WeChat អះអាងថាមិនមានករណីចូលលុកលុយ ឬលុបគណនីរបស់លោកនាយករដ្ឋមន្ត្រីអូស្ត្រាលីទេ
កាលពីថ្ងៃចន្ទទី២៤មករា មានដំណឹងពីអ្នកនយោបាយអូស្ត្រាលី អះអាងថា គណនី WeChat របស់លោកនាយករដ្ឋមន្ត្រី ស្កុត ម៉ូរីសុន ត្រូវបានគេលុបចោលនឹងប្តូរឈ្មោះថ្មី។ អ្នកនយោបាយអូស្ត្រាលី បានចោទភ្លាមៗថាវាជាសា្នដៃរបស់រដ្ឋអំណាចចិន ដែលបញ្ជាឲ្យគេបិទខ្ទប់គណនី របស់លោកនាយករដ្ឋមន្ត្រីអូស្ត្រាលី។ ភ្លាមៗក្រោយការចោទប្រកាន់នេះ ក្រុមហ៊ុន Tencent ដែលជាម្ចាស់បណ្តាញ WeChat បានអះអាងថា ពុំមានករណីលុបគណនី ដូចការចោទប្រកាន់នេះទេ។
ចុះផ្សាយនៅថ្ងៃ៖
ស្តាប់ - ០២:១២
បើតាមការអះអាង របស់ក្រុមហ៊ុន Tencent គឺបញ្ហានេះទំនងជាបានកើតឡើង ដោយសារតែមានបញ្ហាទាក់ទិននឹងនឹងប្តូរម្ចាស់កម្មសិទ្ធិនៃគណនី WeChat របស់លោក ស្កុត ម៉ូរីសុន។ អ្នកនាំពាក្យ Tencent អះអាងថាដើមឡើយគណនីនេះ ត្រូវបានចុះឈ្មោះដោយមនុស្សម្នាក់ ដែលមានទីតាំងនៅប្រទេសចិនដីគោក។ តែក្រោយមកគណនីនេះ ត្រូវបានផ្ទេរទៅឲ្យក្រុមហ៊ុនមួយផ្សេងទៀត ដើម្បីគ្រប់គ្រង។
យោងតាមទំព័រព័ត៌មាននៃគណនី ដែលមានឈ្មោះថ្មីហៅថា "Australian Chinese new life » ត្រូវបានគេប្តូរ និងចុះទុកនៅថ្ងៃទី២៨ តុលា ឆ្នាំ២០២១ ដោយក្រុមហ៊ុន Fuzhou 985 Technology Co, Ltd.។ យ៉ាងណាមិញ អ្នកតំណាងក្រុមហ៊ុននេះ ឈ្មោះ Huang Aipeng បានអះអាងថា ការទិញកម្មសិទ្ធិគណនីរបស់ស្កុត ម៉ូរីសុនមកគ្រប់គ្រង គឺត្រូវបានធ្វើតាមនីតិវិធីច្បាប់ដោយត្រឹមត្រូវ។
គួរបញ្ជាក់ថា នៅថ្ងៃចន្ទ ទី២៤មករា សមាជិកព្រឹទ្ធសភាអូស្ត្រាលីម្នាក់ ឈ្មោះ James Paterson បានចោទប្រកាន់រដ្ឋាភិបាលចិន ថាជាអ្នកនៅពីក្រោយនៃការបិទខ្ទប់ និងប្តូរឈ្មោះគណនី WeChat របស់លោក ស្កុត ម៉ូរីសុន។ អ្នកនយោបាយរូបនេះ បានអំពាវនាវ ឲ្យគេធ្វើពហិកា ឈប់ប្រើប្រាស់បណ្តាញWeChat នៅអូស្ត្រាលី។ មានអ្នកនយោបាយអូស្ត្រាលីមួយចំនួន បានចាប់ផ្តើមចូលរួម ជាមួយយុទ្ធនាការពហិកានេះ។ ដោយឡែក លោកនាយករដ្ឋមន្ត្រីស្កុត ម៉ូរីសុន មិនបានប្រតិកម្មអ្វីទាំងអស់។
សូមបញ្ជាក់ថា គណនី WeChat របស់លោកស្កុត ម៉ូរីសុន ត្រូវបានបង្កើតឡើង កាលពីឆ្នាំ២០១៩ ដើម្បី បង្ហោះដំណឹងផ្សេងៗ ទៅកាន់សហគមជនជាតិអូស្ត្រាលី ដើមកំណើតចិន ដែលនិយមប្រើប្រាស់បណ្តាញនេះបំផុត។ កាលពីខែធ្នូ ឆ្នាំ២០២០ បណ្តាញWeChat ធ្លាប់បានលុបសារមួយរបស់លោក ស្កុត ម៉ូរីសុន ដែលលោកបានសរសេររិះគន់ អ្នកនាំពាក្យក្រសួងការបរទេសចិន ពីការផ្សព្វផ្សាយព័ត៌មានប្រឌិតក្លែងក្លាយ។ យោងតាមការចុះផ្សាយរបស់ Daily Telegraph លោកស្កុត ម៉ូរីសុន មិនអាចចូលទៅប្រើប្រាស់គណនី WeChat របស់លោក តាំងតែពីថ្ងៃទី ៩ កក្កដា ឆ្នាំ២០២១ម្លេះ។ យ៉ាងណាក៏ដោយក្រុមហ៊ុន Tencent ដែលជាម្ចាស់កម្មសិទ្ធិនៃបណ្តាញWeChat បានអះអាងថា គេនឹងបន្តតាមដានបញ្ហានេះ បន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ