តុលាការហុងកុង កាត់ទោសអ្នកទទួលខុសកាសែត Apple Daily ពីរនាក់ពីបទឃុបឃិតជាមួយបរទេស
នេះគឺជាលើកទីមួយហើយ ដែលហុងកុងប្រើច្បាប់សន្តិសុខជាតិ ប្រឆាំងនឹងសេរីភាពសារព័ត៌មាន ដើម្បីបំបិទសំឡេងបះបោរ។ បន្ទាប់ពីត្រូវបានប៉ូលិសហុងកុងចោទប្រកាន់ជាផ្លូវការពីបទឃុបឃិតជាមួយបរទេសប៉ះពាល់ដល់សន្តិសុខជាតិ កាលពីថ្ងៃសុក្រទី ១៨មិថុនាម្សិលមិញមក អ្នកទទួលខុសត្រូវសារព័ត៌មាន Apple Daily ពីររូបត្រូវបានបញ្ជូនទៅកាត់ទោសនៅតុលាការ នាថ្ងៃសៅរ៍ទី ១៩មិថុនានេះ។
ចុះផ្សាយនៅថ្ងៃ៖
ស្តាប់ - ០២:២០
កាលពីថ្ងៃព្រហស្បតិ៍ទី ១៧មិថុនា ប៉ូលិសហុងកុងជាង៥០០នាក់បានចុះទៅដល់ទីស្នាក់ការកាសែត ដើម្បីធ្វើការឆែកឆេរ និងរឹបអូសយកកុំព្យូទ័រ ឌីសមេម៉ូរី និងកំណត់ហេតុផ្សេងៗរបស់អ្នកកាសែត។ ថ្នាក់ដឹកនាំកាសែតចំនួន៥រូប ត្រូវបានចាប់ខ្លួន។ ពីរនាក់រងការចោទប្រកាន់ភ្លាម ចំណែកបីនាក់ផ្សេងទៀត ត្រូវបានដោះលែងជាបណ្តោះអាសន្នក្នុងពេលរង់ចាំលទ្ធផលអង្កេតបន្ថែម។
ដោយមិនបញ្ជាក់អំពីអត្តសញ្ញាប៉ូលិសហុងកុងបានចេញសេចក្តីថ្លែងការណ៍ខ្លីមួយនៅសុក្រម្សិលមិញ បញ្ជាក់អំពីការចោទប្រកាន់ជាផ្លូវការបុគ្គលពីររូប អាយុ ៤៧និង៥៩ឆ្នាំ ពីបទឃុបឃិតជាមួយបរទេស ឬចរន្តនៅក្រៅប្រទេស ដែលនាំគ្រោះថ្នាក់ដល់សន្តិសុខជាតិ។ បុគ្គលពីររូបនោះគឺ និពន្ធនាយកលោក Ryan Law និងអគ្គនាយកសារព័ត៌មាន Apple Daily លោក Cheung Kim-hung ដែលតុលាការហុងកុងបានបើកសវនាការកាត់ទោសភ្លាមនៅថ្ងៃសៅរ៍ទី ១៩មិថុនានេះ។
តាំងពីព្រលឹម ពលរដ្ឋហុងកុងរាប់សិបនាក់ ក្នុងនោះខ្លះជាបុគ្គលិកកំពុងនិងធ្លាប់ធ្វើការឱ្យកាសែតផង បានមកប្រជុំគ្នានៅមុខតុលាការក្រុងហុងកុង ដើម្បីផ្តល់ការគាំទ្រដល់ថ្នាក់ដឹកនាំទាំងពីរ។ អ្វីដែលបានកើតឡើងចំពោះកាសែតApple Daily ពេលនេះនឹងអាចកើតមានលើកាសែតផ្សេងៗនៅហុងកុងជាក់ជាមិនខាន។ នេះបើតាមការអះអាងរបស់បុគ្គលិកApple Dailyម្នាក់សុំមិនមិនបញ្ចេញឈ្មោះ។
សម្រាប់អាជ្ញាធរហុងកុង និងចិន ការចាប់ខ្លួនអ្នកទទួលខុសត្រូវនិងកាសែតApple Daily នេះមិនមែនជាការវាយប្រហារប្រឆាំងសារព័ត៌មានឡើយ តែ Apple Daily បានក្លាយជាសហជីពឧក្រិដ្ឋ។ រិះគន់អាជ្ញាធរចិនដោយមិនសំចៃ និងដោយចំៗ Apple Daily ដែលជាសំរាមក្នុងភ្នែកប៉េកាំងយូរមកហើយ ទំនងជាមិនអាចត្រដររស់បានទៀតទេ។ ម្ចាស់សារព័ត៌មាន Apple Daily លោកមហាសេដ្ឋី ជីមី លេ អាយុ៧៣ឆ្នាំ ក៏ត្រូវបានតុលាការហុងកុងកាត់ទោសឱ្យជាប់ពន្ធនាគារជាច្រើន ពីបទមានពាក់ព័ន្ធនឹងបាតុកម្មឆ្នាំ២០១៩។ ទ្រព្យសម្បត្តិនិងភាគហ៊ុនរបស់លោក និងទឹកប្រាក់២,៣លានដុល្លាររបស់កាសែត ត្រូវបានអាជ្ញាធរបង្កកអស់ហើយ។ ក្រុមហ៊ុនបីទៀតរបស់កាសែតក៏កំពុងអង្កេតដោយអាចរងពិន័យ ឬត្រូវបិទតែម្តងផង។
នេះជាលើកទីមួយហើយដែលវិស័យសារព័ត៌មាននៅហុងកុងរងការវាយប្រហារតាមរយៈច្បាប់សន្តិសុខជាតិតាក់តែងឡើងដោយចិន។ សារព័ត៌មានអន្តរជាតិមានទីស្នាក់ការនៅហុងកុងកំពុងពិចារណាចង់ដកខ្លួនទៅរកទីតាំងផ្សេង។ ចំណែកសារព័ត៌មាននៅក្នុងស្រុក ត្រូវបង្ខំចិត្តដាក់បម្រាមលើខ្លួនឯង។ នៅក្នុងចំណាត់ថ្នាក់ស្តីពីសេរីភាពសារព័ត៌មាន ផ្តល់ដោយទីភ្នាក់ងារអ្នកយកការណ៍គ្មានព្រំដែន ហុងកុងបានធ្លាក់ចំណាត់ថ្នាក់ពីលេខ១៨នៅឆ្នាំ២០០២ ទៅលេខ៨០នៅឆ្នាំនេះ។ ឯចិនជាប់លេខ១១៧ក្នុងចំណោមចំណាត់ថ្នាក់ទាំង១៨០ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ