តាលីបង់ហាមមិនឱ្យស្ត្រីធ្វើដំណើរឆ្ងាយតែម្នាក់ឯង
សិទ្ធិនិងសេរីភាពរបស់ស្ត្រី រួចកាន់តែតូចទៅៗហើយ នៅអាហ្វហ្កានីស្ថាន។ ខុសពីពាក្យសន្យា តាលីបង់បានចាប់ផ្តើមរឹតវិធានការប្រឆាំងនឹងស្ត្រីភេទ។ នៅថ្ងៃអាទិត្យទី ២៦ ធ្នូ២០២១ រដ្ឋាភិបាលតាលីបង់បានប្រកាសហាមឃាត់មិនឱ្យស្ត្រីធ្វើដំណើរផ្លូវឆ្ងាយតែម្នាក់ឯង ដោយគ្មានបុរសក្នុងគ្រួសារជាអ្នកជូនទេ។
ចុះផ្សាយនៅថ្ងៃ៖
ស្តាប់ - ០២:១២
នៅក្នុងអនុសាសន៍ ដែលចេញផ្សាយតាមប្រព័ន្ធសង្គម តាលីបង់បានថែមទាំងអំពាវនាវឱ្យអ្នកបើកបររថយន្តទាំងអស់ ទទួលដឹកស្ត្រីដែលរុំស្បៃក្បាលតាមប្រពៃណីអ៊ីស្លាម។ តើជាការរុំស្បៃក្បាល គ្របជិតមុខឈឹង ឬគ្រាន់តែជាការពាក់កន្សែងគ្របសក់ ដូចដែលស្ត្រីអាហ្វហ្កានីស្ថានភាគច្រើនពាក់សព្វថ្ងៃ ? តាលីបង់មិនបានបញ្ជាក់លម្អិតត្រង់ចំណុចនេះទេ។
ប៉ុន្តែនៅក្នុងបទបញ្ញត្តិ តាលីបង់ បានដាក់បម្រាមយ៉ាងច្បាស់លាស់ថា ស្ត្រីអាចធ្វើដំណើរលើសពី៧២គីឡូម៉ែត្រពីផ្ទះបាន ដរាបណាតែមានសមាជិកក្នុងគ្រួសារណាម្នាក់ជូន។ អ្នកជូននោះត្រូវមានភេទប្រុសទៀត។ នេះបើតាមការគូសបញ្ជាក់របស់អ្នកនាំពាក្យនៃក្រសួងថែរក្សានិងការពារសីលធម៌តាលីបង់។
សេចក្តីសម្រេចថ្មីហាមឃាត់មិនឱ្យស្រ្តីធ្វើដំណើរឆ្ងាយតែម្នាក់ឯង ធ្លាក់មកក្រោយពីក្រសួងទូរទស្សន៍ទើបបានស្នើសុំឱ្យឈប់បញ្ចាំងភាពយន្តភាគ ដែលមានស្ត្រីសម្តែង និងក្រោយពីមានការស្នើសុំឱ្យអ្នកកាសែតភេទស្រី ពាក់ស្បៃអ៊ីស្លាម នៅពេលចេញនិយាយតាមកញ្ចក់ទូរទស្សន៍។
ទោះបីជាបានទន្ទេញពាក្យដដែលៗថាមិនអនុវត្តនយោបាយបែបជ្រុលនិយមដូច សម័យកាន់អំណាចលើកទីមួយ ពីឆ្នាំ ១៩៩៦-២០០១មែន តែតាំងពីដណ្តើមក្រុងកាប៊ុលវិញបាន នៅខែសីហាមក តាលីបង់បានចេញបម្រាមជាច្រើនកំរិតសេរីភាពស្ត្រី និងក្មេងស្រី។ កាលពីដើមខែធ្នូ អគ្គមគ្គុទេសក៏របស់ចលនាតាលីបង់បានចេញក្រិត្យមួយបញ្ជាឱ្យរដ្ឋាភិបាលគោរពសិទ្ធិស្ត្រី តែក្រិត្យនោះពុំមានចែងអំពីសិទ្ធិទទួលការសិក្សាអប់រំទេ។
សកម្មជនការពារសិទ្ធិស្ត្រី និងកុមារ សង្ឃឹមថា តាលីបង់នឹងប្រឹងធ្វើសម្បទានខ្លះ ដើម្បីឱ្យសហគមន៍អន្តរជាតិព្រមទទួលស្គាល់រដ្ឋាភិបាលរបស់ខ្លួនផង និងដើម្បីបានទទួលជំនួយដ៏ចាំបាច់សម្រាប់ប្រទេស ពីអន្តរជាតិផង។
សូមបញ្ជាក់ថា ក្នុងសម័យតាលីបង់កាន់អំណាចលើកដំបូង ស្ត្រីត្រូវពាក់Burqa បាំងមុខជិតឈឹង និងមិនអាចដើរចេញពីផ្ទះដោយគ្មានបុរសជូនទេ។ ស្ត្រីនិងក្មេងស្រី គ្មានសិទ្ធិធ្វើការនិងសិក្សាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ