ខេត្តស៊ីអានរបស់ចិន ទទួលស្គាល់ថាកំពុងមានបញ្ហាខ្វះស្បៀងអាហារ
ដោយហេតុតែបិទខ្ទប់ខេត្តទាំងមូល ដើម្បីទប់ស្កាត់កូវីដ១៩ ប្រជាពលរដ្ឋរស់នៅក្នុងខេត្តស៊ីអាន កំពុងជួបគ្រោះខ្វះស្បៀងអាហារ និងផលិតផលចាំបាច់ប្រចាំថ្ងៃសម្រាប់រស់។ ប្រជាពលរដ្ឋបានស្រែកថ្នូរតាមប្រព័ន្ធសង្គម ហើយអាជ្ញាធរខេត្តក៏បានប្រកាសទទួលស្គាល់នៅថ្ងៃពុធទី ២៩ធ្នូ អំពីភាពខ្វះខាតនេះដែរ។
ចុះផ្សាយនៅថ្ងៃ៖
ស្តាប់ - ០២:១១
ស៊ីអាន ខេត្តដ៏ល្បីខាងមានរូបសំណាកទាហានធ្វើដីឥដ្ឋ និងប្រជាជនជាង១៣លាននាក់ ត្រូវជាប់បម្រាមបិទខ្ទប់តាំងពីថ្ងៃព្រហស្បតិ៍ទី ២២ធ្នូសប្តាហ៍មុនមក ក្រោយពីមានផ្ទុះករណីឆ្លងរាលដាលកូវីដ១៩។ ប្រជាពលរដ្ឋមានសិទ្ធិចេញក្រៅផ្ទះរកទិញម្ហូបអាហារ ជារៀងរាល់បីថ្ងៃម្តង។ ប៉ុន្តែតាំងពីថ្ងៃចន្ទទី ២៧ធ្នូ អាជ្ញាធរបានរឹតបន្តឹងវិធានការបន្ថែមទៀត មិនអនុញ្ញាតឱ្យពលរដ្ឋដើរចេញពីផ្ទះសោះ លើកលែងតែដើម្បីទៅធ្វើតេស្ត។
ប្រឈមនឹងបម្រាមយ៉ាងតឹងតែងដូច្នេះ តាំងពីថ្ងៃអង្គារទី២៨ធ្នូមក ប្រជាពលរដ្ឋជាច្រើនបាននាំគ្នាស្រែករកជំនួយតាមប្រព័ន្ធសង្គម ខ្លះសុំអាហារ ខ្លះសុំផលិតផលចាំបាច់សម្រាប់រស់ ដោយថ្ងូចថ្ងួរថា ពួកគេគ្មានអ្វីហូបទេ ពីរបីថ្ងៃមុនពួកគេអាចចេញទៅផ្សារបាន តែឥលូវលែងមានសិទ្ធិសោះ ហើយហាងទំនិញក៏លែងមានអ្វីលក់និងលែងទទួលកុម្មង់ដឹកជញ្ជូនតាមអនឡាញទៀត។
ក្រោមសម្រែករបស់ពលរដ្ឋ នៅថ្ងៃពុធទី២៩ធ្នូនេះ អាជ្ញាធរខេត្តស៊ីអាន បានប្រកាសទទួលស្គាល់ នៅចំពោះមុខអ្នកសារព័ត៌មាន ថាអាជ្ញាធរពិតជាខ្វះ បុគ្គលិក មធ្យោបាយ ហើយប្រព័ន្ធចែកចាយស្បៀងអាហារជូនប្រជាពលរដ្ឋពិតជារអាក់រអួលខ្លាំងមែន។ អាជ្ញាធរខេត្តកំពុងប្រឹងប្រែង ប្រមូលផ្តុំក្រុមហ៊ុន បង្កើនសកម្មភាពចែកចាយស្បៀង និងសម្រួលប្រព័ន្ធផ្គត់ផ្គង់គ្រឿងឧបភោគបរិភោគ និងបរិក្ខារចាំបាច់ហើយ។
ជាសរុបខេត្តស៊ីអាន រាប់ឃើញមានអ្នកវិជ្ជមានកូវីដតែ៩៦០ករណីប៉ុណ្ណោះ ជាចំនួនដ៏តិចតួចណាស់ បើប្រៀបទៅនឹងសហរដ្ឋអាមេរិក ឬអឺរ៉ុប ដែលមួយៗថ្ងៃមានអ្នកវិជ្ជមានកូវីដដល់ទៅ ជាង២០ម៉ឺននាក់។ ប៉ុន្តែតាំងពីផ្ទុះកូវីដ១៩មក ប៉េកាំងបានប្រកាន់យកយុទ្ធសាស្ត្រ ហ្សេរ៉ូកូវីដ ដែលតម្រូវឱ្យអាជ្ញាធរតំបន់នីមួយៗ ត្រូវចាត់វិធានការបិទខ្ទប់ដ៏តឹងតែងភ្លាម។ អាជ្ញាធរថែមទាំងបានចាប់ខ្លួនមនុស្សអស់៧នាក់ ពីបទធ្វើឱ្យខូចសណ្តាប់ធ្នាប់សាធារណៈ តាមការប៉ុនប៉ងចង់ពង្វាងច្បាប់ចត្តាឡីស័ក។ ចិនមិនអនុគ្រោះឱ្យកូវីដរាលដាលឆ្លងពីខេត្តមួយទៅខេត្តមួយទេ ព្រោះនៅខែកុម្ភៈខាងមុខ ប៉េកាំងត្រូវទទួលរៀបចំកីឡាអូឡាំពិករដូវរងារផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ