ឥណ្ឌូណេស៊ី៖សភាយល់ព្រមឲ្យប្តូរ និងផ្ទេរទីក្រុងរដ្ឋបាលហ្សាការតាទៅទីក្រុងរដ្ឋបាលថ្មី « នូសានតារ៉ា »
នៅក្នុងប្រទេសឥណ្ឌូណេស៊ី សភាបានអនុម័តច្បាប់មួយនាថ្ងៃអង្គារ ទី១៨ មករាស្តីពីការប្តូរ និងផ្ទេរទីក្រុងរដ្ឋបាលបច្ចុប្បន្នឈ្មោះ « ហ្សាការតា » ទៅទីក្រុងរដ្ឋបាលថ្មីឈ្មោះ « នូសានតារ៉ា »។ ទីក្រុងរដ្ឋបាលថ្មី « នូសានតារ៉ា » មានចម្ងាយប្រមាណជា ២ ០០០គីឡូម៉ែត្រពីទីក្រុងហ្សាការតា និងត្រូវសាងសង់លើផ្ទៃដីទំហំជាង ៥៦ ០០០ហិចតាស្ថិតលើកោះប័រណេអូក្នុងខេត្តកាលីម៉ានតាន។ ចំណែកទឹកប្រាក់ចំណាយក្នុងការសាងសង់ទីក្រុងរដ្ឋបាលថ្មីនេះមានប្រមាណជា ៣៣ ០០០លានដុល្លារ។
ចុះផ្សាយនៅថ្ងៃ៖
ស្តាប់ - ០២:១១
ជាមួយនឹងការបំពាក់អនាគតទីក្រុងរដ្ឋបាលថ្មីឈ្មោះ « នូសានតារ៉ា » ទីក្រុងរដ្ឋបាល « ហ្សាការតា » សព្វថ្ងៃត្រូវបានរដ្ឋាភិបាលរក្សាទុកត្រឹមជាទីក្រុងសេដ្ឋកិច្ច។ តាមពិត គម្រោង និងគំនិតនៃការបង្កើតឲ្យមានទីក្រុងរដ្ឋបាលថ្មីត្រូវបានប្រធានាធិបតីលោកចូកូ វីដូដូប្រកាសតាំងពីឆ្នាំ ២០១៩ មកម្ល៉េះ។ ជម្រើស និងការសម្រេចរបស់លោកវីដូដូបានធ្វើឡើងក្រោមហេតុផលសំខាន់ចំនួនពីរ ទី១ ក្រុងហ្សាការតាដែលមានប្រជាជនរស់នៅជាង ៣០លាននាក់ខ្វះហេដ្ឋារចនាសម្ព័ន្ធ កកស្ទះខ្លាំង និងមានកម្រិតខ្យល់ពុលខ្ពស់ ហើយហេតុផលទី២ ក្រុងហ្សាការតាឧស្សាហ៍លិចទឹក។
នៅក្នុងសំណើទីតាំងសាងសង់ទីក្រុងរដ្ឋបាលថ្មីចំនួន ៨០កន្លែង រដ្ឋាភិបាលបានសម្រេចជ្រើសយកកោះប័រណេអូដែលជាជម្រកព្រៃត្រូពិកមួយដ៏ធំក្នុងលោក។ មួយវិញទៀត ទីក្រុងរដ្ឋបាលថ្មី « នូសានតារ៉ា » ដែលមានចម្ងាយប្រមាណ ២ ០០០គីឡូម៉ែត្រពីទីក្រុងហ្សាការតាត្រូវសាងសង់លើផ្ទៃដីទំហំជាង ៥៦ ០០០ហិចតា និងត្រូវចំណាយថវិកាប្រមាណជា ៣៣ ០០០លានដុល្លារ។ គម្រោងសាងសង់ទីក្រុងរដ្ឋបាលថ្មីដែលត្រូវចាប់ផ្តើមពីឆ្នាំ ២០២០ ត្រូវបានជួបភាពរអាក់រអួលដោយវិបត្តិកូវីដ១៩។ ការសាងសង់ទីក្រុងថ្មីត្រូវធ្វើជាដំណាក់ការចាប់ពីពេលនេះរហូតដល់ឆ្នាំ ២០៤៥។
កវីដូដូបានបញ្ជាក់ក្នុងថ្ងៃចន្ទ ទី១៧ មករាថា ទីក្រុងរដ្ឋបាលថ្មីដែលសាងសង់នៅកណ្តាលព្រៃលើកោះប័រណេអូមិនមែនត្រឹមជាទីក្រុងគ្មានឧស្ម័នផ្ទះកញ្ចក់ប៉ុណ្ណោះទេ តែក៏ជាមជ្ឈមណ្ឌលនវានុវត្តន៍ និងជាទីក្រុងឆ្លាតវៃដែលអាចទាក់ទាញអ្នកមានទេពកោសល្យបរទេស។ គួរបញ្ជាក់ថានៅអាស៊ី ឥណ្ឌូណេស៊ីមិនមែនជាប្រទេសទី១ ដែលបានប្តូរទីតាំង និងប្តូរឈ្មោះទីក្រុងរដ្ឋបាលទេ។ ម៉ាឡេស៊ីបានរើទីក្រុងរដ្ឋបាលពីគូឡាឡាំពួរទៅដាក់នៅទីក្រុងពូត្រាយ៉ាយ៉ា ហើយភូមាបានរើទីក្រុងរដ្ឋបាលពីរ៉ង់ហ្គូនទៅដាក់នៅទីក្រុងណៃពីដ៏៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ