ហុងកុងអនុម័តច្បាប់ថ្មីដើម្បីរឹតបន្តឹងលើការចាក់បញ្ចាំងភាពយន្ត
សភាហុងកុង នៅថ្ងៃពុធ ទី២៧ តុលា បានអនុម័តច្បាប់ថ្មីមួយដើម្បីរឹតបន្តឹងលើការចាក់បញ្ចាំងកុន។ ច្បាប់ថ្មីនេះនឹងផ្តល់សិទ្ធិអំណាចឲ្យអាជ្ញាធរក្នុងការហាមប្រាមភាពយន្តដែលបង្កប់ន័យឬសារគំរាមកំហែងដល់ផលប្រយោជន៍សន្តិសុខជាតិចិន។ ចំណាត់ការចុងក្រោយរបស់រដ្ឋអំណាចហុងកុងនេះ ត្រូវបានអ្នករិះគន់ប្រដូចទៅនឹងខ្យល់ដែលកំពុងបក់បោកសេរីភាពក្នុងវិស័យសិល្បៈភាពយន្តហុងកុង។
ចុះផ្សាយនៅថ្ងៃ៖
ស្តាប់ - ០២:០៤
ក្រោយការតវ៉ាដ៏ធំ និងជាញឹកញាប់ពីក្រុមអ្នកប្រជាធិបតេយ្យធ្វើឲ្យដែនដីហុងកុងជួបភាពច្របូកច្របល់ខ្លាំងកាលពីពីរឆ្នាំមុន អាជ្ញាធរហុងកុងបានផ្តើមចាត់វិធានការរឹតបន្តឹងផ្សេងៗដើម្បីការពារកុំឲ្យមានចលនាប្រឆាំងទល់នឹងទីក្រុងប៉េកាំងតទៅទៀត។
វិស័យភាពយន្តនិងវីដេអូឯកសារគឺជាផ្នែកមួយដែលអាជ្ញាធរហុងកុងដាក់បញ្ចូលក្នុងបញ្ជីដែលត្រូវត្រួតពិនិត្យតឹងរឹងដែរ។ កាលពីខែមិថុនាកន្លងទៅ អាជ្ញាធរបានប្រកាសថានឹងមានការត្រួតពិនិត្យលើភាពយន្តថ្មីដើម្បីការពារកុំឲ្យមានខ្លឹមសារបង្កប់ន័យបំពានច្បាប់សន្តិសុខជាតិត្រូវបានគេយកទៅចាក់បញ្ចាំងផ្សាយ។
ប៉ុន្តែច្បាប់ថ្មីដែលទើបបានអនុម័តកាលពីថ្ងៃពុធម្សិលមិញដោយសភាហុងកុង ក៏អនុញ្ញាតផងដែរឲ្យអាជ្ញាធរអាចត្រួតពិនិត្យលើភាពយន្តឬកុនចាស់ៗដែលធ្លាប់ទទួលបានភ្លើងខៀវរួចពីមុនមកហើយ។ និយាយជារួមមក រដ្ឋអំណាចហុងកុងមានសិទ្ធិក្នុងការដកអាជ្ញាប័ណ្ឌចាក់បញ្ចាំងទាំងភាពយន្តថ្មីនិងភាពយន្តចាស់ឲ្យតែពួកគេចាត់ទុកថាខ្លឹមសាររឿងដើរផ្ទុយពីផលប្រយោជន៍សន្តិសុខជាតិចិន។
យោងតាមទីភ្នាក់ងារសារព័ត៌មាន AFP ទង្វើបំពានច្បាប់រឹតបន្តឹងលើការចាក់បញ្ចាំងកុនរបស់ហុងកុងរួមមានការជាប់ពន្ធនាគាររហូតដល់រយៈពេល ៣ ឆ្នាំ និងអាចរងពិន័យជាប្រាក់ចំនួន ១ លានដុល្លារហុងកុង ឬស្មើនឹងប្រមាណជា ១៣ ម៉ឺនដុល្លារ។
ទាក់ទងរឿងនេះ មន្ត្រីទទួលបន្ទុកខាងពាណិជ្ជកម្មហុងកុង លោក Edward Yau បានលើកឡើងថាច្បាប់ថ្មីនឹងអនុវត្តផងដែរលើភាពយន្តដែលចាក់បញ្ចាំងតាមអ៊ីនធ័រនែត។
ចំណែកក្រុមអ្នករិះគន់វិញនិយាយថា ច្បាប់របស់ហុងកុងខាងលើនឹងទៅបង្អាក់ភាពរស់រវើករបស់ឧស្សាហកម្មភាពយន្តក្នុងស្រុក ប៉ះពាល់ដល់សិទ្ធិសេរីភាពក្នុងការបញ្ចេញមតិ និងនាំហុងកុងឲ្យកាន់តែខិតទៅជិតចិនដីគោក។ ចិនដីគោកដែលជាកន្លែង ភាពយន្តត្រូវបានត្រួតពិនិត្យយ៉ាងម៉ត់ចត់ ហើយមានតែភាពយន្តឬវីដេអូឯកសារលោកខាងលិចមួយចំនួនប៉ុណ្ណោះដែលគេឃើញផ្សព្វផ្សាយនៅទីនោះជារៀងរាល់ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ