លោក យូន ស៊ុកយោល ប្រធានាធិបតីថ្មីកូរ៉េខាងត្បូង សន្យាអនុវត្តគោលនយោបាយរឹងរូសជាមួយកូរ៉េខាងជើង
ក្រោយការបោះឆ្នោតប្រធានាធិបតីកូរ៉េខាងត្បូង កាលពីថ្ងៃពុធទី៩មីនា លទ្ធផលបានផ្តល់ជ័យជំនះ យ៉ាងប្រផិតប្រផោយ ទៅឲ្យលោក លោក យូន ស៊ុកយោល។ មានអាយុ៦១ឆ្នាំ លោក យូន ស៊ុកយោល គឺជាមនុស្សមកពីបក្សស្តាំអភិរក្សនិយម ហើយដែលបានបង្ហាញគោលជំហររឹងរូសខ្លាំង ជាមួយកូរ៉េខាងជើង។ តាមការវិភាគ ក្នុងអាណត្តិប្រធានាធិបតីថ្មីនេះ កូរ៉េខាងត្បូង និងខាងជើងប្រាកដជាគ្មានលទ្ធភាពអាចចរចា សម្រុះសម្រួលគ្នាបានទេ។
ចុះផ្សាយនៅថ្ងៃ៖
ស្តាប់ - ០២:១៣
យោងតាមលទ្ធផលផ្លូវការ ផ្សាយនៅព្រឹកថ្ងៃព្រសហ្បតិ៍ ទី១០មីនា លោក យូន ស៊ុកយោល បានទទួលសំឡេងឆ្នោត ចំនួន ៤៨.៥៦% ចំណែកលោក លី ចែម្ញុង បានទទួលចំនួន ៤៧.៨៣%។ លោក យូន ស៊ុកយោល អតីតរដ្ឋអាជ្ញា មកពីគណបក្សស្តាំអភិរក្សនិយម ឡើងជាប្រធានាធិបតីថ្មីរបស់កូរ៉េខាងត្បូង។
សម្រាប់អ្នកវិភាគ អាណត្តិថ្មីនេះ គឺនឹងគ្មានទៀតឡើយ ទំនាក់ទំនងអន្តរកូរ៉េទាំង២ ព្រោះលោក យូន ស៊ុកយោល ជាមនុស្សដែលមានគោលជំហររឹងរូសបំផុត ជាមួយរបបផ្តាច់ការកូរ៉េខាងជើង។ ក្នុងពេលឃោសនាបោះឆ្នោត លោក យូន ស៊ុកយោល ធ្លាប់បានហៅ គីម ជុងអ៊ុន ថាជាក្មេងឈ្លើយ ហើយធ្លាប់អះអាងថាបើមានឱកាស លោកនឹងប្រដៅ គីម ជុងអ៊ុន ឲ្យទន់សំបកខ្លះ។
លោកប្រធានាធិបតីថ្មីកូរ៉េខាងត្បូង ធ្លាប់បានអះអាងថា បើចាំបាច់ កូរ៉េខាងត្បូងត្រូវតែវាយប្រហារទៅលើកូរ៉េខាងជើងឲ្យបានមុន ដើម្បីជាការបង្ការ។ លោក យូន ស៊ុលយោល បានរិះគន់ គោលជំហរទន់ជ្រាយជ្រុលពេល របស់រដ្ឋាភិបាលមុន ដែលដឹកនាំដោយលោក មូន ចែអ៊ីន។ នៅក្នុងសន្ទរកថាជាលើកទី១ ក្នុងនាមជាប្រធានាធិបតី លោក យូន ស៊ុកយោល បានសន្យាថា នឹងចាត់វិធានការឲ្យចាស់ដៃ ចំពោះសកម្មភាពខុសច្បាប់ និងគ្មានការពិចារណាត្រឹមត្រូវ របស់កូរ៉េខាងជើង។
លោកស្រី Soo Kim អ្នកវិភាគនៅ RAND Corporation បានលើកឡើងថា ការប្រឹងប្រែងស្តារទំនាក់ទំនងអន្តរកូរ៉េ ប្រហែលជាត្រូវធ្លាក់ដល់ចំណុចសូន្យ នៅក្នុងអាណត្តិថ្មីនេះ។ លោកប្រធានាធិបតីថ្មី បានលើកឡើងថា ចង់ទិញបន្ថែមអាវុធមីស៊ីលរបស់អាមេរិក។ រដ្ឋាភិបាលថ្មីក៏អាចបន្ថែមការធ្វើសមយុទ្ធយោធាជាមួយកងទ័ពអាមេរិក ឲ្យបានកាន់តែញឹកញាប់។
លោក Hong Min អ្នកស្រាវជ្រាវនៅវិទ្យាស្ថានដើម្បីការបង្រួបបង្រួមកូរ៉េ បានលើកឡើងថា លោក យូន ស៊ុកយោល មិនបានផាត់ចោលគំនិតចង់ចរចា និយាយជាមួយកូរ៉េខាងជើងមែន ក៏ប៉ុន្តែគោលជំហររឹងរូសជ្រុលខ្លាំងរបស់គាត់ នឹងធ្វើឲ្យកូរ៉េខាងជើងកាន់តែរឹងរូសដែរ។ លោកអះអាងថាកូរ៉េខាងជើងគ្មានហេតុផលអ្វី មកចរចាជាមួយកូរ៉េខាងត្បូង ដែលរឹងទទឹង មិនផ្តល់សម្បទានឲ្យខ្លួននោះទេ។ ទន្ទឹមគ្នានេះ កូរ៉េខាងជើងនឹងងាកទៅប្រឹងពង្រឹងអភិវឌ្ឍន៍សព្វាវុធបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ