កូរ៉េខាងជើងបាញ់មីស៊ីលមួយគ្រាប់ទៀត ខណៈកូរ៉េខាងត្បូងជិតបោះឆ្នោតប្រធានាធិបតី
នៅថ្ងៃទី៥មីនានេះ បើផ្អែកតាមប្រភពពីក្រសួងការពារជាតិកូរ៉េខាងត្បូង គឺកូរ៉េខាងជើងបានបាញ់មីស៊ីលបាលីស្ទីកមួយគ្រាប់ទៀត។ នេះជាការបាញ់សាកល្បងមីស៊ីល លើកទី៩ហើយ បើគិតចាប់ពីដើមឆ្នាំ២០២២មក។ ការបាញ់មីស៊ីលជាថ្មីនេះ បានធ្វើឡើងខណៈការបោះឆ្នោតប្រធានាធិបតីថ្មី នៅកូរ៉េខាងត្បូង កំពុងតែខិតជិតមកដល់ នៅថ្ងៃពុធ សប្តាហ៍ក្រោយ។
ចុះផ្សាយនៅថ្ងៃ៖
ស្តាប់ - ០២:៤៥
ក្រសួងការពារជាតិកូរ៉េខាងត្បូងអះអាងថា កូរ៉េខាងជើង បានបាញ់មីស៊ីលបាលីស្ទីកមួយគ្រាប់ នៅថ្ងៃព្រឹកថ្ងៃសៅរ៍ ទី៥មីនា វេលាម៉ោង ៨ និង៤៨នាទី ចេញពីតំបន់ Sunan ឆ្ពោះទៅទិសខាងកើត។ ក្រុមប្រឹក្សាសន្តិសុខជាតិ កូរ៉េខាងត្បូង បានថ្កោលទោសការបាញ់មីស៊ីលជាបន្តបន្ទាប់ របស់កូរ៉េខាងជើង ដោយចាត់ទុកថាវាជាការគំរាម មកលើសន្តិភាពតំបន់ និងអន្តរជាតិ។ ក្រុមប្រឹក្សានេះ បានអះអាងថា នឹងបន្ថែមការសង្កេតតាមដាន ឲ្យបានជាប់ជាប្រចាំ ទៅលើមូលដ្ឋានបាញ់សាកល្បងទាំងអស់ របស់កូរ៉េខាងជើង។
ដោយឡែក ប្រភពពីក្រសួងការពារជាតិជប៉ុន បានអះអាងថា មីស៊ីលដែលកូរ៉េខាងជើង ទើបតែបានបាញ់សាកល្បងនេះ គឺហោះបានកំពស់ប្រមាណ ៥៥០គីឡូម៉ែត្រ និងបានចំងាយប្រមាណ៣០០គីឡូម៉ែត្រ។ លោក Nobuo Kishi រដ្ឋមន្ត្រីការពារជាតិជប៉ុន បានលើកឡើងថា កម្រឹតយ៉ាងលឿនរហ័ស នៃការអភិវឌ្ឍន៍សព្វាវុធរបស់កូរ៉េខាងជើងបែបនេះ គឺជារឿងដែលមិនអាចធ្វើឲ្យប្រទេសផ្សេងទៀតក្នុងតំបន់នៅស្ងៀម និងមិនប្រុងប្រយ័ត្នបានឡើយ។
គួរបញ្ជាក់ដែរថា នៅថ្ងៃពុធសប្តាហ៍ក្រោយនេះ កូរ៉េខាងត្បូងនឹងត្រូវរៀបចំការបោះឆ្នោតប្រធានាធិបតីអាណត្តិថ្មី។ បញ្ហាកូរ៉េខាងជើង ហាក់មិនមែនជាការចាប់អារម្មណ៍ខ្លាំង របស់មតិសាធារណៈកូរ៉េខាងត្បូងទេ នៅក្នុងការបោះឆ្នោត ខណៈកង្វល់មានខ្លាំងទៅលើបញ្ហា គ្មានការងារធ្វើរបស់យុវជន និងបញ្ហាវសមភាពប្រាក់ចំណូលរបស់ប្រជាជនជាដើម។ យ៉ាងណាក៏ដោយ បេក្ខជនឈរស្តាំនិយមម្នាក់ ឈ្មោះYoon Suk-yeol មកពីបក្សអំណាចប្រជាជន បានប្រកាសថាចង់បើកការវាយប្រហារ ជាលក្ខណៈបង្ការ ទៅលើកូរ៉េខាងជើង ក្នុងករណីដែលចាំបាច់។
លោក Ahn Chan-il អ្នកជំនាញសិក្សាកូរ៉េ បានលើកឡើងថា ការបាញ់មីស៊ីលរបស់កូរ៉េខាងជើងនាពេលនេះ អាចជាសញ្ញាបង្ហាញការស្តីបន្ទោស ទៅលើលោកប្រធានាធិបតីចប់អាណត្តិ មូន ចែអ៊ីន ថាមិនបានធ្វើអ្វីសោះ ដើម្បីដោះស្រាយវិបត្តិ។ សម្រាប់លោកសាស្ត្រាចារ្យ Yang Moo-jin វិញ គឺកូរ៉េខាងជើង កំពុងតែផ្ញើសារទៅកាន់សហរដ្ឋអាមេរិក ថាត្រូវតែឈប់ប្រើគោលនយោបាយកៀបសង្កត់ រករឿងកូរ៉េខាងជើងតទៅទៀត ព្រោះអំណេះតទៅកូរ៉េខាងជើងមានប្រព័ន្ធសព្វាវុធបាលីស្ទិក និងនុយក្លេអ៊ែរផ្ទាល់ខ្លួន។
ដោយឡែក លោក Cheong Seong-chang អ្នកវិភាគនៅវិទ្យាស្ថាន Sejong បានលើកឡើងថាពីនេះរហូតដល់ខែមេសា កូរ៉េខាងជើងអាចនឹងបន្ថែមការធ្វើតេស្ត ប្រព័ន្ធផ្កាយរណប និងមីស៊ីលបាលីស្ទីកឆ្លងទ្វីបថែមទៀត។ ថ្ងៃទី១៥ មេសា ដែលជាថ្ងៃបុណ្យខួប ១១០ឆ្នាំ នៃកំណើតរបស់ គីម អ៊ីលស៊ុង ដែលកូរ៉េខាងជើងអាចធ្វើតេស្តបាញ់មីស៊ីលធុនធំ ដើម្បីអបអរ។ យ៉ាងណាមិញរបបនេះ បានបង្ហើបឲ្យដឹងថ្មីៗនេះ ថាចង់ចាប់ផ្តើម ធ្វើតេស្តមីស៊ីលឆ្លងទ្វីបឡើងវិញ បន្ទាប់ពីបានផ្អាកកាលពីឆ្នាំ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ