ថ្នាំបង្ការកុមារ ៖ អង្គការសហប្រជាជាតិស្រែកអាសន្នអំពីគ្រោះមហន្តរាយធ្ងន់ធ្ងរ
រវល់គិតតែអំពីបញ្ហាកូវីដ និងការចាក់ថ្នាំបង្ការប្រឆាំងកូវីដ១៩ ការចាក់ថ្នាំបង្ការដ៏ចាំបាច់ផ្សេងទៀត ជាពិសេសថ្នាំបង្ការសម្រាប់កុមារមានការយឺតយ៉ាវយ៉ាងខ្លាំង។ បើតាមអង្គការសុខភាពពិភពលោក ដោយហេតុកូវីដ១៩ មានកុមារប្រមាណ២៣លាននាក់ មិនបានទៅចាក់ថ្នាំបង្ការចាំបាច់ តាមកម្មវិធីជាតិទេកាលពីឆ្នាំទៅ។ ការនេះជាគ្រោះហានិភ័យនាំឱ្យជំងឺគ្រុនស្វិតដៃជើង កញ្ជ្រិល ... លេចឡើងមករាតត្បាតវិញ។
ចុះផ្សាយនៅថ្ងៃ៖
ស្តាប់ - ០១:៥៦
ការចាក់ថ្នាំបង្ការគោល ដែលមានចែងក្នុងកម្មវិធីជាតិស្ទើរគ្រប់ប្រទេសនៅលើពិភពលោក សម្រាប់លុបបំបាត់ជំងឺខាន់ស្លាក់ ក្អកមាន់ តេតាណូស គ្រុនស្វិតដៃជើង និងកញ្ជ្រិល ជាដើម បានធ្លាក់ចុះយ៉ាងខ្លាំង ពី ៨៦មក៨៣% ពោលគឺមានកុមារដល់២៣លាននាក់ មិនបានមកចាក់ថ្នាំបង្ការ ឱ្យបានគ្រប់បីដូស តាមការកំណត់។ ចំណែក១៧លាននាក់ផ្សេងទៀត មិនបានទទួលថ្នាំបង្ការចាំបាច់នេះសោះ។ នេះជាចំនួនដ៏ច្រើនបំផុត គិតចាប់តាំងពីឆ្នាំ២០០៩មក និងច្រើនជាងឆ្នាំ២០១៩ ប្រមាណ៣,៧លាននាក់។
ជាសរុប ដោយហេតុតែកូវីដ១៩ ការចាក់ថ្នាំបង្ការកុមារ ត្រលប់ទៅមានសភាពដូចកាលពី១០ឆ្នាំមុន។ នេះបើតាមការអះអាងរបស់អ្នកទទួលខុសត្រូវនៃការិយាល័យចាក់ថ្នាំបង្ការអង្គការសុខភាពពិភពលោក លោកស្រី Kate O'Brien។ បើតាមលោកស្រី មូលហេតុនៃការអាក់ខានមិនមកចាក់ថ្នាំបង្ការឱ្យកុមារ ដោយឪពុកម្តាយខ្លាចឆ្លងកូវីដពេលមកមណ្ឌលសុខភាព។ ម្យ៉ាងទៀត សេវាសុខភាពសាធារណៈក៏ជួបនឹងភាពរអាក់រអួលខ្លាំង ហើយត្រូវរារាំងដោយវិធានការបិទខ្ទប់ប្រទេស ដើម្បីទប់ស្កាត់ការរីករាលដាលនៃកូវីដ១៩ទៀត។
ក្រៅអំពីការភ័យខ្លាចពាក់ព័ន្ធផ្ទាល់នឹងជំងឺរាតត្បាត នៅមានមូលហេតុចំបងមួយទៀត គឺកង្វះវត្ថុធាតុដើម ដោយត្រូវប្រមូល និងបំរុងទុកសម្រាប់ប្រយុទ្ធប្រឆាំងនឹងកូវីដ១៩។ ប្រទេសដែលរងគ្រោះ មានដំណើរការចាក់ថ្នាំបង្ការកុមារធ្លាក់ចុះខ្លាំងគេ គឺឥណ្ឌា ពី ៩១%ទៅ ៨៥%។ ការចាក់ថ្នាំបង្ការប្រឆាំងនឹងជំងឺកញ្ជ្រិលត្រូវបានគាំងឈប់ទាំងស្រុង នៅប្រទេសសាធារណរដ្ឋកុងហ្គោ ដែលធ្លាប់រងការរាតត្បាតយ៉ាងខ្លាំង។ នៅចន្លោះពី ឆ្នាំ ២០១៨-២០២០ កញ្ជ្រិលបានសម្លាប់ជីវិតមនុស្សអស់ជាង៨ពាន់នាក់ ភាគច្រើនជាកុមារ។
ហេតុដូច្នេះហើយបានជាសម្រាប់អង្គការសុខភាពពិភពលោកប្រមើលឃើញថា នៅឆ្នាំ២០២១ ពិភពលោកនឹងត្រូវជួបគ្រោះមហន្តរាយកាន់តែខ្លាំង និងធ្ងន់ធ្ងរមែនទែន ជាមួយនឹង ហានិភ័យនៃការលេចឡើងវិញ នៃជំងឺគ្រុនស្វិតដៃជើង ជំងឺកញ្ជ្រិល ...។ នេះបើតាមការព្រមានរបស់លោកស្រី Kate O'Brien ដដែល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ