សំណុំរឿងអ៊ុយហ្គួរ៖ ចិនប្រាប់ក្រុមហ៊ុនសំលៀកបំពាក់អឺរ៉ុប កុំយកនយោបាយមកបូកបល់នឹងជំនួញ
ស្ថិតក្នុងបរិបទនៃបញ្ហាដែលប្រទេសលោកខាងលិច ចោទចិនថាបានរំលោភសិទ្ធិមនុស្សធ្ងន់ធ្ងរ នៅខេត្តស៊ីនជាំង តំណាងរដ្ឋាភិបាលចិន បានលើកឡើងថា ក្រុមហ៊ុនផលិតសំលៀកបំពាក់នៅអឺរ៉ុប មិនត្រូវយកបញ្ហានយោបាយ ទៅលាយឡំនឹងការធ្វើជំនួញឡើយ។ ការលើកឡើងដូចនេះ គឺជាការឆ្លើយតបទៅនឹងសារព្រួយបារម្ភ របស់ក្រុមហ៊ុនម៉ាកសំលៀកបំពាក់ មួយចំនួននៅអឺរ៉ុប ទាក់ទិននឹងការធ្វើទុក្ខបុកម្នេញ ធ្វើទៅលើជនជាតិអ៊ុយហ្គួរ ពីសំណាក់អាជ្ញាធរចិន។
ចុះផ្សាយនៅថ្ងៃ៖
ស្តាប់ - ០២:២៣
នៅក្នុងសន្និសីទកាសែត កាលពីថ្ងៃចន្ទ ទី២៩មីនា លោក Xu Guixiang អ្នកនាំពាក្យរដ្ឋបាលខេត្តស៊ីនជាំង បានលើកឡើងថា ក្រុមហ៊ុនឯកជនមិនត្រូវ យកបញ្ហានយោបាយ មកបូកច្របល់ ធ្វើឲ្យប៉ះពាល់ដល់មុខជំនួញឡើយ។ អ្នកនាំពាក្យរូបនេះ បានអះអាងថា ចាប់ពីពេលនេះទៅ ក្រុមហ៊ុនផលិតសំលៀកបំពាក់ស៊ុយអ៊ែត ម៉ាក H&M នឹងមិនអាចរកប្រាក់ចំណេញនៅប្រទេសចិនបានទៀតទេ។
ភ្លាមៗក្រោយការលើកឡើងរបស់ភាគីចិននេះ ក្រុមហ៊ុន H&M មិនបានចេញប្រតិកម្មអ្វីទាំងអស់។ គួរបញ្ជាក់ថា បញ្ហានេះ គឺវាស្ថិតក្នុងបរិបទជម្លោះ បោះសំដីឲ្យគ្នាទៅវិញទៅមក រវាងក្រុមប្រទេសលោកខាងលិច និង រដ្ឋាភិបាលចិន ទាក់ទិននឹងសំណុំរឿងជនជាតិអ៊ុយហ្គួររ។ សហភាពអឺរ៉ុប អង់គ្លេស អាមេរិក និងកាណាដា បានចាត់វិធានការទណ្ឌកម្មទៅលើចិន ដែលពួកគេចោទថាបានរំលោភសិទ្ធិមនុស្សធ្ងន់ធ្ងរ ទៅលើប្រជាជនអ៊ុយហ្គួរ ក្នុងខេត្តស៊ីនជាំង។
បញ្ហានេះបានរាលដាល មកដល់ក្រុមហ៊ុនផលិតសំលៀកបំពាក់មួយចំនួននៅអឺរ៉ុប ដែលប្រើប្រាស់វត្ថុធាតុដើមកប្បាស ដាំនៅក្នុងខេត្តស៊ីនជាំង។ ចាប់ពីថ្ងៃពុធសប្តាហ៍មុន អ្នកលេងបណ្តាញសង្គមនៅចិន បានចែកចាយតៗគ្នា នូវសារមួយរបស់ក្រុមហ៊ុន H&M កាលពីឆ្នាំ២០២០ ថាខ្លួនមានការព្រួយបារម្ភ អំពីដំណឹងដែលថា ប្រជាជនអ៊ុយហ្គួរ ត្រូវគេបង្ខំឲ្យធ្វើជាទាសករ នៅតាមចំការកប្បាស ក្នុងខេត្តស៊ីនជាំង។ បញ្ហានេះ បានរាលដាលទៅដល់ម៉ាកផ្សេងៗទៀត ដូចជា Burberry Nike និង Adidas ជាដើម។ ប្រជាជនចិនបានអំពាវនាវ ឲ្យធ្វើពហិកា ឈប់ទិញផលិតផលម៉ាកទាំងនេះ ដោយចោទថាជាក្រុមហ៊ុន ដែលសំអុតកិត្តិយសកេរ្តិ៍ឈ្មោះ របស់ប្រទេសចិន។
ដោយឡែក អ្នកនាំពាក្យម្នាក់ទៀតនៅខេត្តស៊ីនជាំង បានឆ្លើយតបថា កម្មវត្ថុនៃនៃពួករិះគន់ចិន គឺដើម្បីបង្កអស្ថិរភាពដល់សង្គមចិន។ អ្នកនាំពាក្យរូបនេះ អះអាងថា គេចាំទទួលស្វាគមន៍តំណាងក្រុមហ៊ុនផលិតសំលៀកបំពាក់ទាំងនេះ ឲ្យចុះមកពិនិត្យ ដល់ចំការកប្បាសនៅខេត្តស៊ីនជាំង។
គួរកត់សំគាល់ថា ប៉ុន្មានសប្តាហ៍ចុងក្រោយនេះ សំណុំរឿងប្រជាជនអ៊ុយហ្គួរខេត្តស៊ីនជាំង បានក្លាយជាកម្មវត្ថុជម្លោះ កាន់តែធំទៅរវាង ប្រទេសលោកខាងលិច និង ចិន។ កាណាដា និងអាមេរិក បានហ៊ានដល់ទៅចាត់ទុក ថាចិនកំពុងតែធ្វើអំពើប្រល័យពូជសាសាន៍ បោសសំអាតប្រជាជនអ៊ុយហ្គួរ ពីខេត្តស៊ីនជាំង។ នៅថ្ងៃចន្ទទី២៩មីនាដែរ លោកអគ្គលេខាធិការអង្គការសហប្រជាជាតិ បានបញ្ជាក់ឲ្យដឹងថា ក្រុមប្រឹក្សាសិទ្ធិមនុស្សកំពុងតែចរចាជាមួយរដ្ឋាភិបាលចិន យ៉ាងម៉ដចត់បំផុត ដើម្បីបញ្ជូនក្រុមអ្នកជំនាញ ឲ្យចុះទៅពិនិត្យស្រាវជ្រាវរកការពិត នៅខេត្តស៊ីនជាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ