អាស៊ានពិចារណាចង់ផាត់មេដឹកនាំយោធាភូមា មិនឱ្យចូលរួមក្នុងជំនួបកំពូល
ក្រុមប្រទេសជាសមាជិកប្រជាអាស៊ីអាគ្នេយ៍ ហៅកាត់ថាអាស៊ាន កំពុងពិភាក្សាគ្នាអំពីលទ្ធភាព មិនអញ្ជើញ មេដឹកនាំយោធាភូមា ចូលរួមក្នុងជំនួបកំពូលអាស៊ាន ដែលនឹងប្រព្រឹត្តទៅនៅចុងខែតុលាខាងមុខនេះ។ មិនឱ្យលោក មីន អ៊ុងឡាំង ចូលក្នុងក្រុម ដើម្បីជាការព្រមានចំពោះទង្វើបិទខ្ទប់ផែនការនាំភូមាទៅសន្តិភាព។ នេះបើតាមការអះអាងរបស់អ្នកទទូលខុសត្រូវការទូតអាស៊ាន នៅថ្ងៃពុធទី ៦ តុលា ២០២១។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងជំនួបថ្នាក់រដ្ឋមន្ត្រីការបរទេសអាស៊ាន តាមវីដេអូ ម៉ាឡេស៊ីនិងបណ្តាប្រទេសផ្សេងទៀត បានលើកសំណើអំពីលទ្ធភាពមិនអញ្ជើញមេដឹកនាំភូមាឱ្យមកចូលរួមក្នុងជំនួបកំពូលអាស៊ានលើកនេះទេ។ ហើយអាស៊ានកំពុងពិចារណាអំពីបញ្ហានេះយ៉ាងស៊ីជម្រៅដែរ។ នេះបើតាមការគូសបញ្ជាក់របស់លោក អេរីវ៉ាន់ យូស៊ុហ្វ Eriwan Yosof អន្តរការីអាស៊ានទទួលបន្ទុកដោះស្រាយវិបត្តិភូមា។
សម្រាប់លោកអេរីវ៉ាន៉ យូស៊ុហ្វ អាស៊ានបានអនុម័តផែនការ៥ចំណុច ដោយមានការព្រមព្រៀងពីភូមាផ្ទាល់ កាលពីខែមេសា២០២១ ដើម្បីស្តារនិងស្ថាបនាផ្លូវចរចានាំភូមាចេញពីវិបត្តិ និងសម្រួលការនាំជំនួយមនុស្សធម៌ទៅជួយប្រជាពលរដ្ឋភូមា ប៉ុន្តែរបបសឹកភូមា បែរជារារាំងការអនុវត្តផែនការសន្តិភាព និងពន្យឺតដំណើរទស្សនកិច្ចរបស់អន្តរការីអាស៊ាននៅក្នុងទឹកដីភូមាទៅវិញ។ ដូច្នេះតើមានប្រយោជន៍អ្វីដែលមេដឹកនាំភូមាត្រូវមកចូលរួមក្នុងជំនួបកំពូល ដែលចង់ឃើញវឌ្ឍនភាពនៃផែនការ៥ចំណុចនោះ។ ប៉ុន្តែអាស៊ានមិនទាន់ ពិចារណាអំពីការព្យួរបេក្ខភាពភូមាពីអង្គការសមាគមន៍ប្រជាជាតិអាគ្នេយ៍ នៅឡើយទេសម្រាប់ពេលនេះ។ នេះបើតាមចម្លើយរបស់លោកអេរីវ៉ាន់ យូស៊ុហ្វ ទៅកាន់អ្នកសារព័ត៌មាន។
អាស៊ានដែលមានសមាជិក១០ប្រទេស រាប់ទាំងភូមាមួយផង ស្ថិតក្រោមសម្ពាធយ៉ាងខ្លាំង តាំងពីភូមាធ្លាក់ក្នុងវិបត្តិនយោបាយដ៏ធ្ងន់ធ្ងរ ផ្តើមដោយការធ្វើរដ្ឋប្រហារយោធាទម្លាក់រដ្ឋាភិបាលស៊ីវិលនៅថ្ងៃទី ១កុម្ភៈ២០២១ និងបន្តដោយការបង្ក្រាបបង្ហូរឈាមចលនាបាតុកម្មប្រឆាំង។ ក្រោយការចរចាអស់ជាច្រើនខែ នៅទីបំផុត អាស៊ានបានតែងតាំងអនុរដ្ឋមន្ត្រីក្រសួងការបរទេសព្រុយណេលោក អេរីវ៉ាន់ យូស៊ុហ្វ ជាអន្តរការីទទួលបន្ទុកដោះស្រាយវិបត្តិភូមា។
លោកយូស៊ុហ្វ ត្រៀមជាស្រេចនឹងធ្វើដំណើរទៅប្រទេសភូមា និងកំពុងរង់ចាំមើលរបៀបវារៈនៃទស្សនកិច្ច ថាតើលោកអាចធ្វើដំណើរទៅទីណាខ្លះ និងមានជំនួបជាមួយឥស្សរជនណាខ្លះ។ ប៉ុន្តែកាលពីថ្ងៃទី១តុលា អ្នកនាំពាក្យរបបសឹកភូមាបានព្រលយថា គេមិនទាន់អាចអនុញ្ញាតឱ្យអន្តរការីអាស៊ាន មានជំនួបជាមួយអ្នកដែលតុលាការកំពុងកាត់ទោសទេ ពោលគឺ លោកស្រីអ៊ុងសានស៊ូជី បានទេ។ អ្នកនាំពាក្យរបបសឹកបានត្រឹមអះអាងថា ភូមានឹងបើកទ្វារឱ្យអន្តរការីអាស៊ានចូលជួបគ្រប់ភាគី នៅពេលវេលាដ៏សមស្របមួយ។ តើជាពេលណា ? គ្មានចម្លើយបញ្ជាក់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ