អាហ្វហ្កានីស្ថាន ៖ កាប៊ូលរងភេរវកម្មពីរផ្ទួនគ្នា ក្នុងពេលរៀបផែនការវាយបកលើពួកតាលីបង់
មានស្លាប់យ៉ាងហោចណាស់ ៨នាក់ និងរបួសជាង២០នាក់នៅក្នុងភេរវកម្មពីរ កើតឡើងនៅកណ្តាលក្រុងកាប៊ូល កាលពីល្ងាចថ្ងៃអង្គារទី ៣សីហា២០២១។ ស្នូរផ្ទុះទីមួយ គឺជាបំផ្ទុះរថយន្តបង្កៃ នៅមុខផ្ទះតំណាងរាស្ត្រម្នាក់ដែលនៅជាប់របងនឹងផ្ទះរដ្ឋមន្ត្រីក្រសួងការពារជាតិតែម្តង។ ស្នូរបំផ្ទុះទាំងពីរ បានកើតឡើងនៅមុនក្រោយគ្នាតែប្រមាណ២ម៉ោងប៉ុណ្ណោះ និងសុទ្ធតែបន្តដោយការបាញ់តបតគ្នាទៀត។ តាលីបង់បានចេញមុខអះអាងថានេះជាស្នាដៃរបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
នៅវេលាម៉ោង៨យប់ ម៉ោងនៅអាហ្វហ្កានីស្ថាន ថ្ងៃទី ៣សីហា ភេរវជនម្នាក់បានចុះបំផ្ទុះរថយន្តផ្ទុកពេញទៅដោយជាតិរំសេវ ឱ្យផ្ទុះលាន់ឡើង បន្ទាប់មកក្រុមភេរវជនអត្តឃាតជាច្រើនបានសម្រុកចូលក្នុងផ្ទះសមាជិកសភា ហើយពើបប្រទះនឹងកងរក្សាសន្តិសុខ ទើបមានការបាញ់តបតគ្នាឡើង។ កងកម្លាំងពិសេសបានចូលមកធ្វើអន្តរាគមន៍តាមក្រោយ។ នេះបើតាមការរៀបរាប់របស់អ្នកនាំពាក្យក្រសួងមហាផ្ទៃអាហ្វហ្កានីស្ថាន លោក Mirwais Stanekzai។
ស្នូរកាំភ្លើងមិនទាន់ស្ងាត់ផង នៅវេលាម៉ោងប្រហែល១០យប់ មានការបំផ្ទុះគ្រាប់មួយកន្លែងទៀត នៅកណ្តាលក្រុងកាប៊ូល។ មិនខ្លាំងដូចបំផ្ទុះលើកទីមួយមែន ប៉ុន្តែការផ្ទុះនេះ មានអមដោយការបំផ្ទុះគ្រាប់បែកតូចៗជាច្រើន និង ការបាញ់រះដោយប្រើកាំភ្លើងស្វ័យប្រវត្តិ តគ្នា ជាច្រើនទៀត។
កងកម្លាំងប៉ូលិស និងជើងឆើតអាហ្វហ្កានីស្ថាន បានចំណាយពេលប្រយុទ្ធតតាំងអស់ជិត៥ម៉ោង ទើបអាចយកឈ្នះ ហើយបិទបញ្ចប់ប្រតិបត្តិការកម្ចាត់ពួកភេរវជនបាន។
សហរដ្ឋអាមេរិក បានចង្អុលមុខភ្លាមថានេះជាស្នាដៃរបស់ពួកតាលីបង់ ដែលក៏បានចេញថ្លែងការណ៍លម្អិតអំពីសកម្មភាពភេរវកម្មរបស់ខ្លួន នៅព្រឹកថ្ងៃពុធទី ៤សីហានេះ។ បើតាមអ្នកនាំពាក្យតាលីបង់ ភេរវកម្មអត្តឃាតប្រឆាំងនឹងរដ្ឋមន្ត្រីក្រសួងការពារជាតិដឹកនាំដោយក្រុមយុទ្ធជនមានបំពាក់អាវុធធុនស្រាលនិងធ្ងន់ ក្នុងពេលដែលកំពុងមានការប្រជុំដ៏សំខាន់នោះ ជាការសងសឹកនឹងទង្វើរបស់រដ្ឋបាលអាហ្វហ្កានីស្ថានដែលបានបើកប្រតិបត្តិការនិងទម្លាក់គ្រាប់បែកសម្លាប់ជនស៊ីវិល។ តាលីបង់បានព្រមានទៀតថានឹងមានការវាយប្រហារថ្មីទៀតសំដៅលើអ្នកទទួលខុសត្រូវក្នុងជួររដ្ឋាភិបាលអាហ្វហ្កានីស្ថាន។
នៅព្រឹកថ្ងៃពុធនេះ មានការបំផ្ទុះគ្រាប់បែកមួយទៀតបានកើតឡើងនៅក្រុងកាប៊ូលបណ្តាលឱ្យជនស៊ីវិលពីរនាក់ និងភ្នាក់ងារសន្តិសុខម្នាក់រងរបួស។
នេះជាការវាយប្រហារទ្រង់ទ្រង់ធំពីសំណាក់ពួកតាលីបង់ ដែលដណ្តើមគ្រប់គ្រងប្រទេសកាន់តែធំឡើងៗ។ នៅមួយខែមុនការដកកងទ័ពបរទេសចេញទាំងស្រុងពីអាហ្វហ្កានីស្ថាន រដ្ឋាភិបាលកាប៊ូល គ្រប់គ្រងបានតែរដ្ឋធានីនិងទីរួមខេត្តធំៗតែប៉ុណ្ណោះ។ ហើយកាប៊ូលបានក្លាយជាទិសដៅវាយប្រហារភេរវកម្មបំផ្ទុះគ្រាប់បែកកាន់តែច្រើនឡើងតាំងពីខែឧសភាមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ