បារាំង និងអូស្រា្តលីពង្រឹងកិច្ចសហប្រតិបត្តិការយោធានៅក្នុងតំបន់ឥណ្ឌូប៉ាស៊ីហ្វិក
ប្រទេសបារាំង និងអូស្រា្តលីកំពុងបញ្ចប់កិច្ចចរចាស្តីពីការពង្រឹងកិច្ចសហប្រតិបត្តិការយោធារវាងគ្នា។ កម្មវត្ថុនៃការបង្កើនកិច្ចសហប្រតិបត្តិការយោធារវាងប្រទេសទាំងពីរនេះ គឺដើម្បីធានាសន្តិសុខនៅក្នុងតំបន់ឥណ្ឌូប៉ាស៊ីហ្វិកដែលមហិច្ឆតារបស់ប្រទេសចិននៅទីនោះកំពុងបង្កឲ្យមានក្តីបារម្ភកាន់តែខ្លាំងឡើងៗ។ លោក Peter Jennings នាយកវិទ្យាស្ថាននយោបាយយុទ្ធសាស្រ្តនៅអូស្រ្តាលីបានពន្យល់ថា គឺកំណើនឥទ្ធិពលរបស់ចិនដែលបានជំរុញឲ្យក្រុងកង់បេរ៉ាបោះដៃរកក្រុងប៉ារីសនៅពេលនេះ។
ចុះផ្សាយនៅថ្ងៃ៖
ស្តាប់ - ០២:១២
វាពិតជារឿងដែលនឹងអាចកើតមានឡើងនាពេលឆាប់ៗខាងមុខដែលថា បារាំងនឹងមានវត្តមានកងទាហាន និងកងនាវាចម្បាំងឈរជើងនៅលើមូលដ្ឋានទ័ពអូស្រា្តលី។ វាអាចនឹងមានរូបភាពនេះ ព្រោះបារាំង និងអូស្រា្តលីកំពុងចរចាបញ្ចប់លើរបៀបវារៈនៃកិច្ចព្រមព្រៀងមួយដែលនឹងអាចធ្វើឲ្យបារាំងក្លាយជាសម្ព័ន្ធមិត្តជិតស្និទ្ធបំផុតរបស់អូស្ត្រាលី បន្ទាប់ពីអាមេរិក។ ការរំកិលខិតចូលជិតគ្នារវាងបារាំង និងអូស្រា្តលីពេលនេះបានកើតមានឡើង ខណៈដែលចិនដែលជាដៃគូពាណិជ្ជកម្មដ៏សំខាន់របស់អូស្រ្តាលីកំពុងបង្កើនឥទ្ធិពលកាន់តែខ្លាំងនៅក្នុងតំបន់។
លោក Peter Jennings នាយកវិទ្យាស្ថាននយោបាយយុទ្ធសាស្រ្តនៅអូស្រ្តាលីបានពន្យល់បកស្រាយថា គឺកំណើនឥទ្ធិពលរបស់ចិនដែលបានជំរុញឲ្យអូស្រ្តាលីបង្កើនទំនាក់ទំនងកាន់តែជិតស្និទ្ធជាមួយបណ្តាប្រទេសអឺរ៉ុបសំខាន់ៗ ដូចយ៉ាងប្រទេសបារាំងជាដើម។ ត្រង់ចំណុចនេះត្រូវបានលោក Peter Jennings លើកយកហេតុផលចំនួនពីរទៅបញ្ជាក់ ទី១ បណ្តាប្រទេសអឺរ៉ុបសំខាន់ៗទាំងនោះតំណាងឲ្យជម្រើសសេដ្ឋកិច្ចរបស់អូស្រា្តលី ហើយទី២ បណ្តាប្រទេសអឺរ៉ុបសំខាន់ៗទាំងនោះ និងអូស្រា្តលីបានចែករំលែកតម្លៃដូចគ្នា។
គួរបញ្ជាក់ថា ការដែលបារាំងត្រូវបានគេមើលឃើញជាសម្ព័ន្ធមិត្តរឹងមាំរបស់អូស្រា្តលីក៏ព្រោះតែបារាំងកំពុងមានវត្តមានស្រាប់នៅក្នុងតំបន់ ពិសេសនៅ Nouvelle-Calédonie និងនៅ Polynésie ដែលជាដែនដីរបស់ខ្លួន។ មួយវិញទៀត អូស្រា្តលីបានទិញនាវាមុជទឹកបារាំងចំនួន ១២គ្រឿង។ ចំណែកប្រធានាធិបតីបារាំងលោកម៉ាក្រុងធ្លាប់បានប្រាប់ឲ្យដឹងថា លោកចង់បង្កើនការចូលរួមរបស់បារាំងនៅក្នុងតំបន់ឥណ្ឌូប៉ាស៊ីហ្វិក។ ខណៈនេះ ទ័ពថ្មើរជើងបារាំង និងអូស្រា្តលីកំពុងធ្វើសមយុទ្ធរួមគ្នានៅក្នុងទីក្រុង Queensland។
នៅឆ្នាំ ២០២២ គឺជាសមយុទ្ធរបស់ទ័ពអាកាសដែលបារាំង និងអូស្រ្តាលីគ្រោងរៀបចំរួមគ្នា។ បន្ទាប់មកនៅឆ្នាំ ២០២៣ គឺជាគម្រោងធ្វើសមយុទ្ធរបស់ទ័ពជើងអាកាសដែលនឹងមានការចូលរួមពីអាមេរិកម្នាក់ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ