះទឹកជំនន់ ដែលត្រូវបានគេហៅថាជាព្រឹត្តិការណ៍មួយក្នុងរយៈពេល ៥០ ឆ្នាំ។
រូបភាពថតបានពីលើអាកាស នៅឯតំបន់ដែលរងគ្រោះខ្លាំង បង្ហាញឲ្យឃើញពីទឹកដែលជន់លិចខ្លាំង ហើយផ្ទះរបស់ប្រជាជនអូស្ត្រាលីជាច្រើន បានបាត់រូបរាង និងឃើញតែដំបូលនៅពីលើទឹកតែប៉ុណ្ណោះ។
យ៉ាងណាក៏ដោយ រហូតមកទល់នឹងពេលនេះ មិនទាន់មានអ្នកស្លាប់ឬរបួសធ្ងន់ធ្ងរណាម្នាក់ ត្រូវបានគេរាយការណ៍នោះទេ។ប៉ុន្តែ ដោយសារភ្លៀង ទំនងជានៅបន្តធ្លាក់មកទៀត ប្រជាជនចំនួនប្រមាណ ៨ លាននាក់នៅទីក្រុងស៊ីដនី ត្រូវបានប្រាអាជ្ញាធរជំនាញ ប្រកាសប្រាប់ឲ្យធ្វើការពីផ្ទះប្រសិនបើអាចនិងជៀសវាងការធ្វើដំណើរដែលមិនចាំបាច់។
ចំណែកក្រុមអ្នកវិទ្យាសាស្ត្រវិញបានក្រើនរំឭកថា អូស្រ្តាលី អាចនឹងជួបគ្រោះមហន្តរាយធម្មជាតិ ដូចជាទឹកជំនន់នេះ កាន់តែញឹកញាប់ និងធ្ងន់ធ្ងជាងមុន ដោយសារតែលទ្ធផលកើតចេញមកពី ការប្រែប្រួលអាកាសធាតុ។
ដោយឡែក មន្ត្រីសុខាភិបាលរបស់អូស្ត្រាលី បានឲ្យដឹងថាទឹកភ្លៀង និងទឹកជំនន់ នឹងធ្វើឲ្យដំណើរការចាក់វ៉ាក់សាំងកូវីដត្រូវយឺតយ៉ាវជាងការគ្រោងមុន។ គ្រោះមហន្តរាយធម្មជាតិនេះ នឹងពន្យារពេលនៃការចាក់វ៉ាក់សាំងនៅទីក្រុងស៊ីដនី និងតំបន់ជុំវិញនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ