កូរ៉េខាងជើងគំរាមថា នឹងចាប់ផ្តើមធ្វើការសាកល្បង មីស៊ីលនុយក្លេអ៊ែរ និងបាលីស្ទីកចំងាយឆ្ងាយឡើងវិញ
របបផ្តាច់ការកូរ៉េខាងជើង បានប្រកាសគំរាមនៅថ្ងៃព្រហស្បតិ៍ទី២០មករានេះថា ខ្លួនអាចនឹងចាប់ផ្តើម ធ្វើតេស្តសាកល្បងមីស៊ីលនុយក្លេអ៊ែរ និងមីស៊ីលបាលីស្ទីកចំងាយឆ្ងាយឡើងវិញ។ ការសាកល្បងអាវុធទាំង២ប្រភេទនេះ ត្រូវបានកូរ៉េខាងជើងផ្អាក តាំងតែពីឆ្នាំ២០១៧មក ដើម្បីផ្តល់លទ្ធភាពដល់ការចរចា។ ការចាប់ផ្តើមសាកល្បងឡើងវិញនេះ គឺជាសញ្ញាបញ្ជាក់ថា កូរ៉េខាងជើងកំពុងត្រៀមបើកទំព័រថ្មីនៃការប្រឈមមុខដាក់គ្នាខ្លាំងឡើងវិញ ជាមួយសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:៥២
នៅក្នុងកិច្ចប្រជុំការិយាល័យនយោបាយ មេដឹកនាំផ្តាច់ការកូរ៉េខាងជើង គីម ជុងអ៊ុន បានប្រកាសថា នឹងចាប់ផ្តើមការធ្វើតេស្តសាកល្បងឡើងវិញ នូវមីស៊ីលនុយក្លេអ៊ែរ និង មីស៊ីលបាលីស្ទីកចំងាយឆ្ងាយ។
បណ្តាញព័ត៌មានផ្លូវការកូរ៉េខាងជើង KCNA បានចុះផ្សាយនៅថ្ងៃព្រហស្បតិ៍នេះថា គោលនយោបាយសំឡុត គំរាមកំហែងផ្នែកយោធារបស់អាមេរិក បានឈានដល់ចំណុចបន្ទាត់គ្រោះថ្នាក់ ដែលកូរ៉េខាងជើង មិនអាចព្រងើយកន្តើយបានតទៅទៀតឡើយ។ គឺដោយឈរលើហេតុផលនេះហើយ បានជាការិយាល័យនយោបាយ នៃគណកម្មាធិការមជ្ឈឹមបក្សកុម្មុយនីស្តិកូរ៉េខាងជើង បានសម្រេចចេញបញ្ជា ឲ្យពិនិត្យឡើងវិញ ឲ្យបានរហ័សបំផុត នូវលទ្ធភាពចាប់ផ្តើម ធ្វើការសាកល្បងអាវុធមីស៊ីលឡើងវិញ។
គួររំលឹកថា ចាប់ពីឆ្នាំ២០១៧មក កូរ៉េខាងជើងបានផ្អាកការធ្វើតេស្តសាកល្បងអាវុធធន់ធំទាំង២នេះ ដើម្បីបើកផ្លូវដល់ការចរចាជាមួយសហរដ្ឋអាមេរិក។ តែយ៉ាងណា ការចរចារវាងគូសត្រូវទាំង២នេះ បានជាប់គាំងមិនទៅមុខឡើយ តាំងតែពីឆ្នាំ២០១៩មក បើទោះបីជាលោកដូណាល់ ត្រាំ និង គីម ជុងអ៊ុន បានជួបគ្នាដល់ទៅ៣លើកក្តី។
ចាប់តាំងពីលោកចូ បៃដិន បានឡើងកាន់តំណែងមក កូរ៉េខាងជើង បានបដិសេធរាល់សំណើរបើកផ្លូវចរចាឡើងវិញទាំងអស់ ពីសំណាក់អាមេរិក។ មិនត្រឹមតែប៉ុណ្ណោះ កូរ៉េខាងជើង បានធ្វើការសាកល្បងអាវុធជាច្រើនលើក ក្នុងនោះមានមីស៊ីលអ៊ីពែរសូនិក និងមីស៊ីលតាក់ទិកអាចបញ្ជាពីចំងាយបានថែមទៀតផង។
លោក Hong Min អ្នកវិភាគនៅ វិទ្យាស្ថានដើម្បីការបង្រួបបង្រួមជាតិកូរ៉េ បានលើកឡើងថា ស្ថានការណ៍បច្ចុប្បន្ននេះ គឺបានវិលត្រលប់ទៅរកភាពតានតឹងខ្លាំង ដូចក្នុងសម័យដែលលោកដូណាល់ ត្រាំ បានហៅ គីម ជុងអ៊ុន ថាជាមនុស្សគ្រាប់ប្លោង ហើយគីម ជុងអ៊ុន ហៅលោកដូណាល់ត្រាំ ថាជាមនុស្សវិកលចរិក ឆ្កួតនឹងអំនួតខ្លួនឯង។ អ្នកវិភាគនេះ បន្ថែមថា ក្នុងពេលដ៏ឆាប់ខាងមុខ កូរ៉េខាងជើង ប្រាកដជានឹងបាញ់សាកល្បងមីស៊ីលចំងាយឆ្ងាយ ជាក់ជាមិនខាន។
គួរកត់សំគាល់ថា ការដែលកូរ៉េខាងជើង សម្រេចចាប់ផ្តើមធ្វើតេស្តមីស៊ីលចំងាយឆ្ងាយឡើងវិញនេះ គឺវាជួនចំពេលដែល កូរ៉េខាងត្បូងកំពុងត្រៀមរៀបចំ ការបោះឆ្នោតប្រធានាធិបតីអាណត្តិថ្មី នៅខែមីនាខាងមុខ ព្រមទាំងកម្មវិធីប្រកួតកីឡាអូឡាំពិករដូវរងារ នៅទីក្រុងប៉េកាំងផងដែរ។
យ៉ាងណាក៏ដោយ លោកស្រី Rachel Minyoung Lee អ្នកវិភាគនៅ Stimson Center លើកឡើងថា របបព្យុងយ៉ាង ប្រហែលជាមិនបិទទ្វារទាំងស្រុងទេ ដោយទុកផ្លូវឲ្យរដ្ឋបាលរបស់លោកចូ បៃដិន ដែលអាចជាការដកចេញខ្លះ នូវទណ្ឌកម្មសេដ្ឋកិច្ច។ ទណ្ឌកម្មសេដ្ឋកិច្ច ដែលបានកៀបសង្កត់លើកូរ៉េខាងជើង បូកបន្ថែមជាមួយវិបត្តិកូវីដ ដែលបានបង្ខំឲ្យកូរ៉េខាងជើងបិទទ្វារព្រំដែនទាំងស្រុងចាប់ពីឆ្នាំ២០២០មក។ កាលពីចុងសប្តាហ៍កន្លងទៅ រថភ្លើងដឹកទំនិញមួយរបស់កូរ៉េខាងជើង បានបើកសំដៅទៅក្រុង Dandong របស់ចិន ដែលជាសញ្ញានៃការភ្ជាប់ទំនាក់ទំនងពាណិជ្ជកម្មជាមួយចិនឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ