ចិនផ្តន្ទាទោសប្រហារជីវិតអតីតមន្រ្តីអ៊ុយហ្គួរនៅស៊ីនជាំង
មន្ត្រីជនជាតិអ៊ុយហ្គួរនៅស៊ីនជាំងពីរនាក់ ត្រូវបានតុលាការចិនកាត់ទោសប្រហារជីវិត ពីបទ ធ្វើសកម្មភាពចង់ផ្តាច់ទឹកដី។ នេះបើតាមព័ត៌មានចុះផ្សាយក្នុងទំព័រវេបសាយរបស់អាជ្ញាធរក្រុងស៊ីនជាំង។ ជាការកាត់ទោសដែលសម្រេចឡើងក្នុងខណៈចិនកំពុងរងការរិះគន់យ៉ាងខ្លាំងពីសំណាក់សហគមន៍អន្តរជាតិ ជាពិសេសសហរដ្ឋអាមេរិកនិងសហភាពអឺរ៉ុប ចំពោះទង្វើបង្ក្រាបជនជាតិភាគតិចកាន់សាសនាអ៊ីស្លាមនៅតំបន់ស៊ីនជាំង។ សហរដ្ឋអាមេរិក គ្រោងទាំងចង់ធ្វើពហិការមិនចូលរួមកីឡាអូឡាំពិករដូវក្តៅនៅប៉េកាំងផង ដើម្បីព្រមានចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
មន្ត្រីទាំងពីររូបនេះ ម្នាក់ធ្វើការនៅក្រសួងយុត្តិធម៌ និងម្នាក់ទៀតនៅក្នុងក្រសួងអប់រំ ដែលសុទ្ធតែជាវិស័យដ៏រសើបៗ។ Shirzat Bawudun អតីតអ្នកទទួលខុសត្រូវនៅនាយកដ្ឋាននយុត្តិធម៌ស៊ីនជាំង ត្រូវបានតុលាការប្រជាជនជាន់ខ្ពស់ស៊ីនជាំង កាត់ទោសប្រហារជីវិត ដោយព្យួរទោសពីរឆ្នាំ ពីបទផ្សំគំនិតជាមួយចលនាអ៊ីស្លាមតួគេស្ថានខាងកើត ដោយបានទទួលប្រាក់សំណូក និងដឹកនាំធ្វើសកម្មភាពអបគមន៍។ នេះបើតាមការលម្អិតរបស់អនុប្រធានចៅក្រម។ ភ្នាក់ងារសារព័ត៌មានចិនថ្មី បានបញ្ជាក់បន្ថែមទៀតថា សម្រាប់ក្រុមចៅក្រម អតីតមន្ត្រីអ៊ុយហ្គួរនេះ ថែមទាំងបានទៅស្វែងរកព័ត៌មានពីកងកម្លាំងទ័ពបរទេស និងបានធ្វើសកម្មភាពបែបសាសនាដោយខុសច្បាប់នៅក្នុងពិធីមង្គលការកូនស្រី។
ក្នុងបទចោទប្រកាន់ ប្រព្រឹត្តអំពើពុករលួយ មានសកម្មភាពផ្តាច់ទឹកដីនិយម និងដាក់ទោសប្រហារជីវិត នៅពីរឆ្នាំខាងមុខដូចគ្នា តុលាការក្រុងស៊ីនជាំងបានបន្ទោសលោក Sattar Sawut អតីតប្រធាននាយកដ្ឋានអប់រំ តំបន់ស៊ីនជាំង ថាបានបញ្ជ្រាបខ្លឹមសារអប់រំដែលមានពាក់ព័ន្ធនឹងការបះបោរផ្តាច់ទឹកដីដល់ក្រុមជនជាតិភាគតិច បែបភេរវនិយម និងអ៊ីស្លាមជ្រុលនិយម នៅក្នុងសៀវភៅសិក្សាភាសាអ៊ុយហ្គួរ។ សៀវភៅសិក្សានោះ បានជំរុញឱ្យមានអំពើហិង្សានៅអ៊ូរុំជី Urumqi កាលពីឆ្នាំ២០០៩។
ទន្ទឹមពេលជាមួយគ្នានេះដែរ នៅព្រឹកថ្ងៃពុធទី ៧មេសានេះ អ្នកនាំពាក្យក្រសួងការបរទេសចិនបានលើកឡើងអំពីការចេញ ផ្សាយភាពយន្តឯកសារទីបួន ស្តីពីការប្រយុទ្ធប្រឆាំងនឹងភេរវកម្មនៅតំបន់ស្វយ័ត ទៀតផង។
សូមបញ្ជាក់ថា នៅប្រទេសចិន ទោសប្រហារជីវិតដោយព្យួរទោស ស្មើនឹងការដាក់ទោសឱ្យជាប់ពន្ធនាគារអស់មួយជីវិត។ ការកាត់ទោសប្រហារជីវិតអតីតមេដឹកនាំអ៊ុយហ្គូនៅស៊ីនជាំងនេះ ធ្លាក់មកជួនចំពេលដែលសហគមន៍អន្តរជាតិ មានអាទិ៍សហរដ្ឋអាមេរិកនិងសហភាពអឺរ៉ុប បានរិះគន់និងដាក់ទណ្ឌកម្មចិនយ៉ាងខ្លាំងចំពោះសកម្មភាពរំលោភសិទ្ធិមនុស្សលើជនជាតិភាគតិចកាន់សាសនាអ៊ីស្លាមអ៊ុយហ្គួរ។ សហរដ្ឋអាមេរិក តាមរយៈសំឡេងរបស់អ្នកនាំពាក្យក្រសួងការបរទេស បានអះអាងនៅថ្ងៃនេះ ថាអាមេរិកកំពុងពិចារណាជាមួយសម្ព័ន្ធមិត្ត ចាត់វិធានការរួមដើម្បីព្រមានចិន ដោយមានគម្រោងធ្វើពហិការមិនចូលរួមប្រកួតកីឡាអូឡាំពិកឆ្នាំ២០២២នៅប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ