រដ្ឋមន្ត្រីការពារជាតិអូស្ត្រាលីថា « គម្រោងផ្លូវមួយខ្សែក្រវ៉ាត់មួយ » របស់ចិន គឺជាឧបករណ៍ឃោសនានយោបាយ
គម្រោងផ្លូវមួយខ្សែក្រវ៉ាត់មួយរបស់ចិន គឺជាឧបករណ៍ឃោសនានយោបាយ របស់បក្សកុម្មុយនីស្តចិន។ នេះគឺជាការលើកឡើង របស់លោករដ្ឋមន្ត្រីការពារជាតិអូស្ត្រាលី នៅថ្ងៃទី២២មេសា។ សូមបញ្ជាក់ថា រដ្ឋាភិបាលអូស្ត្រាលី បានសម្រេចលុបចោលកិច្ចសន្យា ដែលអាជ្ញាធរដ្ឋអូស្ត្រាលីមួយ បានចុះជាមួយចិន នៅក្នុងគម្រោងផ្លូវមួយខ្សែក្រវ៉ាត់មួយនេះ។ ប្រការនេះ បានធ្វើឲ្យរដ្ឋាភិបាលចិន រិះគន់អូស្ត្រាលីជាខ្លាំង ថាគ្មានភាពស្មោះត្រង់។
ចុះផ្សាយនៅថ្ងៃ៖
ស្តាប់ - ០២:២៥
ថ្លែងនៅតាមវិទ្យុមួយ លោក Peter Dutton រដ្ឋមន្ត្រីក្រសួងការពារជាតិ អូស្ត្រាលីបានលើកឡើងថា លោកក៏ដូចជារដ្ឋាភិបាលអូស្ត្រាលី មានការបារម្ភណាស់ ដែលឃើញរដ្ឋបាល នៃរដ្ឋមួយចំនួននៅអូស្ត្រាលី បានចុះកិច្ចសន្យាជាមួយចិន នៅក្នុងគម្រោងផ្លូវមួយខ្សែក្រវ៉ាត់មួយ។ លោកបន្ថែមថា រដ្ឋាភិបាលអូស្ត្រាលី មិនអាចអនុញ្ញាតឲ្យមានកិច្ចសន្យារបៀបនេះបានទេ ព្រោះធាតុពិត គម្រោងផ្លូវមួយខ្សែក្រវ៉ាត់មួយរបស់ចិន គឺជាឧបករណ៍ឃោសនានយោបាយ របស់បក្សកុម្មុយនីស្តចិន។ លោកបានអះអាងថា បញ្ហាគឺមិនមែនប្រជាជនចិនទេ តែគឺទស្សនវិស័យ និងមហិច្ឆតា របស់គណបក្សកុម្មុយនីស្តចិន ដែលរដ្ឋាភិបាលអូស្ត្រាលីព្រួយបារម្ភ។
សូមបញ្ជាក់ថា កាលពីថ្ងៃពុធទី២១មេសា រដ្ឋាភិបាលអូស្ត្រាលី បានប្រកាសលុបចោលកិច្ចសន្យាដែលតំណាងអាជ្ញាធរដ្ឋវិកតូរីយ៉ា របស់អូស្ត្រាលី បានចុះជាមួយចិន ចូលរួមនៅក្នុងគម្រោងផ្លូវមួយខ្សែក្រវ៉ាត់មួយ។ ការលុបចោលកិច្ចសន្យានេះ គឺដោយផ្អែកលើច្បាប់ថ្មីមួយ ដែលរដ្ឋាភិបាលសហព័ន្ធ និងរដ្ឋសភាអូស្ត្រាលី បានអនុម័តកាលពីឆ្នាំមុន ដោយបើកផ្លូវឲ្យរដ្ឋាភិបាលសហព័ន្ធ លុបចោលកិច្ចសន្យាណា ដែលអាចប៉ះពាល់ ដល់សន្តិសុខជាតិ។
ស្ថានទូតចិនប្រចាំអូស្ត្រាលី បានចេញលិខិតប្រកាសមួយ នៅថ្ងៃពុធ ដោយបានចាត់ទុក ការសម្រេចរបស់រដ្ឋាភិបាលសហព័ន្ធអូស្ត្រាលី ថាជាការសម្រេច ដែលគ្មានហេតុផល ហើយបង្ករឿងជាមួយចិន។ ស្ថានទូតចិនបន្ថែមថា ប្រការនេះបង្ហាញឲ្យឃើញថា អូស្ត្រាលីគ្មានភាពស្មោះត្រង់ នៅក្នុងចេតនាស្តារទំនាក់ទំនង រវាងអូស្ត្រាលីនិងចិនទេ។
នៅថ្ងៃព្រហស្បតិ៍នេះ លោករដ្ឋមន្ត្រីការពារជាតិអូស្ត្រាលី បានឆ្លើយតបទៅកាន់ការលើកឡើង របស់ស្ថានទូតចិន ថាអូស្ត្រាលីធ្វើអ្វី ដែលអូស្ត្រាលីគិតថាត្រឹមត្រូវ ហើយដែលបំរើប្រយោជន៍ជាតិអូស្ត្រាលី។ អូស្ត្រាលីមិនញញើតខ្លាច ការគំរាមរបស់នរណាផ្សេងឡើយ។
គួររំលឹកថា ទំនាក់ទំនងរវាងចិននិងអូស្ត្រាលី បានអាប់អួរ ខ្មៅទៅៗ តាំងតែពីឆ្នាំ២០១៨មក បន្ទាប់ពីអូស្ត្រាលីបានសម្រេច ហាមឃាត់ក្រុមហ៊ុន Huawei មិនឲ្យចូលរួមក្នុងទីផ្សារដំឡើងប្រព័ន្ធបច្ចេកវិទ្យា5G។ ជាការឆ្លើយតបវិញ ចិនបានចាត់វិធានការពិន័យសងសឹងជាច្រើន ទៅលើផលិតផលអូស្ត្រាលី ដូចជាស្រូវសាឡី សាច់គោ និង ស្រាទំពាាំងបាយជូរជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ