ទីក្រុងស៊ីដនីត្រូវបិទខ្ទប់ទាំងស្រុង២សប្តាហ៍ ដើម្បីទប់ស្កាត់ការឆ្លងរាលដាលកូវីដ១៩ "ដែលតា"
អាជ្ញាធរអូស្ត្រាលី បានសម្រេច បិទខ្ទប់ទីក្រុងស៊ីដនីទាំងស្រុង រយៈពេល២សប្តាហ៍ បន្ទាប់ពីបានសង្កេតឃើញ ការឆ្លងរាលដាលខ្លាំង នូវកូវីដ១៩ ទំរង់បំប្លែងខ្លួន ដែលតា ។ អាជ្ញាធរសុខាភិបាលអូស្ត្រាលី អះអាងថា ការបិទខ្ទប់ទាំងស្រុងនេះ គឺជារឿងចាំបាច់បំផុត ដើម្បីបង្អាក់ការឆ្លងរាលដាល ព្រោះកូវីដ១៩ ទំរង់បំប្លែងខ្លួន ដែលតា គឺជាសត្រូវដ៏គ្រោះថ្នាក់បំផុត។
ចុះផ្សាយនៅថ្ងៃ៖
ស្តាប់ - ០២:៤២
នៅយប់ថ្ងៃសុក្រ ម៉ោង១២រំលងអាធ្រាត្រ សង្កាត់ចំនួន៤នៅក្រុងស៊ីដនី ត្រូវអនុវត្តការធ្វើចត្តាឡីស័ក។ ក៏ប៉ុន្តែស្រាប់តែព្រឹកថ្ងៃសោរ៍ទី២៦មិថុនា លោកស្រី Gladys Berejiklian នាយករដ្ឋមន្ត្រី រដ្ឋ New South Wales បានប្រកាសថា ទីក្រុងស៊ីដនីទាំងមូល ដែលជាទីក្រុងធំរបស់រដ្ឋនេះ នឹងត្រូវបិទខ្ទប់ទាំងស្រុង រយៈពេល២សប្តាហ៍ ចាប់ពីម៉ោង៦ល្ងាច ថ្ងៃទីសៅរ៍ទី២៦មិថុនា។
ផ្អែកតាមអាជ្ញាធរសុខាភិបាលអូស្ត្រាលី មនុស្សជាង៨០នាក់ ត្រូវបានគេធ្វើតេស្តរកឃើញវិជ្ជមានកូវីដ១៩ ទំរង់បំប្លែងខ្លួន « ដែលតា » ក្នុងរយៈពេលមួយសប្តាហ៍។ ករណីវិជ្ជមានកូវីដទាំងនេះ គឺសុទ្ធតែជាប់ពាក់ព័ន្ធ នឹងអ្នកបើកបរម្នាក់ ដែលដឹកជញ្ជូន ក្រុមការងារបុគ្គលិកក្រុមហ៊ុនអាកាសចរណ៍ ពីព្រលានយន្តហោះ ទៅសណ្ឋាគារក្នុងក្រុងស៊ីដនី ដើម្បីធ្វើចត្តាឡីស័ក។
លោក Brad Hazzard រដ្ឋមន្ត្រីសុខាភិបាលរដ្ឋ New South Wales បានប្រាប់អ្នកកាសែតថា កូវីដ១៩ទំរង់បំប្លែងខ្លួនដែលតា គឺសត្រូវមួយដ៏គួរឲ្យភ័យបារម្ភ ព្រោះថា វិធានការបង្ការកន្លងមក ហាក់មិនអាច ទប់ស្កាត់ការឆ្លងរាលដាលទាល់តែសោះ។
ដើម្បីការពារការសម្រេចបិទខ្ទប់ក្រុងស៊ីដនីទាំងមូល លោកស្រីនាយករដ្ឋមន្ត្រី បានអះអាងថាកូវីដ១៩ទំរង់បំប្លែងខ្លួនដែលតា មានកម្លាំងឆ្លងរាលដាលមួយទ្វេជាពីរ។ វិធានការដាក់ឲ្យធ្វើចត្តាឡីស័ក ចំនួន៣ថ្ងៃ ដែលអាជ្ញាធរបានកំណត់កន្លងមក គឺមិនគ្រប់គ្រាន់ទេ។ នៅក្នុងរយៈពេលបិទខ្ទប់២ សប្តាហ៍នេះ មនុស្សគ្រប់គ្នាអាចចេញទៅក្រៅផ្ទះបាន តែក្នុងករណីទៅទិញទំនិញចាំបាច់បំផុត ឬទៅពេទ្យ ទៅសាលារៀន និងកន្លែងធ្វើការ ក្នុងករណីដែលមិនអាចធ្វើការពីផ្ទះបាន។ ដោយឡែក គ្រប់មនុស្សទាំងអស់ ដែលធ្វើដំណើរចូលក្រុងស៊ីដនី ត្រូវដាក់ឲ្យធ្វើចត្តាឡីស័ក រយៈពេល១៤ថ្ងៃ ជាកំហិត។
គួរបញ្ជាក់ថា អូស្ត្រាលី គឺជាប្រទេសមួយ ដែលបានគ្រប់គ្រងការឆ្លងរាលដាលកូវីដ១៩បានល្អ និងម៉ឺងម៉ាត់បំផុត។ គិតពីដំបូងរហូងពេលនេះ អូស្ត្រាលី មានអ្នកវិជ្ជមានកូវីដ១៩ ចំនួន ៣០៤០០នាក់ ក្នុងនោះមានស្លាប់៩១០នាក់ សម្រាប់ប្រជាជនសរុបចំនួន២៥លាននាក់។ ទីក្រុងស៊ីដនី ដែលមានប្រជាជនប្រមាណ៥លាននាក់នោះ បានបើកដំណើរការសេដ្ឋកិច្ច ដូចធម្មតាវិញទៅហើយ ដោយគ្រប់គ្នាគិតថា អ្វីៗបានចប់រួចរាល់ហើយ មុននឹងមានការរកឃើញ ករណីវិជ្ជមាន កូវីដ ទំរង់បំប្លែងខ្លួនដែលតា កាលពីពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ