ឥណ្ឌា៖ ចំនួនមនុស្សស្លាប់ដោយកូវីដ១៩ ឡើងលើស៣សែននាក់
យោងតាមតួលេខផ្លូវការ នៅថ្ងៃទី២៤ឧសភានេះ ប្រទេសឥណ្ឌា មានមនុស្សស្លាប់ដោយកូវីដ១៩ ចំនួនលើស ៣សែននាក់ហើយ។ ឥណ្ឌា គឺជាប្រទេសទី៣ ដែលមានមនុស្សស្លាប់ដោយកូវីដ១៩ ច្រើនបំផុត បន្ទាប់ពី សហរដ្ឋអាេមរិក និង ប្រេស៊ីល។ តែអ្នកជំនាញសង្ស័យថា តួលេខផ្លូវការនៅឥណ្ឌា អាចទាបជាងការពិតជាក់ស្តែង។
ចុះផ្សាយនៅថ្ងៃ៖
នៅ២៤ម៉ោងចុងក្រោយ នៅឥណ្ឌា មានអ្នកស្លាប់ដោយកូវីដ១៩ ចំនួន៤៤៥៤នាក់។ ត្រឹមតែក្នុង២សប្តាហ៍ចុងក្រោយ ចំនួនមនុស្សស្លាប់ដោយកូវីដ១៩នៅឥណ្ឌា បានឡើងចំនួនដល់ទៅ៥ម៉ឺននាក់។ សរុបមកទល់ពេលនេះ អ្នកស្លាប់ដោយកូវីដ១៩ នៅប្រទេសឥណ្ឌា មានចំនួនសរុប ៣០៣៧២០នាក់។ ឥណ្ឌាក្លាយជាប្រទេសទី៣ បន្ទាប់ពីសហរដ្ឋអាេមរិក និងប្រេស៊ីល ដែលមានមនុស្សស្លាប់ដោយកូវីដ១៩ ច្រើនលើស៣សែននាក់។
ចំនួនមនុស្សស្លាប់ កាន់តែកើនឡើង ចំនួនអ្នកជម្ងឺ ដែលត្រូវការការព្យាបាល សង្គ្រោះបន្ទាន់ក៏ចេះតែកើន។ បើទោះបីទីក្រុងធំៗខ្លះនៅឥណ្ឌា ដូចជាញូដេលី និងបុបបៃ ជាដើម បានដាក់ចុះនូវវិធានការបិទខ្ទប់ ដើម្បីទប់ស្កាត់ការឆ្លងរាលដាលក្តី តែករណីវិជ្ជមានកូវីដ១៩ នៅតែកើបជាលំដាប់។ ក្រៅពីតាមទីក្រុងធំៗ កូវីដ១៩ បានចូលជ្រាប តាមទីជនបទដាច់ស្រាយ៉ាល នៃប្រទេសឥណ្ឌា ដែលពុំមានសេវាសុខភាពល្អគ្រាប់គ្រាន់។
យ៉ាងណាមិញ អ្នកជំនាញជាច្រើន បានសង្ស័យថា ចំនួនតួលេខអ្នកឆ្លង និងអ្នកស្លាប់ ដោយកូវីដ១៩ នៅក្នុងការពិតជាក់ស្តែង នៅឥណ្ឌា អាចមានច្រើនលើសពីតួលេខផ្លូវការរបស់រដ្ឋាភិបាល។ លោក Gautam Menon សាស្ត្រាចារ្យជីវវិទ្យា នៅសកលវិទ្យាអាសូកា បានលើកឡើងថា គេបានប្រទះឃើញសាកសពមនុស្សជាច្រើន ដែលត្រូវបានគេយកទៅចោលក្នុងទន្លេគង្គារ។ សាកសពទាំងនោះ មិនត្រូវបានគេចុះបញ្ជីរាប់ក្នុងស្ថិតិផ្លូវការទេ។
ពិធីបុណ្យសាសនាក្នុងរយៈពេលប្រមាណមួយខែមុននេះ ត្រូវបានគេជឿថា គឺជាកត្តាជំរុញការឆ្លងរាលដាល យ៉ាងឆាប់រហ័ស។ អ្នកជំនាញអះអាងថា មានតែការចាក់វ៉ាក់សាំង ទ្រង់ទ្រាយធំទេ ទើបអាចជួយសង្គ្រោះជីវិតប្រជាជនឥណ្ឌាបាន។ គិតចាប់ពីដើមខែមករាមក ឥណ្ឌា បានចាក់វ៉ាក់សាំងប្រឆាំងកូវីដ១៩ ទៅឲ្យប្រជាជនខ្លួន បានចំនួន១៩៦លាននាក់ហើយ។ តែយ៉ាងណា ចំនួននេះគឺតិចណាស់ បើប្រៀបធៀបនឹងចំនួនប្រជាជនឥណ្ឌា ប្រមាណ១៣០០លាននាក់។ ដើម្បីពន្លឿនយុទ្ធនាការចាក់វ៉ាក់សាំង រដ្ឋាភិបាលឥណ្ឌា បានហាមឃាត់រាល់ការនាំចេញវ៉ាក់សាំង ដែលផលិតនៅលើទឹកដីឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ