លោកស្រីអនុប្រធានាធិបតីអាេមរិកប្រាប់ទៅវៀតណាមថា ត្រូវរួមគ្នាដាក់សំពាធចិនឲ្យបញ្ឈប់ការរំលោភបំពាន
លោកស្រីកាម៉ាឡា ហារីស អនុប្រធានាធិបតីសហរដ្ឋអាេមរិក បានទៅដល់ទីក្រុងហាណូយ កាលពីយប់ថ្ងៃអង្គារ ២៤សីហាម្សិលមិញ។ នៅព្រឹកថ្ងៃពុធ លោកស្រីបានជួប ជាមួយលោកប្រធានាធិបតីវៀតណាម ង្វៀន ស៊ាន់ភុក។ នៅក្នុងជំនួបនោះ លោកស្រីបានប្រាប់ទៅភាគីវៀតណាមថា ត្រូវតែរួមគ្នារកវិធីដាក់សំពាធទៅលើចិនឲ្យខ្លាំង ដើម្បីឲ្យចិនបញ្ឈប់សកម្មសភាពរំលោភបំពាន ជ្រុលទាំងឡាយ នៅក្នុងតំបន់សមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:២៦
ក្នុងឱកាសជួបសំណេះសំណាល ជាមួយលោក ង្វៀន ស៊ាន់ភុក (Nguyen Xuan Phuc) ប្រធានាធិបបតីវៀតណាម លោកស្រីកាម៉ាឡា ហារីស បានលើកឡើងថា វៀតណាម និងអាមេរិក ត្រូវតែរួមគ្នា រកវិធីដាក់សំពាធឲ្យខ្លាំងទៅលើចិន ដើម្បីឲ្យចិនគិតពិចារណាឡើងវិញ ទាក់ទិននឹងសកម្មភាពរំលោភបំពាន ជ្រុលហួសហេតុទាំងឡាយ ដែលខ្លួនបានធ្វើ នៅក្នុងតំបន់សមុទ្រចិនខាងត្បូង។ លោកស្រីអនុប្រធានាធិបតីអាមេរិក បានធានាប្រាប់ទៅវៀតណាមដែរថា កងទ័ពជើងទឹកអាមេរិក នឹងបន្តមានវត្តមានជាប្រចាំ នៅក្នុងតំបន់នេះ ហើយព្រមទាំងអាចចូលរួមជួយពង្រឹងសមត្ថភាព ដល់កងទ័ពជើងទឹកវៀតណាម ថែមទៀតផង។
ក្រៅពីសំណុំរឿងចិន ដំណើរទៅដល់វៀតណាម របស់លោកស្រីអនុប្រធានាធិបតីអាមេរិក ក៏បានផ្តោតការយកចិត្តទុកដាក់ លើបញ្ហាសុខភាពដែរ ខណៈដែលវៀតណាមកំពុងរងនូវរលកឆ្លងរាលដាលកូវីដ១៩ ធ្ងន់ធ្ងរបំផុត។ មជ្ឈមណ្ឌលតាមដានជំងឺអាមេរិក មួយកន្លែងក្នុងក្រុងហាណូយ ត្រូវបានបើកសម្ភោធនៅក្នុងឱនេះដែរ។ លោកស្រីបានប្រកាសប្រគល់អំណោយវ៉ាក់សាំង ចំនួន១លានដូស បន្ថែមពីលើចំនួន៥លានដូស ដែលអាមេរិកបានប្រគល់ជូនវៀតណាម។
សូមបញ្ជាក់ថា មុនពេលទៅដល់វៀតណាម លោកស្រីកាម៉ាឡា ហារីស បានទៅប្រទេសសិង្ហបុរី ជាទីដែលលោកស្រីបានថ្លែងសន្ទរកថា រិះគន់ចិនចំៗ ថាចិនកំពុងតែធ្វើសកម្មភាព គំរាមសំឡុត ប្រទេសក្នុងតំបន់អាស៊ីអាគ្នេយ៍។ តែយ៉ាងណា លោកស្រីបានបញ្ជាក់ថា កម្មវត្ថុរបស់អាមេរិក នៅតំបន់អាស៊ីអាគ្នេយ៍ ឬតំបន់ឥណ្ឌូប៉ាស៊ីហ្វិក គឺមិនមែនទៅបង្ខិតបង្ខំប្រទេសណាមួយ ឲ្យជ្រើសយករវាងអាមេរិក និងចិននោះទេ។
ដោយឡែក នៅថ្ងៃពុធនេះ កាសែតចិន China Daily បានចុះផ្សាយថា ដំណើរទស្សនកិច្ច របស់លោកស្រីអនុប្រធានាធិបតីអាមេរិក នៅតំបន់អាស៊ីអាគ្នេយ៍ គឺដើម្បីតែជីកព្រែក បំបែកចិន ពីប្រទេសអាស៊ានតែប៉ុណ្ណោះ។
គួរបញ្ជាក់ផងដែរថា វៀតណាម ត្រូវបានគេសម្លឹងឃើញថា គឺអាចក្លាយជាដៃគូរយុទ្ធសាស្ត្រដ៏សំខាន់ សម្រាប់អាមេរិក ដើម្បីបន្សាបឥទ្ធិពលរបស់ចិន មិនថាក្នុងផ្នែកយុទ្ធសាស្ត្រការទូត និងផ្នែកពាណិជ្ជកម្ម។ តែយ៉ាងណា ថ្នាក់ដឹកនាំនយោបាយវៀតណាម មានការប្រុងប្រយ័ត្ន ដោយមិនផ្អៀងផ្អងទៅខាងណាជ្រុលនោះទេ។ ជាក់ស្តែង កាលពីថ្ងៃអង្គារទី២៤សីហា មុនពេលលោកស្រីកាម៉ាឡា ហារីសទៅដល់ហាណូយ លោក ផាំ មិញឈីញ (Pham Minh Chinh) នាយករដ្ឋមន្ត្រីវៀតណាម បានជួបជាមួយលោកអគ្គរដ្ឋទូតចិនប្រចាំនៅវៀតណាម ដើម្បីធានាប្រាប់ថា វៀតណាមមិនបានដើរលើបន្ទាត់គូសវាសដោយអាមេរិកនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ