របាយការណ៍៖ ស្លាប់ប្រមាណជិត២លាននាក់ក្នុងមួយឆ្នាំ ដោយសារគ្រោះថ្នាក់ និង ជម្ងឺពាក់ព័ន្ធនឹងការងារ
យ៉ាងហោចណាស់ មានមនុស្សជិត២លាននាក់ ដែលស្លាប់ដោយសារគ្រោះថ្នាក់ការងារ ឬជំងឺផ្សេងៗដែលពាក់ព័ន្ធនឹងការងារ។ នេះបើផ្អែកតាមរបាយការណ៍ ស្រាវជ្រាវរួមគ្នាដោយអង្គការសុខភាពពិភពលោក និងអង្គការពលកម្មអន្តរជាតិ នៅចន្លោះពីឆ្នាំ ២០០០ ដល់ ២០១៦។ របាយការណ៍ ដែលទើបតែចេញផ្សាយ កាលពីថ្ងៃសុក្រទី១៧កញ្ញា បានសង្កត់ធ្ងន់ទំហំនៃករណីស្លាប់ ដែលពាក់ព័ន្ធនឹងការងារ បានកើនឡើងជាលំដាប់។ ជាងនេះទៀត របាយការណ៍នេះ បានធ្វើឡើង នៅមុនវិបត្តិជំងឺឆ្លងកូវីដ១៩ ថែមទៀតផង។ អង្គការអន្តរជាតិទាំង២អំពាវនាវ ឲ្យនយោជក សហគ្រាសក្រុមហ៊ុនទាំងអស់ ត្រូវតែគិតគូរពីសុខភាព និងសន្តិសុខរបស់បុគ្គលិកកម្មករ ឲ្យបានម៉ដ្ឋចត់បំផុត។
ចុះផ្សាយនៅថ្ងៃ៖
ស្តាប់ - ០២:៥៥
នៅក្នុងឆ្នាំ២០០០ មានមនុស្សយ៉ាងហោច ១លាន៧សែននាក់ ដែលបានស្លាប់ ដោយគ្រោះថ្នាក់ការងារ និងដោយសារជម្ងឺដង្កាត់ផ្សេងៗ បណ្តាលមកពីកត្តាការងារ។ តួលេខនេះ បានកើនឡើង ដល់ ជិត១លាន៩សែននាក់ នៅក្នុងឆ្នាំ២០១៦។ នេះបើផ្អែកតាមរបាយការណ៍ ដែលធ្វើឡើងរួមគ្នាជាលើកទីមួយ ដោយអង្គការសុខភាពពិភពលោក និងអង្គការពលកម្មអន្តរជាតិ។
ភាគច្រើនបំផុតនៃករណីស្លាប់ គឺមាននៅតាមប្រទេសអាស៊ីអាគ្នេយ៍ និងប្រទេសតំបន់ប៉ាស៊ីហ្វិកខាងលិច ព្រមទាំងក្នុងចំណោមបុគ្គលិក ពលករ ដែលមានអាយុលើសពី៥៤ឆ្នាំឡើងទៅ។ របាយការណ៍នេះ បានរំលេចឲ្យឃើញ នូវកត្តាចំនួន១៩ ដែលចូលរួម បង្កបញ្ហាសុខភាពជំងឺឈឺថ្កាត់ដល់នយោជិត។ កត្តាទាំងនោះមានដូចជា ការធ្វើការយូរខ្លាំង លើសកម្លាំង ការប្រឈមខ្លាំងនឹងខ្យល់បរិយាកាសមិនស្អាតបរិសុទ្ធ នៅកន្លែងការងារ ដូចជាសារធាតុពុល ឧស្ម័នពុល ផ្សែងល្អងសារធាតុគីមី ដែលបង្កជាជម្ងឺផ្លូវដង្ហើម ជម្ងឺមហារីក ព្រមទាំងសម្លេងថ្លង់ខ្លាំងជាប្រចាំ ជាដើម ។ល។
យោងតាមអង្គការសុខភាពពិភពលោក ក្នុងឆ្នាំ២០១៦ កត្តាធ្វើការយូរម៉ោង ហួសកម្លាំង ដល់ទៅ៥៥ម៉ោងជាមធ្យមក្នុងមួយសប្តាហ៍ គឺជាមូលហេតុចំបង បណ្តាលឲ្យស្លាប់មនុស្សប្រមាណ៧៥ម៉ឺននាក់ ដោយសារតែជំងឺដាច់សរសៃឈាម។ ចំណែកកត្តាបរិយាកាសពុល ផ្សែង ឧស្ម័ន សារធាតុគីមី វិញ បានបណ្តាលឲ្យមនុស្សស្លាប់ ប្រមាណ៤៥ម៉ឺននាក់ក្នុងមួយឆ្នាំ។ ក្នុងឆ្នាំ២០១៦ ជម្ងឺដង្កាត់នានាបណ្តាលមកពីការងារ គឺជាមូលហេតុនៃករណីស្លាប់ដែលពាក់ព័ន្ធនឹងការងារ ប្រមាណ៨០%។ ក្រៅពីនេះ នៅមានករណីគ្រោះថ្នាក់នៅកន្លែងធ្វើការងារ ដែលបណ្តាលឲ្យស្លាប់មនុស្សចំនួន ៣៦ម៉ឺននាក់ ក្នុងមួយឆ្នាំ។
លោកអគ្គលេខាធិការអង្គការសុខភាពពិភពលោក បានលើកឡើងថា មិនត្រូវឲ្យមាននរណាម្នាក់ ស្លាប់ ឬធ្លាក់ខ្លួនឈឺ ដោយសារបំពេញការងារ ប្រកបរបរចិញ្ចឹមជីវិតនោះទេ។ លោកបន្ថែមថា របាយការណ៍នេះ គឺវាជាការទាញសញ្ញាអាសន្ន ផ្ញើទៅកាន់នយោជក សហគ្រាស រោងចក្រ ក្រុមហ៊ុនទាំងអស់ ឲ្យគិតគូរ កែលម្អលក្ខខណ្ឌការងារ ទាក់ទងនឹងផាសុខភាព ព្រមទាំងសុខភាព សន្តិសុខរបស់បុគ្គលិក។
លិខិតប្រកាសរបស់អង្គការសុខភាពពិភពលោក បានសង្កត់ធ្ងន់ថា ជម្ងឺដង្កាត់ និង បញ្ហាសុខភាពរបស់បុគ្គលិក ពលករ កម្មករ គឺវាអាចជះផលវិបាក ទំងន់បន្ទុកទៅលើវិស័យសុខាភិបាលទាំងមូល តាមប្រទេសនីមួយៗ។ ជាងនេះទៀត សុខភាពបុគ្គលិកចុះទ្រុធទ្រោម វាក៏ធ្វើឲ្យខាតបង់ផងដែរ ដល់សង្វាក់ផលិតកម្ម ប៉ះពាល់ជីវភាពគ្រួសារ ព្រមទាំងបង្អាក់ការរីកចម្រើនទូទៅ របស់សង្គមជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ